സെപ്റ്റംബർ 1 മുതൽ ആണ് പായസ ചലഞ്ചുമായി ബന്ധപ്പെട്ട ചർച്ചകൾക്ക് തുടക്കം കുറിക്കുന്നത്. അഭയത്തിൽ ഡയാലിസിസ് ചെയ്യുന്ന 54 മനുഷ്യരുടെ ജീവിച്ചിരിക്കാനുള്ള ആഗ്രഹത്തെ പൂർത്തീകരിക്കാൻ ഈ പ്രോഗ്രാമുമായി മുന്നോട്ട് പോവുക എന്നത് മാത്രമായിരുന്നു ചെയ്യാനുണ്ടായിരുന്നത്.
മൂന്നാം ദിവസം കയ്യിൽ പൈസ ഇല്ലാത്തത് കൊണ്ട് ഡയാലിസിസ് മുടങ്ങുമെന്നും തുടർന്നുള്ള ദിവസങ്ങളിൽ മരിക്കുമെന്നുമുള്ള പേടിയില്ലാതെ ഇനി അവർക്ക് കുറച്ചു കാലമെങ്കിലും ജീവിക്കാം.
നമ്മൾ ചെയ്തു വെച്ചത് കേവലം ഒന്നോ രണ്ടോ ദിവസത്തെ വോളന്റിയർ പ്രവർത്തനമല്ല. ചെയ്തതിന്റെ വ്യാപ്തി അറിയണമെങ്കിൽ അതിന്റെ ഉപകാരം കിട്ടുന്നവന്റെ കണ്ണുകൾ നമ്മൾ കാണേണ്ടിയിരിക്കുന്നു.. അതിലുള്ള സന്തോഷത്തിന്റെ, ആശ്വാസത്തിന്റെ നനവും അവരുടെ മക്കളുടെ പ്രിയതമയുടെ മാതാപിതാക്കളുടെ പ്രാർത്ഥനയും മാത്രം മതിയാകും നമുക്ക് എല്ലാം മറന്ന് ജീവിതത്തിൽ മുന്നോട്ട് പോകാൻ..
സെപ്റ്റംബർ 1 മുതൽ തിരൂർ സിറ്റി സെന്ററിൽ പായസ ചലഞ്ച് ക്യാമ്പയിൻ ഓഫിസ് പ്രവർത്തനം തുടങ്ങിയിരുന്നു. സ്നേഹതീരം വോളന്റിയർ വിങ്ങിലെ അംഗങ്ങളെ വിവിധ ടീമുകളായി തിരിച്ചുള്ള പ്രവർത്തനമാണ് ഈ പരിപാടിയെ വിജയിത്തിലെത്തിച്ചത്.
ഓർഡർ എടുക്കുന്നതും മറ്റും മോണിറ്റർ ചെയ്യാൻ അനലിറ്റിക്കൽ ടീം, പഞ്ചയത് തല കോർഡിനേറ്റർമാർക്ക് വേണ്ട നിർദ്ദേശങ്ങൾ നൽകാൻ പ്രൊഡക്ഷൻ ടീം, സോഷ്യൽ മീഡിയ ക്യാമ്പയിന് മീഡിയ വിങ്, സാമ്പത്തിക കാര്യങ്ങൾ സ്പോണ്സർഷിപ്പ് തുടങ്ങിയവ ഡീൽ ചെയ്യാൻ അക്കൗണ്ട്സ് വിഭാഗം, എല്ലാ വിഭാഗം വിങ്ങിനെയും കോർത്തിണക്കി ഡിസിപ്ലിൻ ടീം എന്നിങ്ങനെ വിവിധ വിഭാഗങ്ങളായാണ് സ്നേഹതീരം പ്രവർത്തിച്ചത്.
സ്പോണ്സർഷിപ്പ് കണ്ടെത്തുന്നതിനുള്ള ടീം,
പർച്ചേസ് കമ്മറ്റി, മെറ്റീരിയൽ എത്തിക്കുന്നതിനുള്ള ടീം, എന്നിങ്ങനേയും മുതിർന്നവരുടെ മറ്റൊരു വിങ്ങും കൂടെ പ്രവർത്തിച്ചു.
60 ദിവസങ്ങളിലായി 200 ൽ അധികം വോളന്റിയർമാരുടെ ഗ്രൗണ്ട് വർക്കും, നവംബർ 8,9 തിയ്യതികളിലെ 700 വോളന്റിയർമാരുടെ ക്യാമ്പയിൻ അവസാന ദിവസത്തെ കൈ മെയ് മറന്നുള്ള വോളന്റിയർ വർക്കുമാണ് നമ്മുടെ പരിപാടിയുടെ വിജയത്തിന്റെ അടിസ്ഥാനം.
ഉറക്കമൊഴിവാക്കിയവർ, സ്പോണ്സറിങ്ങിന് വേണ്ടി ഓടിനടന്നവർ, ഏറ്റവും കുറഞ്ഞ വിലയിൽ പർച്ചേസ് ചെയ്യാൻ സാധ്യമാകുന്ന എല്ലാ വഴികളിലും അന്വേഷണം നടത്തിയവർ, തൃശ്ശൂരിൽ നിന്ന് പോലും പാചകത്തിന് വേണ്ട പാത്രങ്ങൾ എത്തിച്ചവർ, കേരളത്തിലെ പ്രഗൽഭരായ പാചകക്കാരുടെ നിരയെത്തന്നെ അണിനിരത്തിയവർ, ജോലി ലീവാക്കി വന്നവർ, ഒരുപാട് ദൂരേന്ന് മൂന്നും നാലും ബസ്സ് മാറിക്കേറി വന്നവർ, വീട്ടിൽ വഴക്ക് കൂടി വന്നവർ, മഴ കൊണ്ട് പനിച്ചു ഡോളോ കഴിച്ചു പിറ്റേ ദിവസം വീണ്ടും വോളന്റിയർ ആയവർ, കൈ പൊള്ളിയത് ആരെയും കാണിക്കാതെ വീണ്ടും അതേ വർക്ക് എടുത്തവർ, വെള്ളം കുടിക്കാൻ മറന്നു പോയി യു.ടി.ഐ യുടെ വക്കത്ത് എത്തിയവർ, പീരീഡ്സിന്റെ വേദനയിലും അവിടെ ഓടി നടന്നവർ, കടുത്ത പുകയിൽ കണ്ണ് പൊള്ളിയിട്ടും കാറ്ററിങ് ടീമിന്റെ അസിസ്റ്റന്റ് ആയി നിന്നവർ, യൂണിഫോമുമായി വന്ന് തലേന്ന് രാത്രിയിലെ വർക്കിന് നിന്ന് ഉറങ്ങാതെ പിറ്റേന്ന് കോളേജിൽ പോയവർ, തലപ്പുകച്ചാലോചിച്ചു ഓരോ മിനിറ്റിലും കണ്ടന്റ് എഴുതി തയ്യാറാക്കിയ പ്രോഗ്രാമിന്റെ ഔട്ട് മനോഹരമാക്കിയവർ, ആരും അറിയാതെ ലൈം ലൈറ്റിൽ ഒരിക്കൽ പോലും മുഖം കാണിക്കാത്ത പഞ്ചയത്തുകളിൽ വർക്ക് ചെയ്ത മക്കൾ, കോർഡിനേറ്റർമാരുടെ പക്കൽ നിന്ന് വഴക്ക് കേട്ടിട്ടും വീണ്ടും അനുസരണയോടെ വർക്ക് എടുത്തവർ. പ്രോഗ്രാം കഴിഞ്ഞു ഒരാഴ്ച്ച പനിച്ചു കിടന്നവർ, ശബ്ദം പോയവർ....
മനുഷ്യന്മാർ എന്ന് വിളിക്കാൻ ഏറ്റവും യോഗ്യരായ ആളുകളെയാണ് അന്നവിടെ ഈ കോലത്തിൽ കണ്ടത്..
അവിടത്തെ മണ്ണിൽ വീണ ഒരു തുള്ളി വിയർപ്പ് പോലും ഒരിക്കലും പാഴായി പോവുകയില്ല എന്ന ഉറപ്പ് ഉണ്ട്...
ആകെമൊത്തം 80 ലക്ഷം രൂപയുടെ വരവും 20 ലക്ഷം രൂപയുടെ ചിലവും 60 ലക്ഷം ലാഭത്തിലുമാണ് പായസ ചലഞ്ച് അവസാനിച്ചത്.
നന്ദി എന്ന ഒറ്റവാക്കിനപ്പുറം കടലോളം സ്നേഹവും ബഹുമാനവും മനസ്സിൽ ചേർത്ത് എല്ലാവരെയും ചേർത്ത് പിടിക്കുന്നു.. വാക്കിലോ പ്രവർത്തിയിലോ ബുദ്ധിമുട്ടുകൾ നേരിട്ടിട്ടുണ്ടെങ്കിൽ ക്ഷമ ചോദിക്കുന്നു..
Негізгі бет Abhayam Payasam Challenge | Snehatheeram Volunteer Wing | Tirur
No video
Пікірлер: 4