Қазақстанда қазақ тілінде бір ауыз сөз білмесеңіз де министр бола аласыз. Иә, дәл солай. Еліміздің төтенше жағдайлар министрі Юрий Ильин орыс тілінен басқа бірде бір тілде сөйлей алмайды екен. Сараптамалық Рэңкиңг.кз компаниясы министрлердің қанша тіл білетініне қарап рейтинг жасапты. Алды бес тіл біледі. Бұл рейтингте Ильин ең соңғы орында тұр.
ЕРЛАН САҒАДИЕВ:
- Неге, мен айттым. Онда былай келісейік, келесі жолы 100 пайыз қазақша, келістік қой
Бұл осыдан үш жыл бұрынғы Білім және ғылым министрі Сағадиевтың енді қазақша сөйлеймін деп тұрған сәті. Сол кезде Нұрсұлтан Назарбаев үкіметке қазақша сөйлеңдер деп пәрмен берген-ді. Қазір Сағадиев саясаттан кеткен. Бірақ үкіметтің мемлекеттік тілге қатысты саясаты сол қалпында.
БЕРІК ДҮЙСЕМБИНОВ, Мәжіліс депутаты:
- Сіз қазақша қойылған сұрақтардың барлығына ешқандай рұқсат сұрамай сырғып орыс тіліне қарай ауысып кеттіңіз. Егер сіз өзіңіздің жасыңызға қарамай 18 миллионның ішінен министр болуға жараған екенсіз осы тәуелсіздіктің құрдасы деп санаймын жасыңыз да осы тәуелсіздікке шамалас шығар. Өз ана тіліңізде жауап бермегеніңізді ұят деп санаймын.
Ана тілінде анық сөйлемейтін ұлттық экономика министрінен бөлек үкіметте бес тілді меңгерген шенділер де бар. Ранкинг. кз - тің көп тіл білетін министрлер рейтингінде қорғаныс министрі Нұрлан Ермекбаев пен сыртқы істер министрі Мұхтар Тілеуберді бірінші тұр. Ермекбаев қазақ, орыс, ағылшын, қытай, португал тілінде тілдесе алса, Мұхтар Тілеуберді қазақ пен орыс тілінен бөлек ағылшын, корей, жапон тілінде мүдірмей сөйлейтін полиглот екен.
МҰХТАР ТІЛЕУБЕРДІ, ҚР сыртқы істер министрі:
- Қазақстан азаматы ретінде бұндай сөздерге намысым келеді.
Намысқа тырысып көп тіл үйренгендердің тізімі мұнымен аяқталмайды. 18 министрлікті басқарып отырған министрлердің төртеуі төрт тілді еркін меңгерсе, бес министр ағылшын, орыс, қазақ тілдерінде сөйлей алады. Ал қалған алты министр қос тілді қолданып жүр. Президент тоқтатқанша қайта-қайта мектептерде үш тілді үйреткісі келген білім және ғылым министрлігін басқарып отырған Асхат Аймағамбетов ағылшынша білмейді екен. Қаржы министрі Ерұлан Жауамбаев пен Ақпарат және қоғамдық даму министрі Аида Балаева да ағылшынша білмейтіндердің қатарында.
МАРАТ БЕКЕТАЕВ, ҚР әділет министрі:
- Енді өзіңіз көріп отырсыз ғой. Үйреніп жатырмыз.
Шенділердің мемлекеттік тілді үйреніп жатқандарына 32 жылдың жүзі болды. Бірақ жасы тәуелсіздікпен құрдас министрлердің ана тілінде сөйлей алмауының өзі мемлекеттік қызметке іріктеуді қатаңдату қажеттігін көрсетеді.
Ерқанат Көпжасарұлы
Бізді әлеуметтік желіде оқыңыздар:
KZitem - / @informburo31kanal
Facebook - / informburo31
Instagram - / informburo31
Vkontakte - vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31
#министрлер #ана_тілі
Негізгі бет Қазақ тілінде бір ауыз сөз білмейтін қанша министр бар?
Пікірлер: 693