පුර පක්ෂයේදී දෙවියකු ලෙසත් අව පක්ෂයේදී යක්ෂයකුගේ විලාසයත් ගන්නා සූනියම් දේවතාවන් කතරගම දෙවියන්ගේ පරිවාර සේනාවේ සේනාධිපති ලෙසත් දේවතා බණ්ඩාර දෙවියන්ගේ අධිකාරම් ලෙසත් උපුල්වන් දෙවියන්ගේ පණිවුඩකරු ලෙසත් වැඩවාසය කරන බැව් ජන විශ්වාසයේ පවතී.
සූනියම් දේවතාවා මුල් අවධියේ යක්ෂයකු වශයෙන් සිට පසුව දේවත්වයට පත්ව ඇත. සූනියම යනු යමෙකුට නපුරක් අවැඩක් කිරීමය. සූනියමක් කරන්නා යනු අරුතින් සූනියම් දේවතාවා යන්න භාවිතයට පත්ව ඇත.
වර වර හසකර දරමින් නේරි එල්ලුම් තේවා
හර හර ගින් නාභියෙන් ගිනි දෙපය ඉගිලි වාවා
බලපාමින් යොදුන් උසට බීත කරයි ඒවා
මෙරට යුදට බලපාමින් ඔඩ්ඩිස තම්බි වාවා
ඔඩ්ඩිස යනුවෙන් පහතරට ශාන්ති කර්මවලදී හඳුන්වනු ලබන සූනියම් දෙවියන්ගේ මුවගෙහි රත්න වර්ණ සර්පයෙක් (ලේ පොළෙඟෙක්) සිටී. තුරඟ වාහනරූඪව සිටින සූනියම් දෙවියන් ඔඩ්ඩි කුමරා ගම්භාර දෙවියන් සූනියම් යකා යනුවෙන්ද හඳුන්වයි. අමනුෂ්ය බලවේග මගින් මනුෂ්යයාට ලෙඩ කිරීමට උපද්රව ඇතිකිරීමට වරම් ලබා ඇති සූනියම් දෙවියන් සඳහා ලංකාවේ බොහෝ ස්ථානවල දේවාල ඉදිකොට ඇත. බොහෝ නිවෙස්වල ගම්භාර දෙවියන්ට පහන් තැබීමටද ජනතාව පුරුදුව සිටිති.
ගමින් ගමට ගෙයින් ගෙට සංචාරය කරමින් ජනතාවගේ දුකට පිහිටවන බවත් නඩු අවනඩු සොයා බලමින් යහපත් අයට හොඳ ප්රතිඵලත් අයහපත් අයට අනිසි ප්රතිඵලත් ඇතිකිරීමට සූනියම් දෙවියන් පෙළඹෙයි.
උතුරු ඉන්දියාවේ පඬුවස් දෙවි නම් රජෙකුට දාව උපන් කුමරෙක් ලෙස සූනියම් දෙවියන් එක්තැනක සඳහන් වේ. මෙම රජුගේ බිසව සෙරීන් නම් වූ බවත් සූනියම් දෙවියන්ට කරනු ලබන කෝල්මුර කවි ගායනාවල සඳහන් වේ.
දාවෙමින් නුවර පඬුවස් නිරිඳුන්ට
තේජසින් තුරඟ වාහන වැඩඉන්ට
මා විසින් කියන දේ ඉටුකර දෙන්ට
සූනියන් දේවතාවෙනි පිං ගන්ට
රාජ ඔඩ්ඩිස නමින් ලොව පහළවූ 'සූනියම් දෙවියන් ඔඩ්ඩිස නම් දේශයේදී 'යදම්බරී' නම් බිසවකගේ කුස පිළිසිඳගෙන ඇත්තේ ඔඩ්ඩි රජුට දාවය. දහසය වැනි වියට පා තබන ඔඩ්ඩි කුමරා භයානක වේෂයක් මවාගෙන ඔඩ්ඩි රජුට කඩුවෙන් කොටා මරා ඉක්බිතිව වඩිග දේශයට පැමිණ වඩිග රජුද මරා දමන මොහු විසාණා පුරයට ගොස් වෙසමුණි රජු හමුවෙයි. රජ තුන්කට්ටුවක් මරා සුණුවිසුණු කළ බව වෙසමුණිට පවසා මොහු මනුස්සයින්ගෙන් බිළිපුද ගැනීමට වරම් ඉල්ලා සිටියි. එසේ වරම් ලබන සූනියම් දෙවි රාජඔඩ්ඩිස ලෙසින් ප්රසිද්ධියට පත්වෙයි. අනතුරුව හිරන්ද නම් වනයට පැමිණ සිය වාස භවනය සඳහා තුඹසක් යොදාගත් බව පැවැසේ.
'සත්ජන්ම' නමින් හැඳින්වෙන සූනියම් දෙවියන්ගේ ජන්ම සත විවිධ වෙනස්කම් වලින් යුක්තය.
අදත්ත කුමාර
සන්නි ඔඩ්ඩිස
සූනියම් යකා
නාග ඔඩ්ඩිස
සූනියම් දේවතා
ගරුඬ කුමාර
වෙළද කුමාර යනුවෙන්ද ඇතැම් තැනක දෙමළ ඔඩ්ඩිස, ගරුඬ ඔඩ්ඩිස, නාග ඔඩ්ඩිස, ගොපළු ඔඩ්ඩිස, වෙළඳ ඔඩ්ඩිස සොහොන් ඔඩ්ඩිස, රාජ ඔඩ්ඩිස යනුවෙන් ද දැක්වේ.
උතුරු ඉන්දියාවේ දෙවිනුවර නම් පුර පඬුවස්දෙව් නම් රජෙකුගේ බිසව ජල ක්රීඩා පිණිස රජුගේ මඟුල් පොකුණට ගිය අවස්ථාවේ එහි සුපිපි නෙලුම් මලක් දැක එම නෙලුම් මලේ සුවඳ විඳගත් බිසවට අපූරු දොළක් උපදියි. එම දොළ නම් නාගයන් හා සංවාසයේ යෙදීමයි. සිය සැමියාට රහසින් ඇය එම දොළ දුක සංසිඳුවා ගනී. මෙය දැනගත් රජු විමතියට පත්ව මෙම සිදුවීම පිළිබඳව පරෙවි බමුණන්ගෙන් විමසයි. ඔවුන් රජුට දන්වා සිටියේ බිසව විෂඝෝර සර්පයන්ගේ සංවාසයෙන් මහා බලසම්පන්න පුතෙකුන් ලබන බවයි. මෙසේ සෙරීන් බිසවගේ කුස තුළින් උපන් කුමරා නාගයන් ඇසුරු කිරීමෙහි ලෝලියකු වූ අතර ලේ පොළඟකු විකා ලේ බීම හේතුවෙන් සූනියම් දෙවියන් ලෙස බලවත් වුණ බව ජනප්රවාදයේ එයි.
සුරාසුර යුද්ධයේදී සුරයන්ගේ ශක්තිය හීනවූ අවස්ථාවක ඊශ්වරයන් මහා කෙළ නම් නා රජුන් මහා මේරුව වටා ගමන් කරමින් එක් රැස්කළ සර්ප විෂෙන් ගුලියක් තනා එම ගුලිය ගිල පිටකළ විස දුමෙන් සූනියම් දේවතාවා ලොව පහළවූ බව ද පැවැසේ.
එවිට දකුණහැරී විෂදුම් ජාලෙහි
අවට රුදුරු මහ ගිණිකඳ මැවුනි
වමට හැරිය නයි විෂදුම් ජාලෙනි
ලොවට සූනියම් දෙවිඳුන් ඉපදුන
මල්වත්තේ බණ්ඩාර දෙවියන් ලෙසින් හඳුන්වනු ලබන සූනියම් දෙවියන් පිච්චමල් සුවඳින් යුක්තවන බවද රාත්රි කාලයේ ගම්වල සැරිසරනා බවද පැවැසෙයි. ගම්වල සංචාරය කරන සූනියම් දේවතාවාට හසුවන සුනඛයන් සූනියම් දෙවි අතැති 'සෝලු' ලීයෙන් පහර කෑමට ලක්ව මිය යන බවද ගම්මු විශ්වාස කරති.
ලංකාවේ බොහෝ රටවාසීන් මෙන්ම සියනෑකෝරළවාසීන්ද සූනියම් දෙවියන්ට පහන් දල්වා පිහිට පතයි. සූනියම් දේවතාවා දෙවියකු ලෙස පෙනී සිටින්නේ පුර පක්ෂයේදී බැවින් මෙම දේවතාවාගෙන් පිහිට ලබාගැනීමට පුර පක්ෂය භාවිතා කරයි. සුදු වස්ත්රයෙන් සැරසී සිටින මෙම දේවතාවා අලුයම් කාලයේ වෙහෙර විහාරස්ථානවල සැරිසරන බව ද පැවැසේ.
අතීතයේ පටන්ම පැරැන්නන් රාත්රී 9 න් පසු තම නිවස ඉදිරියේ පහන් දල්වා තම තමන්ගේ දුක් ගැනවිලි සූනියම් දෙවියන්ට කීමට පුරුදුව සිටිති. ශ්රී ලංකා ද්වීපයත් සම්බුද්ධ ශාසනයත් ආරක්ෂා කිරීමට බාරව සිටින නාථ, විෂ්ණු ආදී සතර වරම් දෙවිවරු මෙන්ම සූනියම් දෙවියන්ට හිමිව ඇත්තේද සුවිශේෂී ස්ථානයකි.
සූනියම් දේව කන්නලව්ව මෙසේ වෙයි. තවද මහාසම්මත රජුන් රාජ්ය කරන කාලයේ මැණික්පාල බිසවට යම දුෂ්ටයකු විසින් කරන ලද විනය කැපීමට රුසිවරුන් කැඳවා බලි බිලි දී යාග හෝම පවත්වද්දී විසයට අරක්ගත් වසවර්ති පොළඟා ආතුරයාගේ පිටුපස සිට 18 රියනක් උසට මැවී බැලූ විට රුසිවරු සිහිනැතිව වැටුණේය. එකල රජ වාසලට ගෙන්වූ ජීවක වෛද්යවරයා අමාපැන්ගෙන ඔවුන් සුවපත් කළේය. රුසිවරු විනය කපන්නට අපට බැරිය එය කළ හැකි එකම තැනැත්තා ඔඩ්ඩි කුමරුය. ඔහු ගෙන්වා විනය කපන්නැයි සැලකර සිටියේය. මහා සම්මත රජු විෂ්ණු සුරිඳු මගින් ඔබවහන්සේ කැඳවා ගත්තේය. ඔබ වහන්සේ විනය පරීක්ෂා කරමින් මැණික්පාල බිසව දෙස බැලූ කල්හි 18 රියන් වසවර්ති පොළඟා හිස වන වනා මතුවිය. ක්ෂණයෙන් ඔබ වහන්සේ කඩුව ගෙන උගේ හිස දෙපලු කර දැම්මේය. එදා ඔබ වහන්සේ විනය කපා දමා මැණික්පාල බිසවුන්ගේ ලෙඩ සුවපත් කළ ආඥාවෙන්, ආනුභාවෙන් මොවුන්ට කර ඇති වැල් පැන්නුම් ඉරි පැන්නුම් කොඩිවින හදි හූනියම් අදත් කපා එකී වින ඇදුරා වෙත ආපිට හරවා යෑවීමටත්, විනයකුගෙන් පැමිණි සකල උපද්රව දුරුවන් දූරීභූතකර ආරක්ෂා කර දෙනසේක්වා.
Негізгі бет සූනියම් දෙවියන්ගෙන්ගේ පිහිට ලබා ගන්නා ආකාරය සවිස්තරාත්මකව (01 කොටස)
Пікірлер: 103