Ajib bir bozorga kirib qoldim men,
Tarozilar buzuq, tirik rastalar.
Narxlar ham ajoyib, kim osmondayu,
Kimlardir tuproqdan ozroq pastdalar!
Ajib bir bozorga kirib qoldim men,
Pul bo‘lsa qushdan sut sog‘ib berarlar.
Juvonlar narxini bo‘yniga osib,
Onalar bolasin sotib turarlar.
Ajib bir bozorga kirib qoldim men,
Haridor xaqqiga hiyonatlar avj.
Kimdir do‘stni sotar, kimdir ayolin,
Alardan kechishga topilganda vaj!
Ajib bir bozorga kirib qoldim men,
Ko‘zimning yog‘iga botirdilar non.
Hatto vijdonini sotar odamlar,
Dalloldek o‘rtaga qo‘shilsa Shayton!
Ajib bir bozorga kirib qoldim men,
Sariq chaqalarga pullanar qadr.
Jonni Azroyilga sotmoq bo‘larlar,
Sotishga hech narsa qolmasa oxir.
Ajib bir bozorga kirib qoldim men,
Taxorat ko‘rmagan qo‘llar to‘la pul.
Otasin-onasin savdoga qo‘yib,
Iymondan ayrilib bo‘lganlar butkul!
Ajib bir bozorga kirib qoldim men,
Sotuvchilar serob, xaridor ham ko‘p.
Zumda istagini bajararlar bor,
Pul berib desalar oyog‘imni o‘p!
Ajib bir bozorga kirib qoldim men,
Davlatparastlarning bijg‘igan isi.
Nahot anglamaslar bozor so‘ngida,
Kimlar yotishini qaro qon qusib!
Ajib bir bozorga kirib qoldim men...
✍️Malika Salimova
🎙Shahina Bahodirova
Негізгі бет Ajib bir bozorga kirib qoldim men...
Пікірлер: 6