Telegramdagi kanalim: t.me/karimberdi60
Facebookdagi sahifam: / karimberdi.uz
Фурқатни эслаб...
Бугун “Хотира ва қадрлаш куни”да мен юрагимга энг яқин бўлган, туғишганларимдан ҳам қадрли бўлган ҳофиз укам Фурқат Мирзаевни хотирламоқчиман.
Фурқат кўп шеърларимни қўшиқ қилди, аммо қўшиқ қилишга улгурмаган, қўшиқ қиламан, деб “олиб қўйган” шеърлар ундан ҳам кўп эди. Басталаб айтган, аммо овоз ёзиш студиясида ёзишга улгурмаган қўшиқлари ҳам кам эмас.
Бугун ана шундай қўшиқларидан бирини эътиборингизга ҳавола қиламан. Шеър мана шундай эди:
Бу дунё ёлғончи, бевафо дунё,
Дунёга кўнглингни берганинг бекор.
Бирни берса ўндан айлайди жудо,
Оҳу фарёд уриб юрганинг бекор.
Бекор, бекор, бекор, юрганинг бекор,
Дунёга кўнглингни берганинг бекор.
“Ёшлик ҳам ғанимат, ўйнаб қол”, дема,
“Йигитлик гаштин сур, яйраб қол”, дема,
“Неъматлар биз учун, барин ол”, дема,
Беш кун давру даврон сурганинг бекор.
Бекор, бекор, бекор, юрганинг бекор,
Беш кун давру даврон сурганинг бекор.
Мансабу амал деб қилмагин ғайрат,
Сийму зарда эмас инсоний сийрат.
Баланд-баланд қилиб солма иморат,
Шоҳона қасрлар қурганинг бекор.
Бекор, бекор, бекор, юрганинг бекор,
Баланд иморатлар қурганинг бекор.
Ўзгалар дилини оғритма ҳеч ҳам,
Зарра ёмонликнинг оқибати ғам.
Одам зоти борки де иним, оғам,
Кимгадур лаб буриб турганинг бекор.
Бекор, бекор, бекор, юрганинг бекор,
Кимгадур лаб буриб турганинг бекор.
Бари иш бекорчи, ибодат қолур,
Хайрли ишлару саховат қолур.
Аллоҳ деб чекилган риёзат қолур,
Ундан ўзгага юз бурганинг бекор.
Бекор, бекор, бекор, юрганинг бекор,
Аллоҳдан юз буриб юрганинг бекор.
Бу шеърни мен Фурқатнинг туғилган кунига совға қилган эдим ва ўша куни ўзим қандай басталаган бўлсам, шундай айтиб бердим. “Яна бир марта бирга айтайлик”, деди Фурқат. Бирга айтдик, яна айтдик. Учинчисида Фурқатнинг ўзи худди шундай қилиб айтди ва шу оҳанг билан тўйларда айтиб юрди. Афсус, студияда ёзилмади...
Бирор шеър ёзсам, шеър битиши билан Фурқатга қўнғироқв қилардим.
- Мирзаев, битта шеър кепқолди, эшитиб кўринг! - дердим алламаҳал бўлса ҳам.
- Қимирламай туринг! - дерди Фурқат шеър ёқса ва бирпасда етиб келарди, бир-биримизга яқин турардик.
Тонггача шеърни ҳар хил оҳангларга солиб, айтиб кўрарди. Фурқат сўз эмас, ҳар бир ҳарф устида талашиб, тортишарди.
- Мана бу сўз тилимга ботаяпти, - дерди бирор сўзнинг талаффузи қўшиқ ичида ноқулайлик қилса.
- Мана шу сўзни “а” ҳарфи билан тугайдиган бошқа сўзга алмаштириб беринг, жарангламаяпти, - дерди баъзан “и” ёки “у” ҳарфи билан тугаган сўзлар ҳақида.
Янги қўшиқ ёзаётганида мени ҳам овоз ёзиш студиясига ўтқазиб қўярди.
- Қараб туринг, бирор сўзни тушунарли талаффуз қилмасам, бирор ҳарфи “ютилиб кетса” тўхтатинг, - дерди у. - Тингловчига ҳар бир сўзимиз бир эшитганда тушунарли бўлиши шарт, “Манов ерда нима деди?” деб бошқатдан эшитмасин!
Ҳиндистонда даволанаётган эди.
- Ака, мингта куй ўғирладим булардан, - деди бир куни. - Борганимдан кейин бошқа ишни йиғиштирасиз, тўйларда мен билан бирга юрасиз, ана шу куйларга сиз сўз ёзиб бераверасиз, мен куйлайвераман, уч йилда “Халқ артисти”ни оламиз. Энди жиддий ижод қиламиз!
Афсуски, бу гапларни айтаётган ҳофизнинг уч кунгина умри қолган экан...
Бир кун олдин “Ака, тузалмаяпман, мулки Ҳиндистон бўлиб кетаман, шекилли?” деган укам Ҳиндистонда жонини Ҳаққа топширди.
Фурқат укамни ўзи туғилиб ўсган Боғизоғон қишлоғига дафн қилдик...
Ундан кўп дилбар қўшиқлар қолди. Аммо айтилмаган қўшиқлари ундан ҳам кўп эди. Орзулари кўп эди, ниятлари кўп эди. Афсус, ҳаммаси чала қолди.
Фурқатнинг ўғли Анваржон Мирзаев яхши хонанда бўлди, отасининг қўшиқларини ижро қилаяпти, “Ниҳол” мукофоти совриндори бўлди. Илоҳи умри узун бўлиб, отаси орзу қилган чўққиларни эгалласин!
Аллоҳ Фурқат Мирзаевни раҳматига олиб, жаннати билан сийласин!
#o’zbekiston #uzbekistan #samarkand #samarqand #Cамарқанд #jurnalist #журналист #karimberdi #каримберди #turamurod #to’ramurod #турамурод #тўрамурод #каримбердитўрамурод #karimberdituramurod #yozuvchi #shoir #uzbek #o’zbek #узбек #ўзбек #hikoya #hikoyalar #sherlar #sheriyat #Шерият #audiokitob #kitob #audio_kitob #audiohikoya #hikoya #audio_hikoya #аудиоктоб #китоб #аудио_китоб #хикоя #аудиохикоя #аудио_хикоя #hikoyalar #ziyouz #kitobxon #ozodlik #mutolaa #zarnews #oriatdono #daryouz #gazetauz #kunuz #xabaruz
Негізгі бет FURQAT MIRZAYEVNI ESLAB
No video
Пікірлер: 23