Мәжіліс депутаттары діни радикализм мен теріс ағымдарға тыйым салуды ұсынады. Пікірлерінше, дінді жамылған жат ағым өкілдері ілік іздеп, ел ішіне іріткі салып, мемлекеттің тұтастығына қауіп төндіре бастаған. Ал белгілі әнші, айтыскер, спортшылар әріптестері мен жанкүйерлерін қатарларына қосуға тырысады. Салдарынан, мыңдаған жас «қазақтығынан айнып» ел үшін қатерлі күшке айналған. Сондықтан, дінге, тілге қарсы елбұзар теріс ағымдардың бәріне тосқауыл қойылуы тиіс дейді депутаттар.
Мәжіліс депутаттары діни радикализм мен жат ағымдарға қарсы күреске мықтап кіріскелі отырған секілді. Себебі, бүгін бір емес, бірнеше депутат дәл осы дін тақырыбына қатысты сауал жолдап отыр. Мәселен, Ермұрат Бәпи тіпті биліктегі лауазымды тұлғалар мен депутаттар да қоғамға салафизм мен арабизацияны енгізуге тырысқан деп отыр. Әрі, соңғы жылдары дінді жамылған теріс ағымдар ел ішіне іріткі салып, мемлекеттік тұтастыққа қауіп төндіре бастапты. Сол арқылы қазақы таным мен ұлттық дәстүрге қарсы шабуыл жасамақ. Демек, теріс діни үрдіс саяси сипат алуы мүмкін деді Бәпи мырза.
ЕРМҰРАТ БӘПИ, ҚР Парламенті мәжілісінің депутаты:
- Бұл исламдық секта өңірлердің шағын бизнесін, әсіресе базар саудасы төңірегін уахабшылар - салафизмге табынушылар басып барады. Яғни бұл теріс сектаның дамуына кеңінен мүмкіндік беріп, жан-жақты жағдай жасап отырған жергілікті билік өкілдері бар деген сөз. Жасыратыны жоқ, уақытында елге танымал азаматтар, оның ішінде депутаттар да қоғамға салафизм мен арабизацияны енгізуге тырысты.
Ал Қазыбек Иса кейбір өнер адамдары мен спортшылар да дінді жамылып, жат ағымға жұртты жаппай тартып жатыр деп санайды. Пікірінше, діни дүниетанымы теріс кісілер елді екіге бөліп, мыңдаған жастың санасын улап отыр. Тіпті, елге қауіп төндірер күшке айналдырмақ. Сондықтан, дінге, тілге қарсы елбұзар теріс ағымдардың бәріне заңмен тосқауыл қойылуы тиіс екен.
ҚАЗЫБЕК ИСА, ҚР Парламенті мәжілісінің депутаты:
- Қазір шет елге барып, күмәнді оқуларда бірер ай оқып келген теріс ағымды «ұстаздар» осы ұлыларымыздан ақылы асып, тасып келгендер ме? Қазір ән әлемінде, айтыста, спортта да тайраңдап жүрген жат ағымның өкілдері дінді жамылып алып, әріптестері мен олардың әнсүйер, жанкүйерлеріне өз «салттарын» кіргізіп жатыр.
АМАНЖОЛ ӘЛТАЙ, ҚР Парламенті мәжілісінің депутаты:
- Әсіресе, жастарды соқыр фанатизмге, радикализмге итермелейтін жат ағымдардың қатары күн санап артып келеді. Бұл тәуелсіздігіміз бен тұтастығымызға төнген қауіп. Қасиетті домбырамыздан бастап, шашу, тұсау кесу, беташар мен сәлем салу сияқты дәстүріміздің барлығын «харам» деп ата жолымыздан адастыруға тырысып, тамырымызға балта шабуда.
Депутат қазір қоғам намаз оқитын, оқымайтын, хиджаб киетін, кимейтін боп бөлініп кеткенін айтады. Ал мемлекет күн өткізбей осы мәселені шешуге күш салмаса, бәрі кеш болуы мүмкін екен. Сондықтан, парламенттегі ең ірі партия өкілдері де «діни фанатизмге» қарсы заң қабылдап, ұлттық құндылықтарды менсінбейтіндерді жөнге келтіруге әзір.
Бізді әлеуметтік желіде оқыңыздар:
Информбюро 31 / @informburo31kanal
Informburo kz / @informburokz2022
Facebook - / informburo31
Instagram - / informburo31
Vkontakte - vk.com/informburo31
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал
Негізгі бет Жат ағымның «ұстаздары» халықтың салт-дәстүрін харам санап, ел арасына іріткі салуда
Пікірлер: 971