محروم شكون يدخل للبلاد العربي في صفاقس وما ياكلش فطاير سيالة، ومحظوظ إلي يوصل يشري كعبات زلابية ومخارق في رمضان. فطاير السيالة هي رمز من رموز البلاد العربي والماكلة الصفاقسية. بنة وطعم فريد متفرد في جو عتيق يلخصلك سنوات من الخبرة وأجيال من العايلة هاذي أبدعت في الصنعة حتى دخلت التاريخ وصارت الفطاير تتسما عليهم والناس تتشهى فيها من العالم الكل.
يخدم فيه الحانوت تو كل من سي رضا وخوه سي أحمد سيالة. حدثونا على تاريخ الصنعة والحانوت وقالولنا:
" يحكيو الجدود إلي ولاد عايلة السيالة بداو الصنعة هذي من قبل ما تتبنى البلاد العربي، وقتها الناس الكل يعيشوا في طينة.
ومن بعد ولات عندهم برشة حوانط في باب بحر قدام باب الديوان. وكان جدنا الحاج أحمد سيالة عندو حانوط غادي في 100 mètres، قبل ما يبني الحانوط هذا عام 1920 وحول يخدم في البلاد العربي. ومن بعد خذاوه بويا الحاج محمود سيالة (المولود عام 1909) وعمي الحاج بشير السيالة (المولود عام 1920) وخدموا فيه.
انا رضا (مولود عام 1952) دخلت نخدم معاهم فالحانوط عام 1974, وخويا أحمد (مولود عام 1963) دخل معنا عام 1986. تعلمنا عليهم الصنعة و الخدمة. وحفظنا أسرارها والوصفات السرية.
احنا إلي نخدمو فيه يتسمى سفنج أما العباد تسميه فطاير بالغالط. الوصفة متاعو متاع السنة والعادة، من أيام الجدود. من بين الفوارق إن سفنج يصير بالسميد والفطاير بالفرينة.
أما المخارق وزلابية spéciale مطعمهم عندنا مش كيف الفطايرية الأخرين، التخليطة زمنية ورثناها من عند الجدود وما تلقاها كان عند عايلة سيالة. وفي الأول كنا نعملها كان ليلنا في العايلة. وما بدينا نبيعها فالحانوط كان عام 2004. السر متاع زلابية والمخارق spéciale متاعنا ما يعرفوا حد. وبش تعرف كعبة المخارق متاعنا تلقى وسطها فارغ وماهيش معجنة. وفما إلي مخلطة بزلوز . المخارق نعجنوه في الصباح أما زلابية لازمها تقعد تخمر 36 ساعة.
آخر حاجة نخموا فيها إنو ولادنا يشدو الحانوط خاطرها صنعة متعبة وصعيبة وما فيها ما يشجع.
رضا و أحمد السيالة
صنع الفطاير ر الزلابية و المخارق
الاغنية المصاحبة: نهار جديد للفنانة صفوة
ناس المدينة
باب الجبلي للتوثيق
/ bebjebli.tn
www.Bebjebli.tn/
Production: SoWhen, Mohamed Marouene
Негізгі бет فطاير السيالة بالبلاد العربي بصفاقس
Пікірлер: 22