Azərbaycan reallaşdırdığı düzgün və praqmatik siyasət nəticəsində Cənubi Qafqazda həm qərb, həm şərq, həm də şimal üçün etibarlı, tərəfsiz ölkə sayılır. NATO Baş katibi Yens Stoltenberqin 17 mart tarixində Bakıya ilk səfəri də bunu bir daha təsdiqləyir. Qeyd edək ki, Baş katib Cənubi Qafqaza səfərini məhz Azərbaycandan başlayıb.
Baş katibin Prezident İlham Əliyevlə görüşü zamanı Ermənistanla sülh sazişinin bağlanması diqqət mərkəzində olub. Dövlət başçısı Ermənistanla bu istiqamətdə 7 dəfə görüş keçirildiyini vurğulayıb. O, Azərbaycanın sülhməramlı addımlar atdığını qonağın diqqətinə bir daha çatdırıb. Yens Stoltenberq də sülh cəhdlərini alqışladıqlarını bildirib. Dövlət başçısı ilə Baş katibin açıqlamalarında Azərbaycanın regional məsələlərə NATO ilə eyni mövqedən yanaşdığı bir daha isbat olundu. Prezident Avropanın enerji təhlükəsizliyində ölkəmizin oynadığı rolu da Baş katiblə müzakirə edib. Brüsseldəki son görüşlərindən sonra qaz təchizatı baxımından NATO-ya üzv daha 2 dövlətin Azərbaycanın tərəfdaşı olduğunu vurğulayıb.
Qarşıdakı illərdə bu istiqamətdə tərəfdaşlarının sayının artacağını qeyd edən Prezident: “Avropa Komissiyası Azərbaycanı etibarlı tərəfdaş və ümumavropa qaz təchizatçısı adlandırır. Bu isə həm böyük üstünlük, həm də böyük məsuliyyətdir” -deyə əlavə edib. Dövlət başçısı bununla ərazi bütövlüyümüzün bərpası istiqamətində atdığımız addımların Ermənistanın havadarları tərəfindən təhrif edilməsini, Avropa Parlamentin bu günlərdə qəbul etdiyi anti-Azərbaycan qətnaməyə də eyham vuraraq bu qurumun heç bir məsuliyyət daşımadığını, bu səbəbdən də Azərbaycana qarşı çıxışlar və qəbul edilən sənədləri ilə qərəzli olduqlarını çatdırıb. NATO həm də dünyanın ətraf mühit problemlərinə diqqət edən beynəlxalq təşkilat olduğu üçün Yens Stoltenberq COP29-un Bakıda keçiriləcəyini də alqışlayıb.
Regional səfəri çərçi¬vəsində Stoltenberq martın 18-də Müdafiə naziri Zakir Həsənov və Xa¬rici İşlər naziri Ceyhun Bayramovla da danı¬şıqlar aparıb.
NATO-nun Baş katibi martın 18-də Azərbaycan Dövlət İnformasiya Agentliyinə müsahibəsində Azərbaycanın NATO üçün vacib və dəyərli tərəfdaş olduğunu bildirdi. Baş katib uzun illər bir sıra müxtəlif məsələlərdə Azərbaycanla əməkdaşlıq edən NATO-nun hal-hazırda əməkdaşlığı daha da inkişaf etdirməyin yolları üzərində işlədiyini qeyd edib.
Müstəqil xarici siyasət kursu reallaşdıran Azərbaycan ikili standartlara rəğmən bu gün Qərb üçün arzuolunan tərəfdaşdır. Bu baxımdan NATO Baş katibinin Azərbaycan səfəri tərəflər arasında qarşılıqlı fəaliyyəti inkişaf etdirəcək, əməkdaşlığın çoxşaxəli tərəqqisinə imkan yaradacaq, Azərbaycan-NATO münasibətlərinin keyfiyyətcə yeni mərhələyə qədəm qoymasına təkan verəcək. Bütün bunlar Azərbaycan və NATO qüvvələrini bir-birinə daha da yaxınlaşdıracaq və bu, hər iki tərəf üçün faydalı olacaq.
Негізгі бет Azərbaycan-NATO əlaqələrində yeni dövr
Пікірлер: 4