Izlan nna imyana Ccix Ɛmer d Ccix UƐESTA g useggas n 1954 g iɣrem n Igelmimen, awyen-ten-d ɣef ugru d ugḍid :
Inna-as Ccix Σmer :
Waxxa txater tiddi, tellid g uqecmir !
A ʸ agḍid n ɛari, ɛenda-k d usemmiḍ !
Iwajeb-as Ccix UΣESTA, ar as-ittini :
Wa han diɣ ṭṭir, ass nnag yuyella
Ammas n uqecmir, izrey-ak-d asemmiḍ !
Irar-as Ccix Σmer, inna-as :
Meqqar yuyella s igenna, ig-as lxir,
Adday tuḥeld, a ṭṭir, iɛayed aqecmir !
Iɛawed Ccix UΣESTA inna-as :
Han afriwen ɣur-i, keyy ayd itteddun,
A ʸ agru, xef wakal ! Ur i-igi Rebbi !
Iwajeb-as Ccix Σmer, ar as-ittini :
Keyy aymi ixxa rray, mek ur da tessad !
Ma ʸ agru, issara-k, a ʸ amda, s uḍar !
Iwajeb-as Ccix UΣESTA, ar as-ittini :
A ʸ agru, ṣber adday nḥuder ar asif,
Ad ur tteggʷedd idd a’ neccur g isenḍiw !
Inna-as Ccix Σmer :
Ggʷdeɣ a’ k-yawi wasif, a ʸ agḍid, teɛmid !
Ma ʸ agru iẓra-t ! Issen mayd ittekka !
Iwajeb-as Ccix UΣESTA, inna-as :
Reɛb ay k-uqqerɣ ! Allig ur i-tgid rray,
A ʸ agru, mek di-teffeɣd amda, nasi-k !
Irar-as Ccix Σmer, ar as-ittini :
Hat iḥḍa ugru ṭṭir ! Adday di-iddu,
Iɛayed i umda, nnag ur idrik aḍu !
Inna-as Ccix UΣESTA :
Hat idda-d ṭṭir, aɣen-d ir g ur ixuf !
Mek as-yuweḍ wass, iffeɣ-d amda, yasi-t !
Iwajeb-as Ccix Σmer, inna-as :
Neɣ ismar ttijal, a ʸ agḍid, teɛmud,
Ttcin-k imedwan, injem ugru, netta !
Негізгі бет CCIX ƐMER D CCIX UƐESTA : Izlan ɣef ugru d ugḍid. (1954)
Пікірлер: 5