Dili na kapugngan
Ni Neptalie Batolenio
Dili naman gyud diay kapugngan ang imong pagpahilayo,
Dili naman gyud diay mahimo nga sa mga bukton ko ikaw bilanggoon;
Dili naman gyud diay ikaw mahimong sa kalipay ikasalo,
Kay sa dapit nga walay nakatul-tol ikaw moadto na didto.
Kaingon ko ba nga sa pagbidlisiw sa adlaw sa kiliran anaa ikaw,
Apan sa akoang paglingi daw aso ka nga nahanaw;
Wala ako magdahom nga igo na lang ako sa paghandom,
Sa imong mga talidhay, katawa ug mga pahiyom.
Dili diay tinuod kadtong imong mga pasalig nganhi kanako,
Nga sa pagsalop sa adlaw dungan nato kining sud-ongon;
Asa naman diay kadtong imong gisugilon;
Nga sa kalipay ug kasakit ikaw kanako mounong.
Bakak diay kadtong imong mga patalingahaga,
Nga bisan ang makusog nga bagyo kanato dili makaulang;
Matud mo bisan sa daklit lang dili mo ako biyaan,
Apan ngano man kini karon nga mopahilayo ka naman?
Igo lang ako nga nakatagpilaw sa pipila ka gutlo,
Ug sa akong pagmata nag-anam ka na og pahilayo;
Buot kung pungan ang imong pagpanaw,
Apan mipahiyom ka lang ug miingon: “Ayaw…”
Tinguha kung lisuon ang taknaan,
Ug ibalik ang mga panahon;
Nga kita nagmalipayon,
Apan daw dili ka mouyon, basi sa imong hilaw nga pahiyom.
Kay dili ko na man gyud kapugngan ang imong pagbiya,
Ang atong mga kagahapon palihog, balona;
Ang kalipay ta nga dili kabayran sa salapi ug pilak,
Ug lakaw na ug biyae ako nga nagbakho-naghilak.
Негізгі бет BALAK-DILI NA KAPUGNGAN
Пікірлер