إشترك في قناة صالح ال مانعه الرسمية للحصول على أحدث إصداراته الفنية
bit.ly/bnman3h
اهداء الى سعادة الدكتور علي بن محسن بن فطيس
كلمات محمد ال مانعه
اداء جفران بن هضبان
---
ياراعي الرسلان والبن والهيل
غمرٍ شبوب الضو عنده شفاوه
وكنه الى ناحر مشب المعاميل
يعطيك درسٍ في سلوم البداوه
قم قرب المحماس واخذ التفاصيل
والراس داوه باشقر البن داوه
برية يثمر شجرها من السيل
كيفٍ لعطران الشوارب هذاوه
واحمس لي من البن من دون تعجيل
حمسة خبير مالحقها فهاوه
والى غشاها من زبدها ذحافيل
تنسف على مصنوع لثل بهداوه
بشدوخيٍ للبن مبرد وتنزيل
ومنه على نجرٍ لصوته شفاوه
وخل النجر يدعي وجيه الجماميل
الى نشع فيها شقار ونشاوه
والماء على ميزانها وزنة الكيل
من فوق جمر لاتسويت ساوه
فالى قطع ماها وجالها تشاكيل
باول نشوعٍٍ في علوه غشاوه
افهق مزله لين يصفى على ميل
خله ايلين تشوف فيه الصفاوه
وبهر له من الهيل في دلة الهيل
وزله بحس حاضر في هداوه
وعده على ال فطيس روس الرياجيل
والمدح فيهم هاو لبيات هاوه
وعده على اللي يشربون الفناجيل
روس تروس الروس طيب ورساوه
وقل للمحسن يالوجيه المشاكيل
المدح فيكم فيه صدق وصفاوه
انتو هل الطولات مهوب تضليل
صدقٍ على برهان فعل ونقاوه
وعده على اللي له معزه وتجليل
راس حموي فيه عز وحماوه
دون القبيله في وجيه المقابيل
وسيف يهابه كل ناقل عداوه
النايب اللي خوته شاهد السيل
ياصالح احفظ رفقتك له وخاوه
يستاهل الخوه ورسم التماثيل
وساوه بتقدير الموالين ساوه
هو جاهنا اللي قدروه الرياجيل
راس حموي في علوه علاوه
له سمعتة عند القبايل وتبجيل
نلقابها تقدير جاه وحفاوه
ابو حمد في الجيل ذا كنه سهيل
يامن بغيت العز خاوه وناوه
ولد سليل المجد ومروض الخيل
صفرٍ يروضها لسلم وعداوه
خيل مورثها لجيل بعد جيل
وفريسها ال فطيس روس ورساوه
قد لقحت الدنيا بهم في حجا ليل
في ليلة بالغدر فيها غشاوه
وولدت مع لذان خيلٍ وتهليل
هم تسعة والقوم فيهم رهاوه
غارو عليهم واهجدوهم جحافيل
لين كسروهم بين رثمه وناوه
سلام ياللي لانصوه الرياجيل
قبل السلام تبين فيه الحفاوه
كنه يبشر بالوجيه المقابيل
خفيف نفسٍ في رزانة صحاوه
ويقلط الحيران ويقلط الحيل
يمناه للماجوب فيها رهاوه
يفرح الى شاف الرجال المشاكيل
متجملين فيه من يوم وجاوه
وان ثقلت الحمله على بارد الحيل
يرهي بنقل حمولها في القساوه
وقت الرخا يضرب بثقله تماثيل
وعند اللوازم مايعرف الهداوه
وعنده مع ربه الى هود الليل
طهارة السنه وسجدة تلاواه
مع القبايل من حلال شماليل
سمو عليه وساق مالها سماوه
علي سليل المجد ومروض الخيل
صفرٍ يروضها لسلم وعداوه
وفريسها ال بحيح روس الرياجيل
في مكسب الطولات فيهم جراوه
---
لمتابعة صالح ال مانعه عبر وسائل التواصل الإجتماعي:
snap : / bnman3h
insta : / bnman3h
twitter : / bnman3h
Негізгі бет Музыка اهداء الى سعادة الدكتور علي بن محسن بن فطيس - اداء جفران بن هضبان 2021
Пікірлер: 59