حبيب الرب يسكن لديه آمناً يستره طول النهار وبين منكبيه يسكن .. كلنا نأخذ لقب حبيب ربنا وكلنا نأخذ هذا اللقب في العهد الجديد لا أعود اسميكم عبيد بل أحباء.. كان البابا كيرلس يقول للناس يا حبيب أبوك.. حبيب ربنا ده لقب جميل يلقب بيه كل مسيحي انت حبيب ربنا.. يسكن لديه آمنا دايما ساكن في أمان.. بين منكبيه يسكن دايماً متعلق في رقبته.. زي طفل صغير على كتفه.. في آية بتقول بالنهار يوصي الرب رحمته يعني ربنا موصي الرحمة عليا طول النهار.. يعني الواحد يبقى ماشي ملخبط انما ربنا متوصي بيه ملاحقة بالرحمة والستر..
كلمة الستر احنا مش بنركز فيها مع اننا كل يوم نقولها في صلاة الشكر لأنه سترنا..
الستر من المصائب ممكن تيجي مصايب في لحظة مالهاش ميعاد لكن كتير عدت أيام على خير حسيت ان ربنا ساتر عليك؟ الأيام اللي بتعدي على خير مش عادي ده ستر من ربنا.. الستر من الحوادث عدى اليوم على خير عليك..
المزمور يقول يسقط على يسارك ألوف وعلى يمينك ربوات بل بعينيك تتأمل دي ناقصانا احنا مش بناخد بالنا ليه ان احنا مستورين ليه بتقول اشكرك لأنك سترتنا مش من قلبك
من جميع الشدائد نجيتني ممكن واحد يقول ربنا ما بيمنعش ان تحصل حاجة وحشة أو حتى الموت ربنا ممكن يسمح بحاجة توجعك لكن مش ممكن حاجة تضيع أبديتك أو تضيع خلاصك لا يمكن يسمح بكده ربنا..
الستر من الخطايا ربنا بيستر عليك عشان ما تغلطش ربنا لو رفع ايده ممكن نعمل خطايا أضعاف اللي بنعملها ساعات نحس ان احنا اتحسنا لكن الحقيقة ان ربنا حاطط ايده عشان ما نغلطش لو رفع ايده هتلخبط وتغلط ربنا يمكن رفع إيده عن داود ليلة بسبب كبرياء ليلة عمل فيها كل الخطايا اللي معملهاش طول حياته زنى وعش ومؤامرات وكذب وقتل.. الواحد لما يعدي اليوم على خير بأقل خطايا يقول اشكرك لأنك سترتني من خطيتي آنا عارف انك لو سيبتني كنت غضبت وأدنت واخدت قرارات غلط .. في حد يعدي شبابه مستور من الشهوات طيب بتشكر ان ربنا ستر عليك من شهوة ردية مالية الدنيا ولا لما تسمع عن الناس اللي بتغلط بتدين انت لولا ستر ربنا كنت عملت اكتر من كده..
الستر في ان يوم ما تغلط يستر عليك في ان الناس ما تاخدش بالها ساعات يطلع كلام وحش وتصرفات غلط وافكار شريرة لكن ربنا يستر عليك في ان الناس ما تاخدش بالها.. فتبان قدام الناس انك انسان كويس ما بتغلطش لسانك عفيف اعمالك تقية واللي جواك مستور طول النهار ربنا عمال يحلق علينا ويستر يخبي احسن حد ياخد باله تقول كلمة زيادة يلمها عشان ما تعملش مشكلة تسرح في افكار غلط يلمه احسن حد ياخد باله بيلم ورا ولاده زي تعبير اللي قاله المسيح عن الستر كام مرة اردت ان اجمع اولادك كما تجمع الدجاجة فراخها تحت جناحيها الكتاكيت تستخبي تحت الجناح..
يقول المزمور لأنه اخفاني في خيمته في يوم شدتي سترني في ستر مظلته.. سترني لأني كان ممكن اغلط لكن أنا ما غلطش.. مجرد اصرخ إليك الاقيك تستر عليّ
ويقول المزمور احفظني يارب لأني عليك توكلت قلت للرب انت ربي لا تحتاج إلى صلاحي.. تعبير جميل في صلاة باكر مش معناه اني هبطل امشي صح لكن عايز يقول يارب ما تستناش اني ابقى كويس انت مش محتاج اني اكون كويس عمري ما هكون كويس فاستر حتى لو انا وحش انا متكل عليك يارب مش عشان أنا كويس لأنك انت كويس امسك في وعد ربنا حبيب الرب يسكن لديه آمناً..
Негізгі бет بتستر عليّ حتى وانا وحش - يستره طول النهار تأمل أبونا داود لمعي
Пікірлер: 18