فسنة 2017 علن المغرب و بشراكة مع الصينية على أضخم مشروع صناعي فتاريخو الحديث، هنا بلا شك كنتكلمو على طنجة تيك
اللي كان من المفروض تستقبل مآت المصانع العملاقة و غتكون أضخم مدينة صناعية فكامل إفريقيا.
لكن للأسف المشروع تعثر و اعرف بزاف دالعراقيل، حتى من الشريك الصيني الأساسي اللي كان مسؤول على جلب الشركات و الإستثمارات الصينية انساحب من المشروع و خلا المغرب فوضع محرج للغاية ، و الأغلبية فقدوا الأمل من هاد المدينة ، و صافي حتى ضنينا بأن المشروع فشل و خاصنا ننساوه.
لكن فالسنة الماضية و بشكل فاجأنا كاملين تم إحياء مشروع طنجة تيك من جديد و العديد من المصانع الضخمة بدات كتستقر فيها، او كتعلن نيتها فالإستقرار، حتى من صور الأقمار الصناعية كتبين إختلاف كبير و ملامح المصانع اللي كتشيد عليها بدات كتوضاح
و لهاد السبب درنا هاد الفيديو باش نعرفو فين وصل مشروع طنجة تيك و كيفاش تم إحياء هاد المدينة من جديد ، شنو هي المصانع و الشركات اللي رسميا استقرو فيها ، و شنو الفائدة اللي غتقدمها لبلادنا
غنعرفوكم على بزاف دالمعلومات و غنجاوبو على بزاف دالأسئلة ، فخليكم متبعين معنا مزيان معاكم خوكم محمد سليم لو أمكن اشتاركو فالقناة و فعلو زر التنبيهات متبخلوش علينا بدعمكم و بلا منطول عليكم ياله نبداو
طنجة تيك هي مدينة صناعية ضخمة غيتم تشييدها على مساحة 2100 هكتار و غتضم عشرات المجمعات الصناعية العملاقة ، و المختصة فعدة قطاعات بحال صناعة الطيران، و الصناعات الدقيقة و الإلكترونيات، صناعة السيارات و أجزاءها ، صناعات النسيج و البلاستيك ، الأجهزة الإلكترونية و الكهربائية ، التجهيزات المنزلية و الأثاث ، الصناعات الغذائية و مكاتب الشركات و مستودعات التخزين و غيرها
كذلك لمدينة غتعرف تشييد مجمعات سكنية كبيرة، مع مركز تجاري و محلات و مطاعم، بالإضافة لمركز مالي للأعمال غيتضمن أبراج و بنايات ، غتخصص لشركات ترحيل الخدمات، من مراكز النداء و المعاهد و المقاولات الخدماتية إلى آخره، زائد توفرها على بنية تحتية متكاملة للبحث العلمي و التكوين و التعليم العالي
و فالمجمل لمدينة ككل كانت غتستقبل ساكنة بتعداد 300 ألف نسمة ، و بكل المرافق و المصانع و الشركات و المحلات التجارية اللي غيكونو فيها غتوفر أزيد من 100 ألف منصب شغل. و التكلفة الإجمالية لتشييدها ، كتوصل ل 10 مليار دولار و هادشي كامل كان غيتحقق بحلول سنة 2030.
Негізгі бет هل خسر المغرب رهان طنجة تيك؟ أم سيتم إعادة إحياء المدينة الصناعية العملاقة بإستقرار مصانع ضخمة فيها
Пікірлер: 58