Атырау облысы Мақат ауданында соңғы 5 жылда ауыл шаруашылығы айтарлықтай дамыды. Мемлекет көмегіне сүйенген шаруалар мал басын көбейтіп, өнімін өңдеуді қолға алмақ.
Өңірде енді айран-сүт, еттен гөрі шұжық, ірімшік секілді өңделген өнім өтімді. Осыны ескерген шаруалар өндіруші саланы өңдеуші кешенге айналдыруды жоспарлауда.
Шұбаты шипа, еті дауа саналатын түйе өніміне қашан да сұраныс жоғары.
Ал ұқсата білсе, таза түйе жүні Еуропа елдерінде алтынға бағаланады екен. Бәйгетөбе ауылындағы шаруа қожалығы осы киелі түліктің 25 жылдан бері игілігін көріп келеді. Мұнда түркіменнің аруанасы мен қазақы інгендер сауылады. Сүт пен шұбат ауылдың ғана емес, ауданның қажетін өтеуде.
Шаризат Жұмағалиева, сауыншы
-Шаруашылығымыз осы. Күнделікті аңертең 30, кешке 30 түйе сауамыз. Соның арқасында күнделікті өзіміздің шаруашылығымызды өркендетіп жатырмыз. Қала берді арасында бие де сауамыз.
1991 жылы 2 түйе 30 қоймен бизнес бастаған қожалықта қазір 700 бас асыл тұқымды қой, 300-дей жылқы, 100-ден астам түйе бар. 50-ге тарта адам жұмыспен қамтылған. Істің тетігін тауып, бизнестің бағытын анықтап алған шаруагер енді мал өнімдерін өңдеуді қолға алмақ.
Төлесін Мұқанов, шаруа қожалығының жетекшісі
-Тек малды өсіру емес осы малдың сүтін, қымызын қалбырға салып, етін шұжық қылып шығарғым келеді. Бірақ соған аз да болса Үкіметтен, мемлекеттен қаржы алғым келеді. Әрі қарай осы шаруашылығымды жалғастырамын.
Негізінен мұнай-газ өнеркәсібіне маманданған Мақат ауданында ауыл шаруашылығын өркендетуге де мүмкіндік мол.
Себебі табиғи таза өнімге сұраныс жыл санап артып келеді. Былтыр 26 жеке тұлға 216,9 млн теңге шағын несие алып, жеке іс бастаған болатын.
Нәтижесінде, ауданда 7 шаруа қожалығы мен 1 жылыжай тұрақты өнім беріп тұр. Келер жылға ауыл шаруашылығына арналған тағы 4 жоба жүзеге аспақ.
Авторлары: Арыстанбек Кенже, Темірлан Сұлтанғазиев
Негізгі бет Атырау облысында ауыл шаруашылығы айтарлықтай дамып келеді
Пікірлер: 10