Алматыда жеңіл рельсті көлік желісі яғни, LRT салынуы мүмкін. Қазір мамандар LRT құрылысының жобасын әзірлеп жатыр екен. Бірақ әзірге көлік кептелісі мен қозғалыс жүктемесін азайтуға бағытталған жобаға қанша қаржы бөлінетіні белгісіз. Ал мұндай жаңалықты естіген алматылықтардың уайымы күшейген. Себебі тұрғындар құрылыс жұмыстары ұзаққа созылып, керісінше қалада кептеліс көбейе ме деп алаңдап отыр
Алматы әкімі Ерболат Досаев соңғы кездері мегаполисте жеңіл рельсті көлік желісі салынатыны туралы жиі айтып жүр.
Жалпы бұл жайлы қаладағы трамвай қатынасын тоқтатқан бұрынғы басшы Бауыржан Байбек те сөз еткен еді. Содан бері 5 жылға жуық уақыт өтті. Ал таяуда Досаев мырза жобаның жай-жапсары 2023 жылы әзір болады деді. Қазынадан бөлінетін қаржы да сол кезде белгілі болмақ. Әрине, мұндай ауқымды жоба көлік қозғалысындағы қиындықтарды шешуге бағытталып отырғаны анық жайт. Десе де, көпшіліктің көңілінде сенімге қарағанда, күдік басым секілді. Себебі ел «жемқорлықтың нышанына айналған» Астана LRT» жобасын әлі ұмытқан жоқ.
Ал сөзін дәлелді ету үшін әкім әлем елдеріндегі тәжірибені мысал етіп отыр. Айтуынша, ірі мегаполистерде тұрғындар көбіне метро, жеңіл рельсті көлік желісі, жылдам автобус секілді жүрдек транспорттармен қатынайды. Ал автобус, велосипед, самокат сияқты транспорт түрлері жақын аялдамаға жету үшін қолданылады. Демек, жүрдек көлік қозғалысты оңтайландыруға мүмкіндік бермек. Досаевтың пікірінше, қазір Алматыда бәрі керісінше. Яғни, автобустар мен троллейбустар көп. Есесіне, жүрдек қоғамдық көлік жоқ. Сол үшін мегаполисте жоғары технологиялы, жайлы жер үсті көлік жүйесін іске қосу маңызды. Әрі мұндай көліктердің сыйымдылығы көп, ал бағыт кестесі бекітілген соң жолаушылар үшін жету уақыты да қысқармақ. Сәйкесінше, ел уақыт үнемдейді.
ЕРБОЛАТ ДОСАЕВ, Алматы қаласының әкімі:
- Метро сызбасы мен оған баратын автобус бағыттарының кестесі біріктірілгеннен кейін жолаушылар үшін қоғамдық көлікпен жету уақыты айтарлықтай қысқарады. LRT сыйымдылығы мол әрі сапалы қоғамдық көлік болғандықтан жеке автокөлігімен қатынаушылар саны азаяды. Яғни, бұл жоба тұрғындардың өз автокөлігінен бас тартып, оған қарағанда тартымдырақ, қол жетімді, қауіпсіз көлік түріне ауысуына мүмкіндік береді.
НҰРБОЛАТ ЖАҢАБЕКҰЛЫ, тілші:
- Жоспарға сәйкес, жеңіл рельсті көлік желісі яғни, ЛРТ бұрын трамвай жолы болған Төле би көшесінің ортасынан өтпек.
Бірақ даңғыл бойындағы қозғалыс жолақтарының саны өзгеріссіз қалады деді әкімдік өкілдері. Десе де, жоба толық дайын болмағандықтан нақты құны, қанша көшені қиып өтетіні айтылған жоқ. Сондықтан, құрылыс жұмыстарының қашан басталып, қанша уақытқа созылары да белгісіз.
Нұрболат Жаңабекұлы, Информбюро
Бізді әлеуметтік желіде оқыңыздар:
KZitem - / @informburo31kanal
Facebook - / informburo31
Instagram - / informburo31
Vkontakte - vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31
Негізгі бет Алматыда LRT салынуы мүмкін! Жеңіл рельсті көлік желісі қалаға керек пе?
Пікірлер: 12