Psalms 107 || Keerthan 107
ಕೀರ್ತನ್ 107
ಆಕಾಂತಾಂತ್ ದೇವ್ ಮನ್ಶಾಂಚೊ ತಾರಕ್
107:1 ಅಲ್ಲೆಲೂಯಾ! ಸರ್ವೆಸ್ಪರಾಕ್ ಅರ್ಗಾಂ ದಿಯಾ, ಕಿತ್ಯಾಕ್ ತೊ ಬರೊ, ತಾಚೊ ವಿಶ್ವಾಸಿ ಮೋಗ್ ಸಾಸ್ಣಾಕ್ ತಗ್ತಾ.
107:2 ಅಶೆಂ ಮ್ಹಣುಂ ಸರ್ವೆಸ್ಪರಾನ್ ಸೊಡಯ್ಲ್ಯಾಂತ್ ತಿಂ, ದುಸ್ಮಾನಾಂಚ್ಯಾ ಹಾತಾಂತ್ಲಿಂ ತಾಣೆಂ ನಿವಾರ್ಲ್ಯಾಂತ್ ತಿಂ.
107:3 ಕಿತ್ಯಾಕ್ ಪರ್ಕ್ಯಾ ದೆಶಾಂತ್ಲಿಂ ಕಾಡುನ್ ತಾಣೆಂ ತಾಂಕಾಂ ಎಕ್ಟಾಂಯ್ ಕೆಲಿಂ, ಉದೆಂತಿ ಆನಿ ಅಸ್ತಮ್ತೆ ಥಾವ್ನ್, ಉತ್ತರೆ ಆನಿ ದಕ್ಷಿಣೆ ಥಾವ್ನ್.
107:4 ಅರಣ್ಯಾಂತ್, ನಿರ್ಜನ್ ಪ್ರದೆಶಾಂತ್ ತಿಂ ಭೊಂವ್ತಾಲಿಂ, ವಸ್ತೆಚ್ಯಾ ಶಹರಾಚಿ ವಾಟ್ ತಾಂಕಾಂ ಮೆಳ್ಳಿ ನಾ.
107:5 ತಿಂ ಭುಕೆಲಿಂ, ತಿಂ ತಾನೆಲಿಂ, ತಾಂಚ್ಯಾ ಜಿವಾಂತ್ ಜೀವ್ ನಾ ಜಾಲೊ.
107:6 ಆಪ್ಲ್ಯಾ ಕಷ್ಟಾಂತ್ ತಾಂಣಿಂ ಸರ್ವೆಸ್ಪರಾಕ್ ಉಲೊ ಮಾರ್ಲೊ, ಆನಿ ತಾಂಚ್ಯಾ ಆಕಾಂತಾಂತ್ಲಿಂ ತಾಣೆಂ ತಾಂಕಾಂ ನಿವಾರ್ಲಿಂ.
107:7 ತಾಂಣಿಂ ವಸ್ತೆಚ್ಯಾ ಶಹರಾಕ್ ಪಾಂವ್ಚೆ ಖಾತಿರ್ ನೀಟ್ ವಾಟೆನ್ ತಾಣೆಂ ತಾಂಕಾಂ ಚಲಯ್ಲಿಂ.
107:8 ಸರ್ವೆಸ್ಪರಾಚ್ಯಾ ವಿಶ್ವಾಸಿ ಮೊಗಾ ಪಾಸತ್, ಮನ್ಶಾಂ ಖಾತಿರ್ ತಾಣೆಂ ಕೆಲ್ಲ್ಯಾ ವಿಸ್ಮಿತಾಂ ಪಾಸತ್ ತಾಂಣಿಂ ತಾಕಾ ಅರ್ಗಾಂ ದಿಂವ್ಕ್ ಫಾವೊ.
107:9 ಕಿತ್ಯಾಕ್ ತಾನೆಲ್ಲ್ಯಾಂಕ್ ತಾಣೆಂ ಧಾದೊಶಿ ಕೆಲಿಂ, ಭುಕೆಲ್ಲ್ಯಾಂಕ್ ತಾಣೆಂ ಆಪ್ಲ್ಯಾ ದೆಣ್ಯಾಂನಿ ಭರ್ಲಿಂ.
107:10 ತಿಂ ಕಾಳೊಕಾಂತ್ ಆನಿ ಅಂಧ್ಕಾರಾಂತ್ ಜಿಯೆತಾಲಿಂ, ದಳ್ದಿರ್ಪಣಾನ್ ಆನಿ ಸಾಂಕ್ಳಿಂನಿ ತಾಂಕಾಂ ರೆವೊಡ್ ಘಾಲ್ಲೊ,
107:11 ಕಿತ್ಯಾಕ್ ದೆವಾಚ್ಯಾ ಉತ್ರಾಚೊ ತಾಂಣಿಂ ತಿರಸ್ಕಾರ್ ಕೆಲ್ಲೊ ಆನಿ ಭೋವ್ ವರ್ತ್ಯಾ ದೆವಾಚ್ಯಾ ಮಾರ್ಗದರ್ಶನಾಚಿ ಬೆಪರ್ವಾ ಕೆಲ್ಲಿ.
Негізгі бет ಕೀರ್ತನ್ 107 ಆಕಾಂತಾಂತ್ ದೇವ್ ಮನ್ಶಾಂಚೊ ತಾರಕ್ || Keerthan 107 || Psalm 107
Пікірлер: 29