Түлкібас ауданы Састөбе ауылында орналасқан «Ер Жәнібек» спорт кешенінде еркін күрестен ересектер арасында Түркістан облысының чемпионаты басталды. Халықаралық талаптарға сай бой түзеген «Ер Жәнібек» спорт кешенінде өңіріміздің ең талантты деген балуандары бас қосып, өзара мықтылықтарын танытуда. Еркін күрестен облысымыздың аға бапкері Ерлан Сатымбековтің айтуынша бұл жарыс Қазақстан чемпионатына іріктеу болып саналады. Балуандар 10 салмақ дәрежесінде 100-ден астам саңлақ белдесуде.
Үш күнге созылатын күрес додасына барлық аудандардан кіл мықтылар жиналған. Өздеріңізге мәлім соңғы кездерде Түркістан облысында ересектер арасындағы күрес бәсекесі кенже дамып келеді. Осы орайда облыс біріншілігін ұйымдастырып, құраманы анықтау мақсатында тартысты күрес додасы өтуде. Бұл біріншілікте жеңімпаз атанған балуандар облыс құрамасына алынып, алдағы уақытта оқу-жаттығу дайындықтарын пысықтап, Ел чемпионатында және халықаралық сайыстарда өңір намсы үшін сынға түсетін болады. Тартысты додаға жоғары деңгейде дайындықпен келген жерлесіміз Бақытжан Бекарыс Түркістан облыстық чемпионатына тек жеңіс үшін келгенін айтып, алдағы жоспарымен бөлісті.
Жарысты жоғары деңгейде ұйымдастырған Түркістан облысының дене шынықтыру және спорт басқармасы мен Түлкібас аудандық әкімдігі екенін айта өткеніміз жөн. Жергілікті жұртшылық пен спортшы жастардың жиі бас қосатын Састөбе ауылындағы «Ер Жәнібек» спорт кешені бұдан біраз жыл бұрын облыстық спорт басқармасымен бірлесе жекеменшік-әріптестік аясында салынған болатын. Бұл еркін күрес шеберлері бас қосқан облыс чемпионаты да талай талантты жас балуандардың тұсауын кесетін болады. Сайыстың жеңімпаздары мен жүлдегерлері ертең анықталады.
Негізгі бет Спорт ЕРКІН КҮРЕСТЕН ТҮРКІСТАН ОБЛЫСЫНЫҢ ЧЕМПИОНАТЫ БАСТАЛДЫ
Пікірлер