Жанашырлық, ынтызарлық, іңкәрлік!
Аждаһаның апанына сенен бұрын түссем деймін,
Қас дұшпанның берген уын сенен бұрын ішсем деймін.
Саған төнген ажал оғын қағып түсер қалқан болам,
Дүлей күштен сені қорғап, керек болса-талқандалам
Құрақ ұшып, қамқоршың боп жүрем сенің жағдайыңа
“Табаныңа батқан шөңге-кірсін менің маңдайыма!”
Көріп жүрсем дәйім сені жаздың жарқын таңдарынан,
Ғұмырыңды ұзақ қыл деп бір Аллаға жалбарынам.
Саған ғана берілгендік жан-жүйемді елжіретіп,
Саған мәңгі ұмтыламын жүрегімді желбіретіп.
Бірге жүрсек-мен жүрейін суық желдің өт жағында,
Бөлек жүрсек-мен кетейін қауіп қатер көп жағына.
Сенен бұрын мен тұтылсам жаудың құрған тұзағына,
Жол айрықта-төтемен кет, мен түсейін ұзағына.
Сенен бұрын мен қартайып, шашым мейлі ағарсыншы
Бірақ сенің күш-қуатың сарқылмасын, жаңарсыншы!
Жалғыз атым болса менің, саған мін деп ұсынамын,
Құдай маған қанат берсе, саған байлап ұшырамын.
Жалғыз тастап шаршатпаймын, қабатыма сені алдырам,
Көрер таңым көзбен атсын, бірақ сені дем алдырам.
Жоғарыдан орын беріп, отырайын сенен төмен,
Сен шуақта жүру үшін, мен кетейін көлеңкемен.
Апыл-тапыл мен жүрейін, сен аяқты басшы сәнмен,
Саған тәтті бұйырсын деп, мен татайын ащы дәмнен!
Сенің толық бостандығың үшін болсам еріксіздеу,
Сенің сұлу бейнеңді ашу үшін болсам көріксіздеу.
Саған мекен-әсем сарай, болсын менде сәулетсіздеу,
Сенде ризық мол болсын деп, мен болайын дәулетсіздеу,
Алтын балық менің емес, сенің қапсын қармағыңды,
Сен арманға жету үшін, мен тәрк еттім арманымды!
Қаласаң сен түн ортасы кезінде уақытсыз атсын таң,
Сен бақытты болу үшін, мен болайын бақытсыз жан!
Саған мәңгі өлмеу үшін өмірімді сыйлаймын мен,
Бірақ, жалғыз сұм тірлікте қалдыруға қимаймын мен.
Жанашырлық, ынтызарлық, іңкәрлікті берді кімге,
Сол жандарға рахым етер сенем құдірет кеңдігіне!
Бөрғазының Өскені
___
#махаббат #сүйіктім #неке #ислам #еркек #әйел #күйеу #салихалыжар #отбасы #бала #қыз #әке #анашым #мұсылман #құран #сүннет #сезім #жүрек
Негізгі бет Жанашырлық, ынтызарлық, іңкәрлік! Бөрғазының Өскені оқыған Айбек Созақбай Darsteller Aibek Sozaqbai
Пікірлер: 38