Жамбыл облысында Нұрсұлтан Қуатбаев есімді студентті белгісіз біреулер атып тастаған. Ол күні Нұрсұлтан нағашы әжесінің үйінен қайтып келе жатқан екен. Қара жамылған отбасы тұңғыштарын кім және қай жерде атқанын білмейді. Полицейлер тергеу құпиялылығына байланысты нақты ақпарат бермепті. Ал бозбаланың өмірі үшін күрескен дәрігерлер Нұрсұлтанның денесінен үш оқ шығарған.
Нұрсұлтан Қуатбаев қысқы демалысты пайдаланып, Тараздағы ата-анасының қасында болуға келіпті. Әкесі Бақытжанның айтуынша, ол жаппай тәртіпсіздік кезінде үйінен мүлдем шықпаған. Тек жетінші қаңтар күні нағашы әжесіне барған. Ал кешке коменданттық сағат уақытында өз үйіне қайтып келе жатып оққа ұшыпты. Бірақ нақты қай жерде, қалай қайтыс болғаны туралы хабарсыз. Дәрігерлер, марқұмның үш жеріне оқ тигенін айтқан.
БАҚЫТЖАН ШЫҢҒЫСБЕКОВ, марқұм Нұрсұлтан Қуатбаевтың әкесі:
- Жамбасына екі оқ тиген. Мына оң жақ, жүрек жағынан бір оқ тиген. Неге ол? Сол кезде получается артынан атқан, бала құлаған. Келіп добивать етіп, мына жақтан атып отыр ғой. Дұрыс емес қой ол.
Нұрсұлтан отбасындағы бес баланың тұңғышы болған. Ол бала кезден ән айтуға құмартып, өмірін өнермен байланыстыруды армандапты.
КЕҢЕСКҮЛ ШЫҢҒЫСБЕКОВА, марқұм Нұрсұлтан Қуатбаевтың әжесі:
- Өзім-ақ осылай-осылай көтерілемін. Ешкімнің демеуінсіз деп өзін-өзі көтеріп жүрген бала еді. Қияли. Өзінің арманына жете алмай қалды балам. Оның арманы көп еді.
Ал облыстық полиция департаментінің өкілдері тергеу ісінің құпиялылығына байланысты деп, ешбір ақпарат бермеді. Бірақ Нұрсұлтанның кімнің қолынан қаза тапқаны анықталады деп отыр.
ГҮЛСАРА МҰХТАРҚҰЛОВА, Жамбыл облыстық Полиция департаментінің баспасөз хатшысы:
- Қазіргі таңда аталған дерек бойынша тергеу амалдары жүргізілуде. Тиісті сараптамалар тағайындалды. Қылмыстық істің мән-жайы тергеу мүддесіне байланысты ҚР ҚПК 201 бабына сәйкес жариялануға жатпайды.
Қайғыдан қан жұтқан отбасы Нұрсұлтанның қандай жағдайда қаза тапқаны ашық айтылсын дейді. Әрі, 18 жасқа жаңа толған жазықсыз жанға оқ атқан адамдар заң аясында тиісті жазасын алсын деп талап қойып отыр.
Нұрболат Жаңабекұлы, Дәулетбай Нұрмахан
Бізді әлеуметтік желіде оқыңыздар:
KZitem - / @informburo31kanal
Facebook - / informburo31
Instagram - / informburo31
Vkontakte - vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31
#қаңтардағы_қақтығыстар #комменданттық_сағат
Негізгі бет Коменданттық сағат уақытында үйіне қайтып келе жатқан студент оққа ұшып, көз жұмды
Пікірлер: 607