Қызылордада отызға жуық жүк көлігінің жүргізушісі ақылы жолдың әлегін айтып бүгін тағы жиналды. Тапқан табысымыздың жартысынан көбін трассаның ақысына төлейміз деген олар, жылына бір реттік төлем енгізілсін деген шарт қойды. Егер айтқандары орындалмаса, Батыс Қытай-Батыс Еуропа тас жолын жабамыз деп отыр.
Бүгін Қызылорда мен Жаңақорған арасында тас тасып, кәсіп қылған жүк көлігінің жүргізушілері халықаралық трасса бойына тағы жиналды. Былтыр іске қосылған ақылы жол оларды әбден әлекке салған. Жүргізушілер содан бері табыс таппақ түгілі, шығынға шаш етектен баттық дейді. Айтуларынша, екі аралықта тек бір рет жүріп өтуге 10-12 мың теңге төлейді. Ал бұны бір ай төлесеңіз - қалтаңыздың әбден қағылғанын білесіз.
РАУШАНБЕК СМАЙЫЛОВ, жүк көлігінің жүргізушісі:
- 300 мың ақша табады екенмін мен. Соның 240 мыңын жолға төлеп, үйге 40-ақ мың апарып жүрмін. Сонда бұл қалай? Әділетті ме? Запчасть деген қымбат.
Ақылы жол іске қосылғанда "ҚазАвтоЖол" компаниясындағылар түскен ақшаны трассаны күтіп ұстау жұмыстарына жұмсаймыз деген. Бірақ жүргізушілер әлі күнге тас жолдың сапасы сын көтермейді дейді. Соның кесірінен көлігіміз жиі бұзылып, ол үшін тағы шығынданамыз деп ашулы. Сондықтан жол ақысын азайтып, жүк көліктеріне абоненттік төлем енгізуді талап етті.
МАРАЛБЕК ЖҮСІПБЕК, жүк көлігінің жүргізуші:
- Сапа жоқ жолда. Мал көп. Біз сапасына риза емеспіз. Тауып келіп жатқан ақшамыз осы тарифке кетіп жатыр. Осыны жылына бір рет төлейтін қылып, 50 қылып бекітіп берсе.
Ал "ҚазАвтоЖол" компаниясы жүк көлігі жүргізушілерінен қазірге дейін қанша ақша түсіргені белгісіз. Мекеме өкілдері наразылардың талабы орындалмайды деп кесіп айтты.
ШАНЖАРХАН МЫРЗАБАЙ, "ҚазАвтоЖол" ҰК Қызылорда облыстық филиалы директорының орынбасары:
- Әзір абоненттік төлем болмайды деді ғой енді. Келді ғой жауап. Бердік қой сіздерге. Биыл қайтадан жазыңыздар деп отырмыз ғой сіздерге.
Бұған дейін жазбаша арыз жолдаудан шаршадық деген жүргізушілер енді күре жолды жауып тастағаннан басқа амал қалмады деп тарқасты.
Абай Нұржанұлы, Рахымжан Ысқақов
Бізді әлеуметтік желіде оқыңыздар:
KZitem - / @informburo31kanal
Facebook - / informburo31
Instagram - / informburo31
Vkontakte - vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31
#бетонка #ҚазАвтоЖол #наразылық
Негізгі бет Қызылордада шу! Жүргізушілер ақылы жолға қарсылық білдіріп, бір реттік төлем енгізілсін деп шарт қой
Пікірлер: 25