حلقات مقترحة
عملية الفراشة
• المخابرات الأمريكية
خطة المشير
• كيف أطاح المشير أحمد ا...
جاسوسة الملابس الداخلية
• جاسوسة الملابس الداخلية
جاسوس بوتن المفضل
• جاسوس بوتن المفضل
قطة الحرب العالمية
• قطة الحرب العالمية
جاسوس لـ7 أجهزة مخابرات
• جاسوس لـ7 أجهزة مخابرات
جاسوسة نهر الراين
• جاسوسة نهر الراين - سي...
بعد ما نجح هتلر فى غزو فرنسا.. بريطانيا حست ان خلاص.. الدور عليها.. يادوب الجيش الألمانى يعدى البحر ويبقى فى لندن.. وهنا مكنش قدام بريطانيا غير حل من اتنين.. إما انها تستنى الجيش الألمانى يعبر بقواته لشواطئها وبعدين تبدأ تواجهه.. أو انها تحارب على الأراضى الفرنسية.. قبل ما الجيش الألمانى يوصلها.. لكن هنا السؤال.. هى كلمة هتحاربه على الأراضى الفرنسية دى معناها انها هتحرك جيشها يروح فرنسا يعنى؟.. قالك لأ.. مش بالضرورة.. أمال هنعمل ايه؟.. قالك احنا نكون شبكات مقاومة فى قلب فرنسا.. وشبكات المقاومة دى ميكونلهاش غير شغلانه واحده.. ألا وهى التخريب..
الشبكات دى لازم تخرب أى حاجه بيستخدمها الجيش الألمانى.. سكك حديد يفجروها.. قوات ألمانية يستهدفوها.. مخازن سلاح ينسفوها.. خطوط إمداد يعطلوها.. اعمل اللى تقدر عليها المهم الجيش الألمانى يحس بالعجز.. يحس انه غرز برجله فى فرنسا ومش قادر يخطى خطوة واحده ناحية بريطانيا.. وبكده نقدر احنا اللى نهاجمه بعد ما نتأكد انه بيتخنق ومش قادر يتنفس..
لكن هنا كان السؤال.. هنأسس شبكات المقاومة دى ازاى؟.. مينفعش نبعت ظباط مخابرات انجليز لأنهم هيتكشفوا بمجرد ما يتكلموا.. اللكنة البريطانية معروفة لأى حد.. وحتى لو قدرنا نوفر ظابط ولا اتنين ولا حتى عشره بيتكلموا لغة فرنسية بشكل كويس.. فالعدد ده مش كفاية أبدا علشان نأسس شبكات مقاومة كامله وجاهزة لمواجهة هذا الجيش الألمانى المرعب..
أيوه يعنى يا فندم هنعمل ايه؟.. المخابرات البريطانية وصلت لحل وهو انهم يكونوا شبكات مقاومة من السيدات.. ويتم اختيارهم من المهاجرين اللى عايشين على الأراضى البريطانية.. حضرتك تقولى اشمعنا يعنى سيدات.. وليه من المهاجرات؟.. أقولك الله ينور عليك.. ده نفس السؤال اللى سأله تشرشل رئيس الوزراء البريطانى لقيادات جهاز المخابرات لما عرضوا عليه الفكرة.. فكان ردهم ان نسبة الشك فى السيدات أقل بكتير من الرجاله.. مين البنوته الرقيقة الجميله اللى هتسيب الحب وسنينه وتروح تشيل سلاح علشان تقاوم بيه الاحتلال الألمانى.. انما الرجاله نسبة الشك فيهم أعلى.. البوليس السرى الألمانى اللى هو الجستابو.. مكنلوش شغلانه غير انه يقبض على الرجاله ليل نهار ويرميهم فى المعتقلات.. صحيح كان بيقبض برده علي السيدات.. لكن نسبتهم كانت أقل بكتير من الرجاله.. وكان تركيز الجيش الألمانى على اليهود أكتر.. أما مسألة اختيار السيدات من المهاجرين اللى عايشين فى بريطانيا.. هو ان أصولهم مش بريطانيه.. وبالتالى حتى لو اتقبض عليهم فى فرنسا.. صعب تربط بينهم وبين بريطانيا بأى حال من الأحوال.. لكن سيدى المواطن ورغم كل التفاصيل دى.. إلا إن تشرشل مقتنعش.. كان رافض لفكرة ان الجيش البريطاني يبعت بنات صغيرين خلف خطوط العدو.. وده مش أى عدو.. ده الجيش الألمانى اللى مفيش فى قلبه ذرة رحمه.. ده الجيش الألمانى اللى مبيعرفش يتكلم غير بالتعذيب والرصاص.. وبالتالى مستحيل نبعت حريمنا هناك.. لكن بعد شوية وقت.. تحصل المفاجأة وهو ان هتلر قدر يغزو بولندا والنمسا والدنمارك والنرويج وتشيكوسلوفاكيا وبلجيكا وهولندا ولوكسمبورج ويوغوسلافيا واليونان.. ده طبعا غير فرنسا.. وهنا حرفيا مكنش فاضله غير بريطانيا.. وخلاص مبيفصلش بينه وبينها غير البحر.. قناة مائيه صغيرة بتربطها بفرنسا.. لو عبرها الجيش الألمانى يبقى وصل انجلترا.. وصل لندن..
وهنا طلع قادة المخابرات البريطانية على تشرشل تانى.. قالوله شوف يا عم تشرشل.. انت بتفهم فى السياسة على عينا وعلى راسنا.. انما شغل الجواسيس وشبكات التجسس ده شغلنا احنا.. ومش هنمشي من هنا غير لما توافق اننا نجند سيدات ونبعتهم للجبهة فى فرنسا.. يا جدعان يعنى انتو يرضيكوا نبعت حريمنا خلف خطوط العدو.. نبعتهم للجيش الألمانى؟!.. قالوله اه يرضينا.. قالهم خلاص.. مادام يرضيكو اتوكلو على الله..
وهنا تم تكليف القطاع فى أو سيكشن فى فى المخابرات البريطانية بتنفيذ المهمة دى.. مهمة تكوين شبكات تجسس وتخريب مكونه بالكامل من سيدات.. علشان يتم نقلهم خلف خطوط الجيش الألمانى فى فرنسا.. وهنا لو حضرتك من الناس اللى بتؤمن بنظرية ان الست مكانها فى المطبخ.. فخلينى أقولك ان مفيش حد وجع هتلر ودوخ الجيش الألمانى فى الحرب العالمية التانية قد الستات.. وخلينى أحكيلك..
من المصادر
bit.ly/3T8qyOE
bit.ly/3CIwAzW
bit.ly/3EsA5vD
n.pr/2GtBunh
#المواطن_سعيد #الجاسوسة_العرجاء
Негізгі бет كيف نجحت جاسوسة عرجاء فى هزيمة هتلر
Пікірлер: 965