Екі күн тоқтамай жауған нөсер жаңбырдан кейін Ақтөбеде көліктер жүруден қалды. Тіпті кей үйлерді су басып, тұрғындарды әбден әбігерге салып жатыр. Осындай жағдайда жергілікті әкімдіктің шарасыздығына налыған тұрғындар, облыс орталығында төтенше жағдай режимін енгізуді талап етіп жатыр. Алайда көшесінде бір арығы жоқ қаланың жауаптылары екі күннен бері түнде ұйықтамай, күндіз күлмей су сорғызумен айналысып жатқандарын айтып ақталып әлек.
ЖАНАР ҚОЖАНОВА, тілші:
- Аптап ыстықтан кейін бірден күн суытып, артынша толассыз жауған жауын ақтөбеліктерді әбден әбігерге салды. Қала көшелері суға толып, адам түгілі үлкен көліктердің де қозғалысына қиындық тудырды. Тоқтаусыз жаңбырдан кей үйлердің ауласын су басса, ескірген пәтерлердің шатырларынан шелектеп су ақты. Жеті баланың анасы Бибігүл Байболатова екі күннен бері ұйқысыз жүріп, суға батқан баспанасын әлі тазартып жатқанын айтады.
БИБІГҮЛ БАЙБОЛАТОВА, тұрғын:
- Потоп болып жатырмыз общым екі күннен бері. Таңғы төртке дейін екі сутка ұйықтаған жоқпыз. Акиматқа, 109-ға соғып жатырмыз. Бір алады, бір алмайды. Айтып жатырмыз. ассенизатор таба алмадық. Ауланың ішінің бәрі суға толып кетті. Өз күшімізбен шығарды.
Оның үстіне қалада қатты жел тұрып, ағаштар құлатып, жарық желілері істен шыққан. Соның кесірінен, қаланың кей аудандарында тұрғындар жарықсыз қалды. Ал, көшенің қақ ортасында суға батқан көліктер бір-бірін сүйреп, әзер жүріп жатыр.
АМАН ОРАЗБАЙ, тұрғын:
- Су кіріп кетті. Аяғымның бәрі су. Машинаның ішінің бәрі су. Машинамды сүйредім. Басқа амал жоқ, не істеймін енді? Әкім нормально жұмыс істесе, суағарлар қайда? Басқа заттар қайда? Білмеймін. Әкімді көрген жоқпыз. Қайдасыз әкім мырза?
Алайда әкімдіктегілер күндіз-түні тек су сорғызып жатқандарын айтады. Сөздерінше, екі күннің ішінде қала көшелерінен он мың текше метр су сорғызылған.
СЕРІК ДӘУЛЕТОВ, Ақтөбе қаласы әкімдігі аппаратының төтенше жағдайлар бөлімінің басшысы:
- Бұл жұмыстарға 65-70- тен астам су соратын техникалар, екі передвижной насос орталық көшелерге жұмылдырылды. Сонымен қатар қаладағы бес насостық станция іске қосылды.
Биліктегілер мұндай жағдайды тап шілде айында күтпесе керек. Өйткені екі күнде жауған жаңбыр бір айдың нормасынан да асып кетті деп отыр.
Жанар Қожанова, Жомарт Құдайбергенов
Бізді әлеуметтік желіде оқыңыздар:
KZitem - / @informburo31kanal
Facebook - / informburo31
Instagram - / informburo31
Vkontakte - vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31
#су_астындағы_қала #Ақтөбе
Негізгі бет Қайдасыз, әкім мырза? Нөсер жауыннан кейін Ақтөбе судың астында қалды
Пікірлер: 173