.
Gesegde: Hierdie seun van my was dood, en hy lewe weer; hy was verlore, en ek het hom teruggekry (Pa van die verlore seun - Luk. 15:23)
Tema: Die verlore seun se wapenrusting
Skrifgedeelte: Efesiërs 6:10-20; Lukas 15:11-32
.
Bemoediging
Met watter van die twee verlore seuns in Jesus se gelykenis assosieer jy op hierdie oomblik? Gaan soek jy troos soos die jonger broer in gebroke, sondige plekke? Probeer jy jou swakheid en sonde, soos die oudste broer, agter ‘n masker van goeie werke of prestasies wegsteek? Die groot probleem by beide verlore seuns is dat hulle nie hulle identiteit verstaan en uitleef nie. Hulle besef nie dat hulle die geliefde seuns van hulle vader is nie. Hulle besef nie hoe lief hulle vader hulle het nie. Inteendeel, beide van hulle stel meer belang in wat hulle van hulle vader kan kry as in ‘n verhouding met hom. Wanneer die jongste broer tot inkeer kom, bevestig sy vader sy identiteit wat nog altyd in die vader se hart veilig was. Die vader trek vir hom ‘n nuwe kleed aan en sit ‘n ring aan sy vinger. Almal kan nou sien dat hy die vader se seun is. Die kleed wat die vader vir die verlore seun aantrek, het my herinner aan die wapenrusting, die soldaat se klere, wat elke gelowige moet aantrek om staande te kan bly wanneer onsigbare bose magte ons identiteit aanval. Die verlore seun wat ek was, het saam met God se Seun aan die kruis gesterf. Nie my sonde of my prestasies bepaal my identiteit nie. Ek is wie my Vader sê ek is. My Vader sien my presies soos Hy sy eie Seun sien. Wanneer ek tot inkeer kom en teruggaan na die veilige ruimte van die Vaderhuis, na Jesus as my tempel, hoor ek die waarheid (as gordel om my heupe) dat ek vrygespreek is (borsharnas). Dat die goeie boodskap van die evangelie op my van toepassing is, dat Jesus se betroubaarheid my skild is. Wie die Vader sê ek is, maak my bereid om die boodskap van verlossing uit te dra, want hierdie boodskap is soos ‘n effektiewe skerp swaard in my hand!
.
Gesels in Groepe
1. Waar speel die gelykenis van die verlore seun in my eie lewe af (vgl. Ef. 2:20-22; Joh. 14:20, 23)?
2. Kan jy aan voorbeelde dink waar die jongste en oudste verlore seun in jou hart na vore kom?
3. Wat staan my te doen as ek troos gaan soek het op gebroke, sondige plekke soos die jongste seun (Luk. 15:17-20a)?
4. Is die kruis (ruimte waar ek sonde bely) ‘n plek van oordeel of koestering (Luk. 15:20b-25)?
5. Wie sê jou hemelse Pa is jy (Ef. 1:1, 5, 13; 2:11-15; 3:6; 4:24)?
6. Wat sê die wapenrusting in Efesiërs 6:14-17 oor jou identiteit?
7. Wat is die verband tussen Efesiërs 2:1-5 en Lukas 15:23, 32?
8. Lees Efesiërs 6:18. Hoe trek ons, ons wapenrusting (ware identiteit) aan?
.
#gklinden #boodskap #bou #christenskap #geloofsgroei #verhoudings #geloof #genade #gksa #jesus #verloreseun #vaderhart #vergifnis #vryspreek #hart
Негізгі бет GKL Boodskap | Jacob Pretorius | Die verlore seun se wapenrusting | Efesiërs
No video
Пікірлер