İşdir, bir gün, uçsam əgər,
Sevgim qalsın sənə, dünya!
Qədərindən küsüb getsəm,
Borcun qalsın mənə, dünya!
Mən torpağam,
Torpaq üçün tələsməyin!
Qoyun bir az hava alım,
Sizdə bir az artıq qalım,
Rahat-rahat vidalaşım!
Sevgilimin göz yaşları
Yusun məni aram-aram
Təntiməyin, tələsməyin,
Qəbir qazan, torpaq atan,
Tələsmədən, aram-aram
Mən torpağam,
Torpaq üçün tələsməyin!
Əməllərim kəfən olsun,
Arzularım ehsan versin,
Baş ucumda yaxın uzaq
Doyunca qoy, söhbətləşsin!
Qara torpaq yerindədir,
Basdırmağa tələsməyin!
Tələsmişəm ömrü boyu,
Yaşam üçün, ölüm öçün,
Yetişdimsə mən ölümə,
İmkan verin nəfəs dərim,
Səssiz olun, səs salmayın,
Yatım bir az ölü kimi,
Mən torpağam,
torpaq üçün tələsməyin!
Toxunmağa çəkinməyin,
Ruhum təmiz, cismim təmiz,
Qucaqlayın, əzizlərim,
Ağlamsının səs-səmirsiz!
Layla deyin, ağı deyin,
Tələsməyin basdırmağa!
Torpaq üzü soyuq olur,
İsti qalın, soyumayın,
Çox görməyin o anları
Ayrılmağa tələsməyin,
Qədrin bilin son anların!
İşdir, bir gün ölsəm əgər…
Basdırmağa tələsməyin!
Nehrəm. 2023.11.09
Şəmil Sadiq
Негізгі бет İşdir, bir gün ölsəm…
Пікірлер: 2