Мына суретте Қуат пен Гүлзифа Біткембаевтар. Ерлі-зайыптылар осыдан екі апта бұрын Алматыдағы қанды қақтығыста қапыда қаза тапқан еді. Қонақтан келе жатқан олардың көліктеріне белгісіз біреулер оқ жаудырып, бір отбасының екі бірдей мүшесі сол жерде көз жұмады. Ал ата-аналарынан бір сәтте айырылып қалған марқұмдардың балалары бұған кімнің жауап беретінін біле алмай жүр. Айтуларынша, осы күнге дейін көңіл айтып, демеу көрсетуге құлық танытқан бір де бір мемлекеттік орган өкілі болмапты. Қаңтардағы дүрбелеңге қатыспаса да, қаңғыған оқтан опат болған осындай адамдар көп. Олардың жақындарына өтемақыны кім төлеп, көз жасын кім сүртуі тиіс? Заңгерлер кінәні неге ішкі істер органдарына артып отыр? Келесі материалда.
7-қаңтар күні Біткембаевтар әулеті қара жамылды. Қонақтан шыққан ерлі-зайыптылар Алматыдағы Назарбаев даңғылының бойына жеткенде көліктеріне оқ жауған. Тоқтаусыз атылған оқтан көліктің сау-тамтығын қалмай, сол жерде жарылады. Ал іштегі ерлі-зайыпты сыртқа шыға алмай қалған.
МӘУЛЕН БІТКЕМБАЕВ, марқұмдардың ұлы:
- Кішкентай сүйектері ғана қалған ғой. Адамдар шошымасын деп, табытқа қойып шығардық. Құдай ғана куә.
Марқұмдардың ұлдары оқты қарша боратқан әскерилер екеніне сенімде. Өйткені куәгерлер сол маңда дәл сол уақытта тек сарбаздардан басқа ешкім болмады деп айтқан. Алайда қазірге дейін не билік өкілдерінен, не құзырлы органдардан бірде-бір жан келіп демеу болмады деп қапалы. Сондықтан олар күтпеген жерден ата-анасын ажал құштырып, өздерін мұндай қайғыға душар еткендерді жазалауды талап етеді.
ДӘУРЕН БІТКЕМБАЕВ, марқұмдардың ұлы:
- Үкіметтен әзірге ешқандай хабар жоқ. Ештеңе болмағандай жүр барлығы. Тек жақындарымыз ғана жәрдемдесіп жатыр. Ата-анамызды кімдердің атқаны, не үшін атқаны анықталады деп үміттенеміз.
Айта кетсек, үкіметтен қаза тапқан полицейлер мен әскерилердің отбасына көмек көрсетілетіні хабарланды. Ал, ерлі-зайыпты Біткембаевтар сияқты қапияда қаза тапқан бейбіт тұрғындардың жақындарына қандай көмек көрсетіліп, өтемақы төленетіні әлі белгісіз. Тек бүгін ғана Қаржы нарығын реттеу және дамыту агенттігі қаңтардағы тәртіпсіздікте қаза тапқан халықтың несиесі кешірілетінін хабарлады. Заңгер Айыпхан Мұхамедиев бүлік кезінде опат болған бейбіт тұрғындардың туыстары өтемақы алу үшін әуелі құзырлы органдарға арыз түсіріп, сараптама тағайындатуы керек дейді. Соның негізінде марқұмға нақты кім оқ атқаны анықталып, жауапкер болады. Ал ол анықталмаған жағдайда қоғамдық тәртіп пен қауіпсіздікті қамтамасыз ете алмаған ішкі істер органы кінәлі болып танылуы тиіс дейді.
АЙЫПХАН МҰХАМЕДИЕВ, заңгер:
- Бізде ішкі органдар туралы заң бар. Соған сәйкес ішкі істер органдары адамның денсаулығын, қоғамның тыныштығын қамтамасыз ету керек. Сондықтан арыз бергенде ішкі істер органы жауапкер ретінде көрсетіледі. Егер сот ішкі істер органын кінәлі деп табатын болса, сот шешімі негізінде оған төлемақы төленеді.
Сонымен қоса, заңгер бүлік кезінде жапа шеккен жеке азаматтарға жақында құрылған "Қазақстан халқына" қоры арқылы өтемақы берілу керектігін айтты. Айта кетейік, Алматыдағы тәртіпсіздік кезінде қаңғыған оқ тиіп, қапыда қаза болғандардың туыстарынан шағымдар көбейген. Бірақ қала әкімдігі мұндай жағдайда опат болғандарға қандай көмек берілетіні жөнінде жолдаған хатымызға жауапсыз қалдырды.
Абай Нұржанұлы, Рахымжан Ысқақов
Бізді әлеуметтік желіде оқыңыздар:
KZitem - / @informburo31kanal
Facebook - / informburo31
Instagram - / informburo31
Vkontakte - vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31
#АлматыТрагедиясы #жаппай_наразылық #өлім #бейбіт_тұрғындар
Негізгі бет Қаңғыған оқ тиіп, қапыда қаза болған бейбіт адамдардың өліміне кім жауап береді?
Пікірлер: 104