أهلا بيكم ي شباب ، وحشتوني جدا ، اسف على الغياب الطويل اللي استمر لاكتر من ست شهور ، غيابي دا كان لسببين ، الاول فيهم إن الحمدلله كنت بخلص جامعة وخلاص خلصت واتخرجت
والسبب التاني هو اني كنت محتاج اخد وقت كافي إني اطور من نفسي في البرمجة واتعلم أفضل واحسن من مهاراتي ولإن اليوتيوب بيحتاج وقت كبير في ترتيب الافكار وكتابة اسكريب ومونتاج ، فأنا اخدت قرار اني اوقف خالص اليوتيوب وابدأ اشتغل على نفسي ،
وطبعا انت جاي او داخل الفديو شايف الثامنيل او صورة المقطع وهتبقى مصدوم لو انت تعرفني، او لو انت لسه متعرفنيش ف انت داخل عندك فضول تعرف انا ازاي اكتشفت ان البرمجة مش ليا ، بس حابب اقولك إن نظرا للمعطيات والمجهود وكمية التعب في سبيل اني اتعلمها واتقانها فأنا باقولك البرمجة لحد الان فهي ليا عادي لكن مش للجميع ،
هتقولي لأ ياعم مين قالك كدا البرمجة للجميع ، وانا هقولك لأ مش للجميع
ياعم ليه بس الاحباط دا ما تسيب الناس تاخد فرصتها
هقولك فعلا الفرصة للجميع لكن البرمجة مش للجميع
طب وهو حضرتك واصي على البرمجة
لا ده إقرار واقع مش اكتر .. اللى عايز يعمل حاجة يعملها انا مش واصي على حد والموضوع بسيط .. المجال مفتوح للى يقدر عليه .. بس مش كل الناس هتقدر عليه
طب ومين اللى هيحدد اللى يقدر واللى مش هيقدر
اللى بيحاول يتعلم بذات نفسه .. مش حد غيره .. ولا انا ولاانت اللى هنحدد .. بالعكس احنا لو نقدر نساعد اللى بيحاول هنساعده اياً كان هو مين وجاي منين
ايوا بسسس
مابسش .. فى ناس هتحاول تتعلم برمجة ومش هتكمل .. وفى ناس هتبقى متخرجة من جامعة متخصصة فى البرمجة ومش هتكمل فى المجال .. وده هيبقى قرارهم هم مش قرارنا احنا
وهو مين ده اللى هيقرر انه يفشل؟
مش فشل .. عادي جداً تجرب حاجة وتكتشف انها مش بتاعتك .. انك مش عايز تقضى باقى عمرك فيها .. حتى لو فالح فيها .. مش لازم تبقى فاشل علشان تاخد القرار ده.. وعادي برضه ان ناس تحاول تتعلمها وماتعرفش تتعلمها .. ما احنا كلنا مش زي بعض .. واللى معرفش يتعلمها ده ممكن يبقى شاطر جداً فى مجال تاني .. ومافيش اى عيب فى دماغه
بس احنا المفروض نشجع الناس ونقولهم يتعبوا ويقعوا ويقوموا ويكملوا مش نقولهم انك ممكن ماتنفعش! ده كلام يجيب احباط
يجيب احباط للي مبيفهمش ..!!
شوف .. اللى بيتعب علشان عايز يبقى مبرمج بجد وواخد القرار ومصم عليه ده اللى نقوله لما تقع قوم وكمل .. اما اللى مجرد حب انه يجرب من باب انها حاجة شكلها من برة سهل ولقى نفسه مش سالك .. فده عادي يتقاله ان البرمجة مش للجميع .. لما تبقى متأكد انك عايز تبقى مبرمج ابقى تعالى نقولك كلام تاني
بس البرمجة سهلة على فكرة
السهلة دي تبقى مش البرمجة .. ولو حد هيبطل تعليم البرمجة لما يعرف انها مش سهلة فده بنى ادم واضح مع نفسه
علشان شغل البرمجة مش مناسب ليهم. الموضوع ببساطة كده.
خليني اسألك سؤال...
"انت بتشتغل ايه؟"
تخيل انك بترد وتقولي "أنا مندوب مبيعات في شركة XY"
دلوقتي أنا هقولك "طب ليه انت مندوب مبيعات ومش لاعب كرة محترف؟"
هترد تقولي حاجة من اتنين:
• الاول هبقى لاعب محترف في يوم من الأيام، دي فترة مؤقتة بس لحد ما أتدرب وأخد وقت كافي في الملعب.
• لأني جربتها مرة وطلعت وحش فيها وكرهتها.
تطوير البرمجيات او البرمجة، زي أي مهنة ، مفيش مختلف.
للأسف، في ناس كتير اليومين دول فاكرين إن البرمجة حاجة سهلة تقدر تتعلمها وتشتغل بيها زي القراءة والكتابة.
السوشيال ميديا هي السبب في الفكرة دي.
تطوير البرمجيات مهنة صعبة ومحتاجة مهارات، مش فسحة،.
أنا، زي كتير من المبرمجين، بتعلم البرمجة وبشتغل فيها ، وبدأت مش عشان كنت مضطر أو عشان المرتبات كانت مغرية، بدأت عشان الموضوع كان بيهمني.
بدأت أشتغل في ده لأني مخي مهيأ للشغلانة دي، وكنت هزهق لو عملت أي حاجة تانية.
بحب أحل التحديات ، بحب أكتشف معلومات برمجيه جديده عليا وأحاول أطبقها.
وانا مش بتكلم على تحديات او مشاكل زي "أي سلك هو الصح، الأحمر ولا الأزرق"، هنا انت عندك اختيار صح واختيار غلط
أنا بتكلم عن مشاكل الحل ممكن يرجعك 12 خطوة قبل ما تتقدم خطوة واحدة. لازم تكون قادر تفكر وتتصور عملية منطقية بـ20 طريقة مختلفة في نفس الوقت، وأنت لسة بتحاول بأفضل جهدك عشان تختبرها. ده مش نوع تفكير سهل واي انسان يقدر يفكر بيه، ومش حاجة تقدر تتعلمها ببساطة من قراءة كتاب أو مشاهدة فيديو او كورس
ناس كتير بيفشلوا، ببساطة لأنهم فاكرين إن عندهم ما يكفي، وإن الموضوع سهل، وإنهم ممكن يشتغلوا قليل ويكسبوا مرتب مكون من 6 أرقام في وقت اقصر وقت.
بعد سنة تقريبًا، هيكتشفوا بالطريقة الصعبة إن الموضوع مش زي ما تخيلوا
وربنا يوفقنا جميعا
معاكم محمد من قناة كود جن..
Негізгі бет بعد 150 يوم .. اكتشفت إن البرمجة ليست لي
Пікірлер: 27