Павлодар іргесіндегі Ленин кентіне қоныстанған қандастар кері қайтпақ. 13 отбасы осыдан алты жыл бұрын өздеріне "қандас мәртебесіне" сай берілген үйлерін жекешелендіруге ақша таппай отырғандарын айтады. Сөздерінше, жергілікті билік бұл үйлерді басында жалдап тұрасыздар, кейін өз аттарыңызға аударуға көмектесеміз деп уәде берген. Енді сол сөздерінен жалтарып, баспаналардың әрқайсысын 6 миллион теңгеден сатпақ дейді.
Айбын Құрман атажұртқа Қытайдан көшіп келген. Ленин кентін қалаға жақын, әрі мал ұстауға қолайлы болғандықтан таңдапты. Осындағы баспананың бірін жалға алып, бес жылдан бері ай сайын 6 мың теңгеден төлеп келгенін айтады. Енді міне сол үйді жекешелендірейін десе, әкімдіктегілер "сатып алыңдар" деп талап қойған екен.
АЙБЫН ҚҰРМАН, Тұрғын:
- 5 800 000 мың ақша сұралып отыр. Ең болмағанда бізге жеңілдетілген тәртіппен берсе. Жарайды, тегін дегенді қазір ешкім мойындамай отыр. Үкіметке біз салмақ салмай-ақ қояйық. Біз Қазақстанға келіп, үкіметке масыл болайық, тегін дүние алайық деп келгеніміз жоқ.
Ленин кентінде шеттен келген қандастарға арналып 2013 жылы «Еңбек» мемлекеттік бағдарламасымен жалпы саны 60 үй салынған болатын. Бірақ, көп ұзамай баспаналардың қабырғалары жарылып, едені опырыла бастапты. Төрт жыл қаңырап бос тұрған үйлерге 2017 жылы сыртқы көш бағдарламасымен басқа қандастар қоныстанған. Солардың бірі Орал Әлиұлы. Ол өз қалтасынан 1,5 миллион теңге шығарып, сол бүлінген баспанаға күрделі жөндеу жасап, қора-қопсы салғанын айтады.
ОРАЛ ӘЛИҰЛЫ, Тұрғын:
- Үкімет шетелден көшіп келген қандастарға тегін беріледі деген бағдарлама бар деп көрсеткен. Көші-қондада өз ауыздарымен айтқан. Бірақ қазір мойындамай отыр. + Сол кезде бізге сол сөзді айтпаса, бес жылдан кейін тегін береміз деген. Біз өзіміздің жанымызды бағып, жұмысымызды істеп кететін едік.
Ал әкімдік қызметкерлері "қандастарға үй тегін беріледі" деген сөз мүлдем айтылған жоқ дейді. Сөздерінше, баспананы кем дегенде 5 жыл тұрған жағдайда қалдық құны бойынша сатып алуға мүмкіндік бар.
АМАНБЕК ҰНАТҰЛЫ, Павлодар қаласы жұмыспен қамту және әлеуметтік бағдарламалар бөлімінің сектор меңгерушісі:
- Бес жыл толған жағдайда жекешелендіретін болса, бірінші жарнасы 30 пайызын құятын болса, қалған 70 пайызы ешқандай процентсіз 10 жылда төлеп шығуға мүмкіндіктері бар. Яғни, тұрғын үй қатынастары заңына сәйкес, 10 санаттағы азаматтар осы үйді тегін алуға мүмкіндіктері бар. Бірақ өкінішке қарай, қандастар бұл санатта көзделмеген.
Ал "алдандық" деген қандастар енді бұл жерде тұрғысы жоқ. Қосымша құрылыс пен жөндеу жұмыстарына кеткен шығынымызды өтеп берсе, бірден басқа жаққа қоныс аударамыз дейді.
Зұлқарнай Ермұратұлы, Досымбек Тоқай
Бізді әлеуметтік желіде оқыңыздар:
KZitem - / @informburo31kanal
Facebook - / informburo31
Instagram - / informburo31
Vkontakte - vk.com/informb...
TikTok - www.tiktok.com/@informburo31
WhatsApp Информбюро +7 777 331 31 31
#қандастар #көмек #баспана
Негізгі бет «Биліктің сөзіне алданып қалдық». Моңғолия, Өзбекстаннан келген қандастар енді кері қайтпақ
Пікірлер: 132