Uşaqlığı amerika əsgərlərinin ailələri ilə keçdi, evliliyi 6 gün çəkdi, ən böyük arzusuna çata bilmədi - Ajda Pekkan haqqında bilmədikləriniz
12 fevral Türkiyəli populyar müğənni Ajda Pekkanın doğum günüdür.
Ölkə.Az doğum günü ərəfsində ölkəmizdə də tanınan və sevilən ifaçı haqqında maraqlı faktları bir araya toplayıb.
Tam adı Ayşə Ajda olan müğənni 1946-cı ildə İstanbulda doğulub.
Atası Rıdvan Pekkan dəniz mayoru olduğuna görə onun uşaqlığı Gölcükdə, Amerika əsgərlərinin ailələri arasında keçib.
İstanbulda qızlar üçün elit Fransız Liseyini bitirən Ajda müğənniliyə can atırdı. 16 yaşında bacısı Semiramisin dəstəyi ilə populyar gecə klublarından birində səhnəyə çıxıb.
17 yaşında ailə dostlarının təkidi ilə “Səs” jurnalının kinoya yeni simalar gətirmək üçün təşkil etdiyi müsabiqəyə qatılıb və qalibiyyət əldə edib. Bununla da Ajdanın peşəkar karyerası başlayıb.
Bir çox beynəlxalq ölkədə konsertlər verən Ajda Pekkan türkcə ilə yanaşı ingilis, fransız, italyan, alman, yunan, ərəb və yapon dillərində də mahnılar oxuyub.
İlk dəfə kamera qarşısına 1963-cü ildə “Adanalı Tayfur” filmi ilə çıxıb. 1969-cu ilə qədər Ayhan Işık, Cüneyt Arkın və Tamer Yiğit kimi sənətçilərlə birgə 47 filmə çəkilib.
Gözəl səsi ilə prodüserlərin diqqətini cəlb edən Ajda bir çox filmlərində müğənni obrazını canlandırıb və mahnılar ifa edib. İlk albomu 1965-ci ildə işıq üzü görüb.
Ajda Pekkana Superstar ləqəbini “Hürriyyət” qəzetinin sahibi Erol Simavi verib. Belə ki, onun “Ajda Pekkana "star" demək kifayət deyil, ona superstar desək, yerini tapacaq” sözlərindən sonra ifaçı əvvəlcə sənət aləmində, sonra isə bütün ölkədə “Superstar” kimi tanınmağa başlayıb.
O hətta bu titulunu rəsmiləşdirmək çün "superstar" adlı bir neçə albom da buraxıb.
1973-cü ildə türkiyəli sabiq futbolçu Coşqun Sapmazla evlənən Ajdanın ailə həyatı cəmi 6 gün davam edib. 6 il sonra isə sənətçi jurnalist Erol Yaşarla nişanlansa da, cütlük sonradan ayrılıb.
70-ci illərdə dəfələrlə ilin sənətçisi seçilib və mahnıları hit-paradların zirvəsində qalıb. 1980-cı ildə çoxsaylı təkidlərdən sonra Türkiyəni Avroviziyada təmsil etmək Ajda Pekkana tapşırılır. Könülsüz şəkildə təklifi qəbul edən müğənninin 15-ci yeri tutması onun böyük xəyal qırıqlığı yaşamasına səbəb olur. Yarışmadan sonra o, bir müddət dincəlmək qərarına gəlir və ABŞ-də məskunlaşır.
Növbəti bir neçə ildə buraxdığı albomlarla istədiyi nəticəni əldə edə bilməyən sənətçi 1983-cü ildə "Süperstar 83" albomu ilə yenidən ürəkləri fəth etməyi bacarır. 1984-cü ildə biznesmen Ali Barsla evləndikdən həyat yoldaşının istəyi ilə səhnədən uzaqlaşır. Lakin musiqidən uzaq günlərdə boşluq hissi yaşayan müğənni 1990-cı ildə yenidən sənətə qayıtmağa qərar verir və boşanır.
O, ikinci evliliyinin eşq yox, məntiq evliliyi adlandırırdı. Bu müddət ərzində 6 dəfə hamilə qalan sənətçi bütün hamiləliklərini sonlandırması ən böyük peşmanlığıdır. O karyerasına görə, heç vaxt ana ola bilməməsini "həyatının ən böyük fədakarlığı" adlandırır.
Münasibətlər barədə danışan sənətçi isə "təəssüf ki məni daşıya biləcək kişi yoxdur" deyir.
Sadəcə mahnı oxumaqla özünü istədiyi qədər ifadə edə bilməyəcəyini düşünən Ajda Pekkan 2002-ci ildə Halil Ergünlə birlikdə "Şöhret Sandalı" filmində baş rolları bölüşüb.
Onun adı 2016-cı ildə ABŞ-nin "Hallivud Reportır" jurnalının hazırladığı "şou-biznesin ən güclü 100 qadını" siyahısına daxil edilib.
Superstar ölkəsində albomları bütün dövrlərdə ən çox satılan müğənnilərindən biridir. O həm sənəti, həm də imici ilə ölkəsində qərbləşmənin aparıcı simalarından sayılır. Ümumilikdə 30-dan çox albom buraxan sənətçi Türkiyədə Dövlət artisti fəxri adı, “İncəsənət və ədəbiyyat” ordeni və çox sayda digər mükafatlar alıb.
Öz ölkəsində və beynəlxalq arenadakı uğurları ilə yanaşı, Ajda Pekkan 2013-cü ildə Azərbaycanın "Sənətə, mədəniyyətə və insanlığa xidmət" mükafatına da layiq görülüb.
Sənətçi 22 illik fasilədən sonra ötən il Türkiyənin reytinqli "Kızılcık Şerbeti" serialınıda superstar Ajda Pekkan olaraq çıxış edib.
77 yaşlı Ajda Pekkan təkcə gənc görünüşü ilə deyil, həm də fasiləsiz səhnə fəaliyyəti və enerjisi ilə insanları təəccübləndirməkdə davam edir.
#gününəsasxəbərləri #xeber #xəbərlər #AjdaPekkan
Негізгі бет Evliliyi 6 gün çəkdi, ən böyük arzusuna çata bilmədi - AJDA PEKKAN HAQQINDA BİLMƏDİKLƏRİNİZ
Пікірлер