ลำล่อง ประวัติวัดป่าอาศิราวาสเกาะเกิ้ง
ศิลปิน ลายพิณ ชินราช
ประพันธ์กลอนโดย สายรัก วาเลนไทน์
แคน ยาณัฐชนน ป่าสน
พิณ, ซอ โนชานน ชินราช
ห้องบันทึกเสียง แฮปปี้สตูดิโอ(บางบัวทอง)
..เนื้อกลอนลำ ประวัติ วัดป่าอาศิราวาสเกาะเกิ้ง
..............................................................................................................
หล่ะคนเอ๋ยคน สมัยนี่ มีความเห็นน้อแตกต่าง มีปัญหาหลายอย่าง ให้เถียงกันอยู่ซุมื้อ บ่คือกี้แต่เก่าหลัง เอาแต่เงินเป็นที่ตั้ง บ่เข้าวัดน้อฟังศีล กินสุรายาเมา ห่วงแต่เอาบ่มีแล้ว ตกแลงมากะกำแก้ว แนวนิยมกันถ้วนทั่ว จากทองคำเป็นตะกั่ว เทิงพ่องตีพ่องฆ่า โอ้ย.ศีลห้าแม่นบ่มี เอาหล่ะเด้อ กล่าวมาถึงบ่อนนี่ สิเข้าเรื่องดอกทางศีล ผม ลายพิณ ชินราช นี่คือนามศิลปิน สิกล่าวแจง อือ.แถลงเรื่อง ความเจริญฟูเฟื่อง ในสังคมสมัยใหม่ คนบ่ค่อยสนใจ ในพระสงฆ์องค์พระเจ้า นับวันมื้อสิเหล่าลืม แต่ยังมีผู้ที่ยังปลาบปลื้ม ยังดูดดื่มในคำสอน ห่มผ้าไตรจีวร เพื่อรักษา พระธรรมไว้ พระอาจารย์กมล อัตตธัมโม พระผู้มีประสงค์ให้ ศรัทธาไทยทุกท้องถิ่น เลิกนินทาติฉิน สามัคคีก่อเกื้อ สิพาก้าวสู่สวรรค์ สามัคคีเด้อท่อนั่น สิพาสู่ความสำเร็จ เฮ็ดอิหยังกะเห็นผล ดั่งประสงค์น้อตรงเป้า ความมาผมสิเว้า ให้ฟังเอาเด้อน้องพี่ ประวัติเดิมตั้งแต่กี้ บ่ทันได้ไฝ่พระธรรม เผยชีวิตที่ชอกช้ำ โหมกระหน่ำให้มองเห็น จักแม่นกรมหรือเวร จั่งได้เป็น โอ้ย.แนวนี่ พระอาจารย์กมล เกิดในปีสองพันห้าร้อยสิบสาม เด้อน้องพี่ บ้านเลขที่ลำดับหก หมู่ห้า โอ้ยลุงป้าให้จื่อเอา บ้านเกิ้งเด้อเป็นตำบลตั้งแต่เค้า ในพื้นที่อำเภอเมืองสารคามคือจังหวัด ศรัทธาโยมให้จำไว้ เกิดมาในครอบครัวน้อย มีความจนเป็นน้องพี่ อายุเพียงสิบสามปี พ่อกะมีน้อโรคร้าย โอ้ยหมายฆ่าแม่นบ่ยัง ขาดเสาหลักสิยึดยั้ง หวังเรียนต่อบ่เป็นผล ได้เกิดมาน้อเพียงหน กะส่างจนแท้เด้น้อ ตัดสินใจบ่ยอมท้อ เดินทางสู่ กทม.ทำงานจ้างหาทุนตื่ม ความตั้งใจบ่เคยลืม ทำงานไปใจต่อตั้ง หวังเรียนพร้อมแม่นบ่เซา จบมอสามหวนคืนมาสู่เหย้า บ้านเกิดเก่าหย่ามมารดาพระเพิ่นมาทายทัก บอกว่าดวงบ่ดีแท้ จั่งแนะนำวิธีแก้ ให้แลเห็นช่องสว่าง ใช้พระธรรมนำทาง วางความเจ็บทุกข์ฮ้อน สัญจรได้ไฝ่พระธรรม หล่ะท่องมาเบิดน้อทุกก้ำ ตามพงป่าพนาสี เรียนนักธรรมโท ตรี ย้อนว่ามีน้อใจตั้ง จั่งได้หวนมายั้ง ทางอิสานบ้านเกิดเก่า วัดเกาะเกิ้งของเฮา ก่อนเคยเป็นเด้อป่าช้า ศรัทธาเอิ้นหม่องอยู่ผี สำนักสงฆ์แต่ก่อนกี้ กะมีอยู่ดอกคุณตา ผ่านเลยมาหลายปี พระกะหนี บ่มาใกล้ จนเถาวัลย์พันธุ์ไม้ สัตว์ทั้งหลายได้ซ้นอยู่ ขาดหลวงตาญาคู สามเณรผู้น้อย แม่ชีนั่นกะบ่มี พระอาจารย์กมล เพิ่นสนใจบ่อนนี่ เคยเป็นที่น้อทางสงฆ์ เจตจำนง เพื่อสิบูรณาการ บ่ปล่อยลัย ให้สูญสิ้น เคยได้ยินโยมมาเว้า ถึงเรื่องราว ครั้งเก่าก่อน มีอาถรรพ์ซับซ้อน หลายเรื่องที่ผ่านมา บ้านเกิ้งเด้อแม่ป้า กับวัดป่าที่มองเห็น บริเวณผืนดิน ติดต่อกันแต่คราวกี้ น้ำในชีไหลมาต้อง เซาะดินออกเป็นคลอง เกิดเกาะแก้วกลางน้ำแก่ง ธรรมชาติเปลี่ยนแปลง สร้างทำเลบ่อนนี่ เป็นผืนที่สง่างาม บ่มีทางหย่างข้าม อารามเก่าพังเสียหาย ต้องอาศัยเฮือพาย จั่งค่อยไปถึงในบ้าน ศรัทธาทานตำบลเกิ้ง ประชาชนหลายพื้นที่ ได้มาซ่อยสามัคคี จั่งได้มีน้อแผ่นไม้ เอามาใช้ก่อสะพาน ศรัทธาธรรมหลายหมู่บ้าน ได้มาซ่อยออกแฮงเสริม ออกฮอดเงินน้อมาเติม ซ่อยสร้างเสริม สะพานไม้ จั่งค่อยสำเร็จได้ เป็นสะพานตั้งสง่าจากหมู่บ้านถึงวัดป่า เกิดด้วยแฮงศรัทธา สามัคคีธรรมเด้อก่อให้ สำเร็จได้ให้ท่องเทียว ศรัทธาเอ๋ย วัดป่าอาศิราวาสเกาะเกิ้ง อยู่ในแก่งเด้อเกาะกลาง ทุกทิศทาง แม่นสิมองไปทางใด๋ ได้ชุ่มเย็นนำสายน้ำ หล่ะจั่งแม่นงามน้อเหลือฮ้าย สมบูรณ์หลายเด้ไม้ป่า ตอนนี่ก่อศาลา หวังศรัทธาเด้อพี่น้อง สิมาร่วมแม่นฮ่วมทาน ขอฝากเสียงถึงทุกท่าน ซ่อยฝากส่งกระแสจิต มวลศรัทธามวลมิตร ให้ฮ่วมธรรมน้อบุญไว้ ไผผู้มีใจเศร้า เมาปัญหาบ่ฮู้ซ่วง ตัดกิเลสตัดความห่วง ตั้งสมาธิไว้ สิทำให้ได้ซ่วงเซา ปล่อยวางเด้อหมู่เจ้า ปัญหาเก่าที่สุมอก อย่าสิเอาไฟนารก กอดใส่อกเจ้าของไว้ คิดสิ่งดีสิทำให้ จิตใจเฮาบ่เศร้าหม่น อย่าดูถูกค่าของคน หยุดนินทาเว้าพื้น เจริญขึ้นอย่างแน่นอน บางคนมี แต่บางคนเดือดฮ้อน บ่มีที่สิอาศัย ค่อยเพิ่งพาเด้อกันไป เพื่อผลาสิพายู้ ให้บุญชูหนุนค้ำ นำแยงสุ่บาดหย่าง ผลบุญเอ๋ย คันผู้ใด๋เคยเฮ็ดสร้าง ให้นำยู้คู่สุ่คน ให้มีสุขเด้อลื่นล้น อย่าหมองหม่นมีราศี ให้คิดทำแต่ความดี สร้างก่อสามัคคีไว้ จุดประสงค์สุดท้าย ผม ลายพิณ สิบอกผ่าน ฝากเป็นวิทยาทาน ศรัทธาธรรมทุกพื้นที่ สามัคคีเด้อพี่น้อง อย่ามัวจ้องแต่แข่งขัน ยกตัวอย่างสั้น สั้น เศรษฐีใหญ่มีเงินหลาย ว่าโตรวยบ่สนไผ เว้าใหญ่หลาย อยู่เทิงฟ้า ฮอดเวลาโจรมาปล้น เอิ้นหาหมู่คนจน ไทบ้านให้มาซ่อย เขาบ่สนพอหน่อย ปล่อยเลาตายแต่มื้อนั่น โจรมันฆ่าไว้เลาะทาง นี่หล่ะน้อ ผลของคนบ่เฮ็ดสร้าง ความฮักสมัครสมาน บ่เฮ็ดบุญศุลทาน ย้านแต่เงินสิเหลือน้อย ถึงวันตายบ่มีจ้อย แม้แต่คนสิมาจี่ ทรัพย์สมบัติที่เคยมี ไปเมืองผีใช้บ่ได้ ให้จำไว้ แม่นสุ่คน ศรัทธาโยม อือ......ลงเพียงนี่
Негізгі бет ลำล่องประวัติวัดป่าอาศิราวาสเกาะเกิ้ง - ลายพิณ ชินราช
Пікірлер: 13