ياراكب اللي ماتجي بالمناوي
ماجابها حظي ولا سلفت البنك
أبعد عليّ امن الممنى و الرجاوي
حتى ولو أن الخرافي .. يديّنك
اللي تقرب لك بعيد الخطاوي
وتقفي عليها من ديارك وموطنك
تدجر على المدرج كما ذيب عاوي
من صوتها ترتاب والخوف يسكنك
أعلا من أصوات الزهم و العزاوي
وأهدا من اللي من المصايب يطمنك
بطرافها برقٍ من النور .. ضاوي
سحابةٍ تبرق يسارك وبيّمنك
وليا لواها من العواصيف لاوي
كنك على الكرسي بتفقد توازنك
بين الغيوم وبين نجمٍ سماوي
تاخذ سبع ساعات محدٍ يعاينك
حول على مدريد وانسى البلاوي
وتلقى السعد قدام وجهك ومسكنك
يابوعلي نطوي لك البعد طاوي
ابوك قد عرب جنابك و معدنك
وخالك ترى ماهو على البعد قاوي
على الوصل والطيب والود هادنك
جينا على قد الغلا والهقاوي
عيّنتنا .. واليا بغينا نعيّنك
ياصفا من العد الغدير الرهاوي
من يرتوي من منهلك ماشبع منك
سوالفك كنها الطبيب المداوي
اللي تزيل الياس والهم والضنك
غانم وخيّر يالعديم النداوي
يامطيب علومك ومكثر محاسنك
وشبلك علي لـ اودق بغيثه صخاوي
أخاف اعدد في مزاياه وأفتنك
على الظفر والطيب جسر وحماوي
وحنا يابوغانم نعين ونعاونك
وانا مع الوافي حظيظ وغناوي
وبغلا كنوز الارض ماني مثمنك
ترى المراجل بيننا بالتساوي
مالك غنا عني ولالي غنا عنك
فلاح بن ذروه
Негізгі бет Комедия فلاح بن ذروه ياراكب اللي ماتجي بالمناوي
Пікірлер: 1