ዕላል ምስ ሃገረይ!
ኣብ ተምሳጥ ዕላል ምስታ ፍቅራ ረዚን, ባህገይ ስፍሓት ኣድማስ ዝኾነት ሃገረይ እንክጅምር ኣብ ቅድሚ ስእለ ኣእምሮይ እትመጽእ "ሃገረይ ንመን ተፍቅሪ" እትብል ደርፊ ዮሃንስ ወዲ ትካቦ እያ።
ወዲ ትካቦ ነቲ ፕረዚደንት ኣሜርካ ነበር "ጆን ኦፍ ኬኔዲ" "ሃገረይ እንታይ ጌራትለይ ዘይኮነስ ፡ እንታይ ጌረላ ክንብል ኣለና " ዝብል ኣብ ሓደ መደረ ኢልዎ ዝበሃል ዝያዳ ብዝተፈላለየ ኩርንዓት ሃገርና እንታይ ክንገብረላ ከምዘለናን። ሃገረይ ብመንጽር ስእለ ሓሳብ እንታይ ከምእተፍቅር ከዘንትወለይ ብምኽኣሉ ዝያዳ ተምሳጥ ኣብዚ ደርፊ ይዓዘኒ።
ሃገረይ ብርግጽ እንታይ ከምእተፍቅር ካብ ምሕሳብ ዓዲ ውዒለ ኣይፈልጥን። ኤረይ ክትብልጽግ, ክትዓቢ, ክትቅድም , ክትበርህ ,ክትዕወት ነየናይ ምስ ኣፍቅረት ምስ ኮነት ኮን ይኸውን? ንዝብል ሕቶይ ግን መልሲ ካብ ቀዳማይ መስመር ሕደማ እዛ ደርፊ እገይሽ ።
ኩሉ ይብህገኪ
ንስለኺ ኣሽሓት ይወድቁ
ሕቆፎኺ ብሂጎም ካብ ርሑቅ ይመጹ
ኣባኺ ይሞቁ
ሃገረይ ካብተን መግዛእቲ ብዙሓት ሃገራት ኣብ ርእሳ ሸይሸይ ዝበለላ ብዙሓት ዝበሃግዋ ተበሃጊት ብምንባራ ንስሌኣ ጠመጥታ ክሕግሕጉ ኣሽሓት በራውር ፍቅራ ሓቲትዎም ዓጽሞም ደሞም ረሃጾምን ከስኪሶም ኣማሚቆማ ፡ ኣሽሓታ ኪሌሜተራት ዝተጉዓዙ ከይተረፉ ንስለፍቅራ ናብ ከብዳ ተመሊሶም ኣብ ከርሳ ወደቁ። ሃገረይ ዘፍቀረቶ ገበሩ። ፍቅሪ ብልክዕ ኣብ ልክዕ ግዜ ፈጸሙላ ኤረይ ፍቅራ ንሱ ጥራሕ ዘይምኻኑ ግን ወዲ ትካቦ ይቅጽሎ.....
እቲ ንኡስ ከምቶም ፍቅሪ ሃገሮም ሓቲቶም መልሲ ዝረኸቡ እሞ ዝኸፈሉ ንሱ ዝኸፍሎ ዊንታኽን ባህግኽን ንገርኒ ኣነ ዝኽእሎ ብምባል ኣብ ህጻንነታ ሓተታ ። ሃገረይ ግን ንመንያ ተፍቅር? ንመንያ ዝያዳ ትሓሪ ? ንመንያ ዝያዳ ተፍቅሮ ? ነቲ ሓረስታይ በዓል ኣርዑትን ነዊትን , ነቲ ጠበቃ በዓል ፒሮን ወረቀትን ,ነቲ ሓኪም በዓል ጋውንን ፍልጠትን፡ ነቲ ወተሃደር ሓላው ኣፍ ደጊኣ በዓል ወሰናስን ብረትን ወይስ ነቲ በዓል ቀዳሳይ ሰጋዳይ በዓል ቁርኣንን ዳዊትን ሃገረይ ንመን ትደሊ ዝያዳ ? ንመን ትሓሪ?
ሃገረይ ኣበርክቶ ነፍሲ ወከፍ ዜግኣ ከምዘድልያ እዛ ንመልሲ ሕቶይ ኩሉ ግዜ እተድምቀለይ ደርፊ ወዲ ትካቦ ብምዉካስ ጥራሕ ብዙሓት ደቃ ኣብ ጽላላ ተድፊኦም ፍቅራ ክሓቱ እሓልሞ፡ ሃገረይ ነቶም ደቃ ካብ ጫፍ ንጫፍ ጻት ንጻት ከለልኣ ኣዋፊራ ፍቅራ ንዝሓተቶ ዋጋ ክኸፍሉ ኣብ ስእለ ኣእምሮይ ይመጽእ። ሃገረይ ንኩሎም ደቃ ከምእተፍቅሮም ኣብ ሕደማ እዚ ደርፊ እጸንሓኒ፡ ሃገረይ ነቲ ምሁር, ሓኪም, ቀሽን ሸኽን, ነቲ ወተሃደርን ኣኽባሪ ሕግን ነቲ መምህርን ተመራማርን ብሓደ ህርመት ትደልዮ ተፍቅሮ ትጽበዮ ኣብ ከርሳ ክዓዪ!
ሃገረይ ነቲ ተፍቅሮ ሎሚ ዝያዳ ካልእ እዋን ትብህጎ፡ ዝዓነወ ቁጠባ'ኣ ቀይሱ ዝፍውስ ክኢላ, ዝተበጃጀለ ውድቀት ህንጸታ ዳግም ዘሕድስ ኢንጅነር, ፍትሒ ከንግስ ህርዲግ ዝብል ክኢላ በዓል ሞያ ሕጊ, ዝጠፍአ መልክዕ ሓበሬታ ዘእንፍት ጋዜጠኛ, ዝተሰብረ መንፈሳ ብመዝሙር ፍቅርን ሰላምን ዕቤት ብልጽግናን ዝፍውስ ዘያማይን መዝሙር ውሽጣ ዘድሂ፡ ቃና ውሽጣ ዘፈልፍል ዘማራይን , ናብ መርሓ ዓቢ ጎዶና ጉዑዞኣ ዝመርሕ ነብሱ መሪሑ ህዝቡ ዝመርሕ መራሒ ሎሚ ትናፍቆ ትብህጎ ተፍቅሮ። ሃገረይ ሕልፊ ካልእ ሎሚ ጽምኢ ፍቅራ ዘርዊ, ደቃ ኣብ ሓደ መኣዲ ኣኪቡ ድኻማን ቃንዛኣን ዝድብስ ሎሚ ትብህጎን ተፍቅሮን። ሃገረይ ሎሚ ሕልፊ ካልእ እዋን ሎሚ ንፋስ ሓርነት ፈሽፈሽ ዘብል ዜጋታታ ኣብ እፎይታ ኣምጺኣ ሓበኖም ምኻና ዘርእዩላ ሎሚ ዝያዳ ትብህጎን ተፍቅሮን።
ሃገረይ ፍቅራ ዝያዳ እቲ ነቲ ሓደ ከይበለት ብማዕረ እትምልስ እያ። ሃገረይ ፍቅራ ስፍሓት ኣድማስ , ፍቅዳ ክንዲ ሑጻ ምድረበዳ, ዕምቆቱ ዕምቆት ዘይተዳህሰሰ ኣካል ትንግርተ ፔርሙዳ-ትርያንግል እዩ፡ ሃገረይ ፍቅራ ኣብ ደቃ ማዕረን ዘይልወጥን ዘይጥምዘዝን እዩ ፡ ሃገረይ ሪም ደቃ።
እቲ ተፍቅርዮ እየ ሃገረ!!!
writing & reading
😍Teclit kesete 😍
Негізгі бет Музыка DJ DESU-New Eritrean Music Cover\\Hagerey Wedi Tikabo//Covers ''Samiel Meles and Shewit Haile''
Пікірлер: 334