على عزبة ابن حضرم نوينا
من الدار الكويتية سرينا
الى دار السعودية سكاكا
شمال الغرب من رفحا ولينا
مع خوة مطاليق و نشاما
قرومٍ تجعل القاسي يلينا
على خمسة مواتر وانتبارا
ذكرنا الله فالدرب ومضينا
فهقنا الرقعي والحفرْ بعجاله
وفي رفحا تعشينا ومسينا
وقمنا الصبح صلينا وفطرنا
من رفحا الى لوقة مشينا
ومن ثمٍ هزعنا صوب عذفا
مع الروسان شرقنا يمينا
مشينا بسكةٍ تشمل وتشرق
عليها اربعه كيلو خذينا
بعدها وش بعدها وش بعدها
نسفنا القار والصحرا تبينا
خذينا الخط ابيض بعد الاسود
على منظر يسر الناظرينا
خطوطٍ كنها عروق البنادم
عشوبٍ من يسار ومن يمينا
ومدينا النظر بارضٍ وسيعة
مناظر تفرح القلب الحزينا
بعدها انقطع الارسال عنا
ولاهاتف ولانتٍ يجينا
ضربنا في الخلا خمسين كيلو
وهمتنا مثل ما احنا بدينا
لو ان الدرب مملي بالحجاره
ولو هو وعر منه ماشكينا
هدفنا دلة الخاطر ونسلا
وعزالله فالطرقه سلينا
وصلنا لابن حضرم في مكانه
لذا محمد بن مناحي خوينا
يرحب مرحبا باللي نصونا
وثنا ترحيبته للمقبلينا
ويبراله فهد بالطيب كله
وفهد لمحمد مناحي عوينا
يشوف عيوننا ويقرا طلبنا
يوفر مانبيه ومابغينا
وعبدالله بن مناحي المشبب
مع فرض الفجر يذن علينا
يدق النجر ويزيّن قهوته
بفنجالٍ ملاذ الشاربينا
صحينا بريحة اقهوته وهيله
ومن دنة معاميله صحينا
وابومناحي حمد رابع ثلاثه
بترحيبه وجوده محتوينا
بشاشة مرحباه انعم واكرم
تبيّن مثل شمس الشارقينا
وابن عمهم حمد عثمان باشا
خفيف النفس والذرب الرزينا
على شف الرفيق ومانواله
بخيصٍ من رجالٍ باخصينا
على الماجوب ماقصر حداهم
ويدفعهم سلوم الطيبينا
بعددهم واعدد اخويانا
وعن مدح اخويانا مانسينا
اببدأ في سبيعينا محمد
ابن صايل حفيد الاكرمينا
من الغلبا سبيع اهل المواقف
سبيع سبيع سقم المعتدينا
وصبيان محلف منا ثلاثه
من ال للزير ذربين اليمينا
عيال عجيم من يام العريقة
نوادر من نوادر نادرينا
ابوهجاج راشد وال ماجد
شرونا في غلانا واشترينا
وماجد بن حمد سِعد الرفاقه
واخوه محمد اوفى الوافيينا
وثلاث مْن ال فاهد لاد مكلب
بني عمي كعام العايلينا
سَعد شُوردي الفاهد خويي
رصيدٍ فالغلا سعره ثمينا
ومحمد ابن عبدالله وعرفه
يزيد المعرفة للسامعينا
وعليّ اخو يمناه وعضيده
يداولنا الغلا في كل حينا
وعلي عبدالله الجدعان مكسب
هو المكسب وحنا الكاسبينا
وثنين مْن ال مركوز النشاما
حدادٍ كنْهم السيف السنينا
محمد بن علي والنعم يذكر
مع الدكتور ناصر لاطرينا
كبار القدر صبيان العضيه
من اعمام وخوال معنزينا
وابو جلعود عبدالله المحكحك
من ال هذال اهل عرفٍ مكينا
وبعدها بيوم خصونا اثنينه
على جمع الربع متصمدينا
لفى ابراهيم ابومحمد محبه
وعبدالله ربيع اقبل علينا
على الجمعه تعنوا من غلانا
مثل .. لولا غلاكم ماعنينا
تجمعنا على عز ومعزه
وعن الديرة واهلها اختلينا
نبي الصحرا ومرباع الفيافي
ورحنا في مناكبها سعينا
خذيناها على اربع ليالي
حوالي خمسة ايامٍ قضينا
وعيّنا الشحم والعود الازرق
ولحم الضان والكبش السمينا
فطور الصبح انتركنتيننتال
وغدانا مالي بطونٍ وعينا
وكل ماطاحت الشمس اغتبقنا
ومن حلو المغاتير ارتوينا
وتعالمنا بعلومٍ واستفدنا
خذينا مْن السواليف وعطينا
سوالف تذكر بروس المجالس
تداركها الرجال المدركينا
تجاذبنا وغنينا القصايد
وجرينا قصايد الاولينا
( ليالي نجد مامثلك ليالي )
(طوينا صفحة الماضي طوينا )
يلاحينا الهوى الغربي براده
مع نور القمر للسامرينا
رفعنا سقف مطلوب المراجل
ومع سقف المراجل إرتقينا
خفاف نفوس وثقال بقدرنا
ونفدي بالغلا من يفتدينا
وكلٍ مطمعه خاطر رفيقه
توالفنا مع بعض وصفينا
فتحنا باب الالفه والميانه
تجسرنا على بعض وضرينا
جمعنا الله في عزبة مناحي
ابوعثمان لوهو مالفينا
وهو صقار ومقرنس حراره
نوايف من قرومٍ نايفيينا
شرحت الرحلة موثق شعوري
من اول مابدينا لانتهينا
كتبت ابيات شعرٍ من ضميري
وانا لي بالشعر بحرٍ ومينا
على نهج الدليهي ابن حضرم
قصيدٍ باقيٍ طول السنينا
شرح فيها نسل واصل الهواجر
ودونها الرواه الكاتبينا
ونختمها بصلاة الله وسلم
على محمد ابوالقاسم نبينا
وعسى الله يغفر ويرحم عباده
وعسى ربي من النار يحمينا
ويدوم افراحنا في كل حزه
وعسى الخلاق مايغير علينا
.
2023/2/23
#فلاح_بن_ذروه
Негізгі бет Комедия فلاح بن ذروه - رحلة 2023/2/23 عزبة الحضرم
Пікірлер