Ресей нөмірімен жүрген көлік жүргізушілері бүгін Петропавлда да жиналды. Автомобильдерін көрші елден сатып алған тұрғындар темір тұлпарларын айыппұл тұрағынан шығарып беруін талап етеді. Сөздерінше, экономикалық тергеу департаментінің қызметкерлері тура жолда тоқтатып, көліктерін алып қойған. Сөйтсе, сатып алған көліктері не Қазақстанда, не Ресейде тіркеуде жоқ екенін білген.
Петропавлдағы айыппұл тұрғанынан көлігін шығара алмай жүргендердің бірі - Данияр Исин. Щучинск қаласының тұрғыны қазанның басында Қостанайға барып, Ниссан Эстима көлігін екі есе арзан бағаға алғанын айтады. Бірақ небәрі 17 күн мінген көлігін экономикалық тергеу департаментінің қызметкерлері тәркілеп алған. Сөзінше, еш жерде есепте жоқ көлігінің Қазақстанға заңсыз кіргізілгенін білген.
ДАНИЯР ИСИН, көлік иесі:
- Осы конструктор машиналардың границадан кім өткізді? Соған жауап берсін ең алдымен. Сонда халық осындай жағдайға түскенге кім кінәлі?
Көлік иелері Щучинск, Көкшетау, Нұр-Сұлтан мен Жезқазғаннан жиналған. Тіпті, араларында Ресей нөмірлі көлігін үш миллион теңгеге сатып алып, тағы екі миллион теңге төлеп Қазақстанда тіркеуге қойғандары да бар. Сөздерінше, елге еркін кіргізілген көліктер қалайша заңсыз болып шықты дейді.
АБЫЛАЙХАН БАЛҒЫМБЕКОВ, көлік иесі:
- Бір адам бір жарым мың көлікті заңсыз елге кіргізген дейді. Ал біз соны үшінші адамнан сатып алдық. Мен осы көлікті кредитке алдым. Енді қазір далада қалып отырмын.
Ал экономикалық тергеу департаментінің өкілдері бұл көліктер шекара арқылы заңсыз кіргізілгенін айтады. Яғни, құжат бойынша қосалқы бөлшек ретінде рәсімделіпті. Қазір тергеу аяқталуға жақын. Экономикалық контрабандамен айналысқан Қазақстан мен Ресей азаматтары ұсталғанын айтады.
БОЛАТ ТЕЛЕКЕЕВ, СҚО Экономикалық тергеу департаментінің аға тергеушісі:
- Олар Жапониядан әкелінген оң жақ рөлі бар көліктерді Ресей арқылы заңсыз тасымалдаған болуы мүмкін. Солардың ішінде бұл көліктер де бар. Ары қарай сот шешеді.
Қаланың орталығына жиналған бір топ азаматтың алдына қала әкімінің орынбасары мен полиция қызметкерлері келді. Көлік иелерін қалалық әкімдік ғимаратына шақырып алып кетті. Бірақ нақты жауап берілмей тек тергеу мен соттың аяқталуын күтеміз деп қысқа қайырды.
Бізді әлеуметтік желіде оқыңыздар:
KZitem - / @informburo31kanal
Facebook - / informburo31
Instagram - / informburo31
Vkontakte - vk.com/informb...
TikTok - www.tiktok.com/@informburo31
WhatsApp Информбюро +7 777 331 31 31
#РесейКөліктері #ЕАЭС #утильсбор #кедендік_шектеу
Негізгі бет Елге заңсыз кірген! Ресейлік көліктердің айналасындағы дау басылар емес
Пікірлер: 184