Қытайдағы «I am, Singer» ән байқауына қатысып жатқан Димаш Құдайбергеновтың танымалдығы күн санап артып барады.
Аспан асты елінде ең танымал өнер жұлдыздарының рейтінгі жарияланды, біздің Димаш сол тізімінің жоғарғы тұғырына көтерілді.
Бұл туралы әншінің PR-директоры әрі досы Алпамыс Шәрімов өзінің инстаграм-парақшасында айтты.
«Үздіктердің ондық тізімі әртістердің ғаламтордағы есімін іздеуі бойынша, өнер иелерінің видеоларының көрсетілімі мен телеарнадағы рейтингі негізінде есептеледі», - дейді Димаштың өкілі. Бұл жетістікке жерлестері де қуанышты!
Фейсбук. Роза:
-Ел абыройын ең жоғарғы тұғырлардан асқақтатқайсың, Димаш!
Инстаграм. Сәбит:
-Қарасы қалың қытайлықтар арасынан суырылып, үздік болып шығу екінің бірінің қолынан келмейді! Жарайсың, Димаш!
Инстаграм. Ілияс:
-Димаш нағыз бренд! ЭКСПО көрмесі аясында өтетін концерттерге көбірек қатысса, жанкүйер көрермендері көптеп келіп, туризмге де демеу болар еді біздің ер!
Жұрағат Баман, тілші:
-Шет жерде Алаштың атын жаңғыртып жүрген Димаштың даусы мұхит асып, батыс өнер майталмандарын да таңқалдырды. Тіпті әйгілі «ВОЙС», яғни америкалық «Дауыс» жобасының ұйымдастырушылары Димашқа шақырту жіберді. Бірақ біздің әнші ол сайысқа әзірге бармайтынын айтыпты.
Осындай диапазоны кең әрі сирек «контральто» деп аталатын дауысқа тәнті болғандар арасында танымал тұлғалар да бар.
Еске салсақ, атақты француз әншісі Лара Фабиан Димаштың өнеріне жоғары баға беріп, қазақ өнерпазымен кездескісі келетіні туралы әлеуметтік желіде жазған болатын.
Тағы бір атағы жер жарған әйгілі тұлға Джеки Чан да жерлесіміздің жанкүйерлерінің бірі болып шыққан еді. Кездесуде Димаш Джекиге қазақтың шапанын жауып, домбыраны сыйға тартып, тіпті сол домбырамен Нұрғисаның «Әлқисасын» орындап берген еді.
Жалпы Қытайдағы ән байқауы алдағы сәуір айында аяқталатыны белгілі. Ол сайыстан кейін әншіміз немен айналысатынын бізге Димаштың өзі оқитын Қазақ ұлттық өнер университетінің ректоры Айман Мұсақожаева айтып берді.
Айман Мұсақожаева ҚР халық әртісі, Қазақ Ұлттық өнер университетінің ректоры:
-Димаш Құдайбергенов біздің 70 жылдыққа Канн фестиваліне барады. Сол Канн фестивалінде бізде ұлттық павильон болады. Біздің кинематограф, бәрін көрсетеміз. Концерт береміз, сол концертте Димашты көрсетеміз. Қыркүйек айында мына Лос-Анджелес қаласына баруы керек. «Академическая мобильность» бағдарламасымен сертификат алу керек.
Айта кетері, I AM SINGER ән байқауы 14 кезеңнен тұрады. Жерлесімізге алдағы турлардан сүрінбей өтуді тілейміз.
Негізгі бет #Khabarnews
Пікірлер: 19