大家好,《俾我兩分鐘》。我哋成日話要解決 #劏房 、 #籠屋 問題,到底住喺劏房有幾惡劣?最近我接受 #點新聞 挑戰,進行咗一場「兩日一夜劏房體驗」,由執紙皮、買餸、煮飯、洗衫,再到喺劏房住一晚;「體驗」完成後,我最強烈嘅感覺就係,政府官員都應該去劏房住下、感受下,相信只要佢哋住過劏房,就會明白土地房屋問題,絕對需要馬上解決。
講返今次「體驗」,為咗對基層生活有更深刻嘅體驗,我入住劏房前做咗兩件事,第一係執紙皮,第二就係去街市買餸。平時,相信大家見到有人執紙皮都會覺得辛苦,而我親身嘗試後,只能講一句「盡在不言中」,要做體力勞動,我預咗;但我無諗過,原來我執咗一段時間紙皮,結果紙皮價值係連一蚊都無。可以想像得到,如果基層市民要靠執紙皮維生,情況係如何艱辛。
之後到買餸時間,我大約用咗十蚊買蕃茄、雞蛋同少少菜,去到記者朋友幫我搵嘅劏房後,發現原來喺狹窄環境、有限工具下煮食殊不簡單。再之後就係洗衫時間,我當日自己其實都只係用手洗一件衫,如果要我好似一個在職媽媽咁每日返工之後,買餸、煮飯再用手洗全家人嘅衫,相信難以長期應付。
最後,到咗晚上休息時間,可能因為我當日太累,所以總算瞓得可以。經過呢次劏房體驗,我就諗喺香港呢個 #國際都會 ,竟然有超過22萬人住喺劏房,係咪我哋嘅土地、房屋以至 #扶貧 政策出現問題呢?
根據「劏房」租務管制研究工作小組報告,劏房戶人均居住面積中位數大約為70平方呎、有16%嘅劏房戶係15歲以下,我哋忍心要小孩、青少年喺環境欠佳嘅劏房成長?有人理所當然地認為香港「無問題」,但其實香港最大問題,包括官員嘅問題,就係自己OK,就覺得貧窮、房屋問題「唔駛急」;香港要改變,房屋要解決,呢一種「離地思維」就要立即糾正。
Негізгі бет 《俾我兩分鐘》劏房大作戰特別版- 當我人在劏房時
Пікірлер: 152