Қызылордадағы апатты баспана тұрғындары алаңдаулы. Олар: «Үйінді астында қалып қоймаймыз ба?!», - деп қорқады. Титов шағын ауданындағы №26 және 27-ші екі қабатты 8 пәтерлі үй осыдан 50 жыл бұрын тұрғызылған.
Бүгінде іргетасы мүжіліп, шатыры мен едені шіріген. Ал тұрғындар жергілікті биліктен көмек сұрғанмен, тұщымды жауап ала алмай отыр.
Бұл - Роза Жаппасбаеваның пәтері. Кейуананың отбасында 5 жан бар. Олар осы үйде 36 жылдан бері күнелтіп келеді екен. Жауын жауса тозығы жеткен төбеден су сорғалайды. Тарам-тарам болған қабырғаларды тіпті түсқағаздар да жасыра алмай тұр.
Ал осыдан төрт жыл бұрын мына пәтердің төбесі опырылып ортасына түсіпті. Сол кезде биліктегілер баспана шатырын жөндеуге жардем берген. Алайда қанша жамап-жасқағанмен, ескі үйдің кем-кетігі түгенделер емес.
Бейсенкүл Бозова, Титов шағын ауданының тұрғыны
-Қамыс деген мынадай болып, мына жерге түсіп кеткенде қайта балалар аман қалды. Енді қазір отырмыз ғой, құдайға шүкір. Қазір су ағады, Ал мыналар майда 5 баласы бар. Оларға енді қанша айтқанмен қорқасын ғой. Тықырлап жатса, сықырлап жатса.
Бұл үйлер осыдан 4 жыл бұрын апатты деп танылған соң, тұрғындар қалалық әкімдіктің пәтер кезегіне тіркелген. Билік өкілдері де тозған үйлерде тұрып жатқандарға арнап 60 пәтерлі екі тұрғын үйдің құрылысы басталғанын айтты. Алайда қаржы қолбайлау болып, құрылыс бел ортасына келгенде баяулап қалыпты.
Нұржан Ахатов, Қызылорда қаласы әкімінің орынбасары
-Титов және Жаппасбай көшесінде екі 60 пәтерлі үй құрылысы жүргізіліп жатыр. Қаржылық жағдайы жылдың аяғына дейін шешілген жағдайда біз жылдың аяғына осы үйді 120 азаматқа кезектілік бойынша беретін боламыз. Егер құрылыс бітпеген жағдайда 2016 жылдың көктем айларында келесі жылға өтіп, сол кезде үй пайдалануға беріледі.
Жалпы Қызылорда қаласындағы 25 көпқабатты үй апатты деп танылып, оларда тұрып жатқан 297 отбасы пәтер кезегіне қойылған. Тозығы жеткен үйдің тұрғындары тездетіп жаңа баспанаға көшуді армандап жүр. «Күндердің күнінде үйінді астында қалып қоймаймыз ба?!», - деп алаңдайды олар.
Авторлары: Нұрлан Жақыпбеков, Әлхайдар Тұрлыханов
Негізгі бет Фильм және анимация Қызылорда қаласында 25 көпқабатты үй апатты деп танылған
Пікірлер: 1