حلقات مقترحة
حلقة تفكيك الاتحاد الأوروبى
• فرنسا تغادر الاتحاد ال...
حلقة العقوبات طلعت فشنك
• حرب روسيا وأوكرانيا
حلقة الحرب النووية بدأت
• اوكرانيا وروسيا
حلقة انفجار تشرنوبل
• انفجار تشرنوبل - المشا...
بعد سيطرة القوات الروسية شبه الكاملة على المناطق الأوكرانية اللى دخلها الجيش الروسي الفترة اللى فاتت.. كان الكل متخيل انه خلاص.. الموضوع خلص.. والقوات الأوكرانية مقدمهاش كتير علشان تعلن استسلامها.. لكن واضح كده ان القوات الخاصة الأوكرانية كان لها رأى تانى.. لأن اليومين اللى فاتوا قدروا ينفذو عملية خلف خطوط العدو.. كل الخبراء العسكريين لحد النهاردة مش عارفين يكشفوا تفاصيلها.. مش عارفين القوات الخاصة الأوكرانية عملتها ازاى.. والعملية باختصار هى تدمير مقاتلات سلاح الجو الروسي فى قاعدة ساكى الموجودة فى قلب شبه جزيرة القرم.. ضربوا الطيارات وهى واقفة على الأرض..
حضرتك تقولى شبه جزيرة القرم دى أراضى أوكرانيه.. أمال ليه قولت ان العملية خلف خطوط العدو.. أقولك لأن شبه جزيرة القرم محتله من الجيش الروسي من سنة 2014.. وبالتالى أراضى شبه جزيرة القرم تحت سيطرة القوات الروسية.. وده معناه ان القوات الخاصة الأوكرانية علشان تدمر مقاتلات سلاح الجو الروسي.. قدرت تخترق خطوط العدو - العدو ده اللى هو الجيش الروسي - وتدخل عمق أراضى شبه جزيرة القرم.. وتوصل للقاعدة الجوية اللى فيها المقاتلات دى.. وتدمرها..
لكن هنا سؤالين.. سؤال يشغلك انت.. وسؤال شاغل الخبراء العسكريين اللى بيحللوا العملية دى.. السؤال اللى يشغلك هل القوات الخاصة الأوكرانية هى اللى ضربت القاعدة الجوية الروسية فعلا؟.. ولا قوات خاصة أمريكية وغيرها من قوات حلف الناتو كانوا ضمن العناصر اللى نفذت الضربة؟.. ولو أمريكا متورطة فعلا يا ترى الرئيس الروسي فلاديمير بوتن هيرد ازاى؟..
أما السؤال اللى شاغل الخبراء العسكريين لحد دلوقتى هو ازاى القاعدة الجوية الروسية انضربت أصلا.. هل ضربوها بالصواريخ مثلا؟.. الإجابة لأ لأن الأقمار الصناعية ملقطتش مسارات تحرك لصواريخ.. هل لغموا الطيارات وهى واقفة جوه القاعدة الجوية؟.. الإجابة برده لأ.. لأن محدش قدر يدخل القاعدة الجوية أو يتجاوز حدودها؟.. أيوه يعنى حدفوا الطيارات بالطوب مثلا؟.. عملوا ايه علشان يدمروا الطيارات وهى واقفة على الأرض؟.. هقولك سيدى المواطن.. هقولك..
مبدئيا كده روسيا فى تعليقها على الضربة دى.. قالت يا جماعه متكبروش الموضوع.. الطيارات كلها سليمة والانفجار معملش حاجه غير انه قتل جندى واحد.. ودمر 62 مبنى سكنى حوالين القاعدة الجوية.. لكن الحقيقة سيدى المواطن ان روسيا بتكذب.. انت اللى بتقول روسيا بتكذب يا أبوحميد.. دا انت طول الوقت تقول ان روسيا محدش بيقدر عليها.. أقولك سيدى المواطن روسيا فعلا دخلت أوكرانيا ومفيش انتصار أكبر من انها تحتل أجزاء منها بدون ما حد يقدر يفتح بقه ولا يقولها انتى بتعملى ايه؟.. لكن اللى انت مش قادر تستوعبه انى بنقلك الواقع.. والواقع بيقول ان روسيا تكاد تكون انتصرت فى الحرب ككل.. لكن عملية النهاردة واللى روسيا انهزمت فيها ما هى إلا معركة من ضمن معارك الحرب.. بالبلدى كده اذا كانت القوات الأوكرانية قدرت انها تضرب قاعدة جوية روسية.. فروسيا ضربت أوكرانيا كلها.. تمام كده؟.. تمام..
نرجع لتدمير المقاتلات الروسية.. الخبراء العسكريين لما عرفوا باللى حصل وبدءوا يدرسوه علشان يعرفوا أوكرانيا قدرت تعمل كده ازاى؟.. خصوصا وانها فضيحة.. مش بس فضيحة للجيش الروسي والقوات المسؤولة عن تأمين شبه جزيرة القرم.. لكن الأخطر انها فضيحة للمخابرات الروسية كلها.. انتى كنتى فين لما القوات الخاصة الأوكرانية دخلت شبه الجزيرة.. وقدرت تتحرك بسهولة كده لحد ما وصلت للقاعدة الجوية وتدمر الطيارات اللى واقفة على الأرض.. خصوصا وانها مش أى طيارات.. دى مقاتلات سوخوى 30.. وقاذفات سوخوى 24.. ودى المقاتلات اللى بيحتاجها الجيش الروسي فى تأمين البحر الأسود.. وتنفيذ هجمات جوية فى عمق أوكرانيا..
فاللى حصل دلوقتى بالظبط هو ان الجيش الأوكرانى طرقع للمخابرات الروسية جامد.. الضربة توجع.. وربنا يستر من رد الفعل الروسي على الضربة دى.. لأن غالبا اللى هيدفع تمنها الشعب الأوكرانى..
طيب الضربة دى اتنفذت ازاى؟.. هقولك.. أولا الضربة قدرت تدمر أكتر من 10 طيارات مقاتلة واقفة على الأرض.. زى ما حضرتك شايف كده.. منظر مهيب مش هيقدر ينساه سلاح الجو الروسي.. أنا لو من بوتن.. وهو أكيد بيسمعنى دلوقتى.. أغير مدير جهاز المخابرات..
الخبراء العسكريين بيقولوا ان الحرب فى اوكرانيا كلها اتحولت لحرب عصابات طويلة الأمد.. وده اللى كانت عاوزاه أمريكا من البداية.. وهى انها ترهق الجيش الروسي فى حرب عصابات زى اللى عاشها فى أفغانستان زمان.. وكانت سبب فى انه يخسر الحرب هناك.. فى حين ان بوتن عاوز برده الحرب تطول علشان يفضل ضاغط على أمريكا ودول الاتحاد الأوروبى بقطع الغاز وارتفاع أسعار النفط وارتفاع معدلات التضخم.. وبالتالى هما الاتنين عمالين يعندوا قصاد بعض ومستنيين يشوفوا مين فيهم اللى هيعيط الأول.. زى ما حكيتلك فى حلقة تفكيك الاتحاد الأوروبي.. هما الاتنين مستنيين يشوفوا مين فيهم اللى هياخد بعضه ويروح الأول..
من المصادر
bit.ly/3JYU4TG
bit.ly/3BZ3r3H
#المواطن_سعيد #روسيا_واوكرانيا
Негізгі бет فضيحة بوتن بعد ضرب قاعدته الجوية
Пікірлер: 817