Алматы облысында әкесі үш баласымен бірге газдан уланып қайтыс болды. Қайғылы оқиға Іле ауданындағы «Жомарт» саяжайында болған. Куәгерлердің айтуынша, ер адам азынап тұрған үйін жылыту үшін 25 литрлік газ баллонын қолдан жасалған пешке қосқан. Сөйтіп өздері ұйқыға жатыпты. Бұл уақытта марқұмның әйелі жұмыста болған екен. Ал оқиға куәгерлері егер көгілдір отынға қосылу құны қолжетімді болса, мұндай қайғылы жағдай болмас еді дейді.
Қайғылы оқиға мына үйде болған. Бірер күн бұрын ғана ауласында балалар асыр салып, жүгіріп жүрген үйдің қазір іші де, сырты да тым-тырыс. Көршілерінің айтуынша, 6 қазанға қараған түні 52 жастағы ер адам үйін жылытпақ болып, қолдан жасалған пешке 25 литрлік газ баллонын жалғайды. Сөйтіп, 3 ұлының жанына жантайып, ұйқыға кетіпті. Ал жұмыстан кеш қайтқан келіншегі жақындарының жағдайын көріп, бірден көршісін көмекке шақырыпты.
Мөлдір Сүйірбаева, көршісі:
- Есікті ашсам, барлығы тыпыр етпей жатыр. Үйдің іші толық угардың иісі алып кеткен. Үйге кірсек, үш ұлы мен әкесі жүріп кеткен, уланып қалған. Құтқару мүмкін болмады.
Көршілері бұл отбасы 2 ай бұрын Тараз қаласынан көшіп келген дейді. Айтуларынша, балалардың анасы Іле ауданындағы мектепте аспаз болып жұмыс істейді екен. Отбасының жазатайым көз жұмған 14 жастағы және 8 жасар егіз ұлдарынан бөлек тағы 2 үлкен баласы бар. Оқиғаны көзбен көрген көрші бұл жағдай табиғи газдың қымбаттығынан болды деп отыр. Себебі көпбалалы отбасы газ тартуға кезекке тұрса да, қосалқы жабдықтарын алуға қаражаттары жетпей, қолдағы пропанмен жылынуға мәжбүр болған.
МӨЛДІР СҮЙІРБАЕВА, көршісі:
- Бұлар ақшасын төлеп қойған, паровойын орнатам деп отырған. Ақшасы болмай қоса алмай қалған екен. Өйткені мына табиғи газдың бағасы өте қымбат. Жоқ дегенде, 500-600 мың. Паравойы мен пешін қоспағанның өзінде.
Ал Алматы облысы Төтенше жағдайлар департаментінің дерегінше, жедел әрекет ету барысындағы тексеріс нәтижелері тиісті органдарға жолданған.
САМАТ КЕНЖЕХАН, Алматы облысы ТЖД Мемлекеттік өрт бақылау басқармасының бастығы:
- Қазіргі уақытта жиналған мәлім құжаттар Алматы облысы полиция департаментіне жолданды. Төтенше жағдайлар департаменті газ құралдарын пайдалану кезінде жазатайым оқиғалардың алдын алу үшін сіздерден қауіпсіздік ережелерін сақтауларыңызды сұраймыз.
Бүгін марқұмдардың денелерін туыстары соңғы сапарға шығарып салу үшін Жамбыл облысына алып кетті.
Азамат Қабетов, Думан Сүлейменов
Бізді әлеуметтік желіде оқыңыздар:
KZitem - / @informburo31kanal
Facebook - / informburo31
Instagram - / informburo31
Vkontakte - vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31
Негізгі бет Қайғылы жағдай... Әкесі үш баласымен бірге газдан уланып қайтыс болды
Пікірлер: 85