Chortoq tumanidagi 48-umumta’lim maktabida 1125 nafar o‘quvchiga 95 nafar ustoz-muallim saboq bermoqda.
Ilm maskanining bugungi olimlari e’tirofga loyiq. "Obod maktab" sifatida respublika tanlovi g‘olibi bo‘lgan, "Turon" jamoasi yoshlari yaqindagina "Turon" maktab teatri tanlovining tuman bosqichida mutlaq g‘olib bo‘lib, viloyat bosqichida ham muvaffaqiyatli ishtirok etgan maktabda adabiyotga e’tibor yuksak, shundan she’riyat ixlosmandlari bisyor.
Xalqona, samimiy satrlari bilan xalq qalbida barhayot "Xalq shoiri" Muhammad Yusuf tavalludining 70 yilligi munosabati bilan tashkil etilgan xotira kechasi ham shuning ifodasi sifatida yuksak ko‘tarinkilik bilan o‘tdi.
Til-adabiyot fani o‘vituvchilari, xususan, jonkuyar muallima Zulhumor Jo‘raboyeva tashabbusi bilan tashkil etilgan tadbirda o‘quvchilar shoir ijodidan namunalar o‘qib, qo‘shiq va raqslar ijro etdilar.
Katta adabiyot bayramiga aylanib ketgan ma’naviy anjumanda ishtirok etgan "Taraqqiyot mezoni" gazetasi bosh muharriri, jurnalist Isroil Yusupov Muhammad Yusuf ijodi, merosining adabiyotimiz, ma’naviy hayotimizdagi o‘rni va ahamiyatiga to‘xtalish barobarida shoir she’rlaridan o‘qidi.
"Maktabgacha va maktab ta’limi tahlilchisi" gazetasi bosh muharriri, viloyat maktabgacha va maktab ta’limi boshqarmasi axborot xizmati rahbari Saidolim Abdurahmonov adabiyot, she’riyat, xususan, Muhammad Yusuf ijodining yosh avlod kamolida beqiyos xazina ekanligini ta’kidladi. Uning ilmu ma’rifat, adabiyotga oshnolik o‘quvchilar qalbiga yuksak insoniy fazilatlarni jo etib, tafakkur olamini boyitishi haqidagi ta’kidlariga uyg‘un o‘z ijodidan tuhfalarini ishtirokchilar katta olqishlar bilan qarshi oldilar.
Respublika "Ma’naviyat va ma’rifat" markazi tuman bo‘linmasi bosh mutaxassisi Oydina Ibragimova, maktab direktori Nazira Hayitova ijodkorlarga minnatdorchilik bildirish barobarida ustozlar va o‘quvchilar mahoratini e’tirof etdilar.
O‘ziga xos chiqishlar, she’rxonlik, mushoira bilan davom etdi.
Негізгі бет EL QALBIDA YASHAYOTGAN XALQ SHOIRI EDI
Пікірлер: 2