٥ علامات تعرفي بيهم اللافبومبينج (قصف الحب النرجسي)
١- تقديم الهدايا بشكل مفرط وباسعار خيالية ، المفروض انه في بداية التعارف بين الناس الاسوياء بيكون الموضوع عبارة عن مقابلات في كافيهات عادية لو رسمي شوية بيبقى عزومة في مطاعم لطيفة ،هدايا رمزية معبرة لكن مش طبيعي ان التعارف يتم في مطاعم فنادق خمس وسبع نجوم ونلاقي بوكيه ورد بعشر الاف جنيه مبعوت ع البيت ولا نلاقي هدايا دهب والماس وكل واحد ومستواه المادي والكلام دة بيستثنى منه البخيل يعني النرجسي اللي معاه فلوس وماجابش هدايا غالية في اللافبمبينج فدة نرجسي بخيل او بخيل نرجسي يعني البخل والعياذ بالله صفة اصيلة فيه ملهاش علاقة بالنرجسية ، فهنا علامة حمرا كبيرة
٢- النرجسي في المرحلة دي عايز يكون معاكي ٢٤ساعة ،سواد خروج او تليفونات او رسايل المهم ان التواصل يكون متواصل وبلا انقطاع وطبعا دة بيكون لغرضين خبيثين اوثلاثة ، اول حاجة يدرسك كويس جدا وكأنه عايش معاكي في نفس البيت ،بيعرف طباعك ونقاط ضعفك ،التاني بيعلقك بيه ويحط جواكي بذرة ادمانه والثالث يقنعك تماما انه محدش بيحبك اده وانه حاميكي من العالم وانه ملجأك الوحيد ، واذا انتي مشغولة ومش عارفة تلبي طلبه في التواجد طول الوقت بيضغط عليكي سواء بالمحايلة والكلام المعسول انا مش بشبع منك ،انتي السبب الوحيد اني لسة عايش ، مش قادر اتخيل انك تبعدي عني ثانية واحدة ،انا ماصدقت لقيتك ،
٣- الالتزام السريع او محاولة محمومة للتقارب الجسدي ، حتلاقيه من اول أسبوع ان مكانش من اول يوم يقول لك بحبك ،حبيتك من اول نظرة وعايز ياخد منك كلمة ويفضل يزن عشان تقولي له انك كمان بتحبيه وتطمنيه انك حترتبطي بيه وحيدخل في الخطوبة بسرعة الصاروخ والجواز في خلال اشهر ودة بيحصل من اغلبهم سرعة الزواج دة ، واحيانا بيبدأ يفرض عليكي قوانينه في المرحلة دي اللي هي اعملي دة وماتعمليش دة البسي دة وماتكلميش دة واواوا من باب اني بحبك وبغير عليكي وبخاف عليكي ،
٤- في المرحلة دي النرجسي بيعمل أسلوب تلاعب خطير وهو عزلك عن العالم اللي حواليكي عن اهلك وصديقاتك ودة بيكون سهل جدا لو انتي كنتي متاحة له ٢٤ ساعة زي ماهو عايز لان كدة مفيش وقت تاني تديه لاي حد وكل اللي حواليكي بيحسوا انك انسحبتي منهم ومن مجتمعك أصلا وبيبدأوا يعاتبوكي على غيابك عنهم وانتي بتكوني فعلا مضغوطة ومش لاقية وقت فبتحسي انهم جايين عليكي ومش مقدرين ظروفك وبالتالي بتبدأي تبعدي عنهم وطبعا ممكن تشتكي منهم للنرجسي وهو يزكي نار الخلاف وهو دة اللي هو عايزه ويبدأ يفهمك ان محدش بيحبك غيره وانه ملجأك وملاذك وانك تقدري تستغني عن الناس دي بيه وهو حيكون مامتك وباباكي وصاحبك فإيه لازمة الناس دي كلها ، وانتيب تستسلمي وللأسف مش بتسمعي ابدا لصاحباتك ولا لامك لما بيحذروكي منه
٥- اخر علامة انه بيستاء ويتضرر وبيعلن تضرره من حدودك اذا كان عندك حدود صحية وخصوصا اذا كنتي بتعرفي تقولي لا يعني مثلا انتي التزمتي بخروجة مع اسرتك وهو عايزك تخرجي معاه فحتقولي لا مش حينفع حتلاقيه بيستاء لكن بلطف ويبدأ يقول لك انتي مش بتحبيني انتيب تحبيهم اكتر مني انا حموت عشان أكون معاكي وانتي مش مهتمة ولو زعلتي من الكلام دة وفهمتي انه بيحاصرك ومش بيحترم خصوصياتك وعلاقتك باسرتك وبينتي دة يقوم يدخل في منطقة انه يحسسك بالذنب ازاي يجيب لك هدية غالية جدا او يجيب لك بوكيه ورد ويقف لك بيه ساعتين تحت البيت لحد ماتنزلي ويديهولك المهم انه يعمل حاجة تفاجئك وتحسسك انه اد ايه حيموت عليكي فتحسي بالذنب انك قسيتي عليه او اعترضتي او فكرتي حتى انه عايز يسيطر عليكي وبالتالي بتنجح خطته ويكتسب ثقتك اكتر ويعلمك ازاي تحسي بالذنب من غير ماتكوني مذنبة
خدي بالك غالبا كل اللي حواليكي بيحسوا ان فيه حاجة غريبة وبيقولوا لك وانتي نفسك ساعات تحسي ان الوضع غريب لكن قصف الحب بيكون قوي وتعطشك لدة بيخليكي ماتشوفيش الحقيقة
Негізгі бет ٥ علامات تعرفي بيهم (قصف الحب النرجسي) Love bombing
Пікірлер: 212