İndividual yoxsa qrup terapiyası? İndividual terapiya “psixoloq və danışanın”, qrup terapiyası isə “psixoloq və danışanların” bir araya gəldiyi terapiya şəkilləridir. Hansı terapiya şəklindən istifadə etdiyimizdən asılı olmayaraq -terapiyaya hansı səbəbdən/səbəblərdən müraciət etdiyimiz -individual yanaşmaya yoxsa qrup dəstəyinə ehtiyacımızın olması -terapiyaya ayırdığımız büdcə (qrup terapiyası individual terapiyadan daha uyğun qiymətli olur) və s. aldığımız terapiyanın hansı şəkildə olmasını təyin edir. Bəzi mövzular (təşviş, qorxu, sosial narahatlıq, utancaqlıq, depressiv hallar, taciz, yas və s.) qrup terapiyasında özünə daha çox yer etdiyi halda bəzi mövzuları (ana yarası, ayrılıq, kiçik yaşlarda yaxın insanı itirmək, qəzalar yəni daha spesifik məsələləri) individual terapiyada ortaya qoymaq və onlar üzərinə işləmək daha uyğun olur. Çünki qrup terapiyasında digər iştirakçıların olması danışanların işini rahatlaşdırır, ifadə edə bilmədiklərini bir başqa danışan ifadə edir məsələn. Ya da digər danışanların daxili dünyaları ilə yaxından tanış olurlar, nəticədə nəinki əlaqə qurmaq (bu sağaldıcıdır), öz daxili dünyasını qəbul edə bilmək, başqasının daxili dünyasına şəfqətlə yanaşa bilmək, bunun da öz daxili dünyasına qarşı mərhəməti yaratması, “problemli deyilmişəm”, “mən tək deyilmişəm” kimi reallıqları daha yaxından görmək və çox uzun olması səbəbilə saymadığım daha nə qədər xüsusiyyətlər. Qrup terapiyası “yumşaldıcı”, “üfüqləri açıcı”dır. “İnsanı insan sağaldar” sözünün əsl nümunəsidir. İndividual terapiya isə sırf danışana özəl dəstəyi verir. Bir çox insan individual seanslar olmasa ordan yararlana bilməyəcəyinə inanır çünki sadəcə individual yanaşma olarsa yaxşılaşa biləcəyinə inanır, halbuki bütün məsələ sanki “yaxşılaşmaq üçün xüsusi bir hal lazımdır”a olan inancdır. ❗️Nəzərə almaq lazımdır ki, keçirilmə şəkli fərqli olsa da aldığımız “nəticələr” eyni olur. Bu səbəbdən soruşmağın lazım olan sual “hansı terapiya mənə həqiqətən kömək edər?” yox, “hansı terapiya şəkli mənim hazırkı vəziyyətim və ehtiyaclarımla üst-üstə düşür?” olmalıdır.
Пікірлер: 3