مع حلول اي ذكرى عن حرب اكتوبر أو أي مناسبة وطنية..بتلاقي الناس حافظة ومتوقعة على المستوى الدرامي هي هتشوف ايه على القنوات..ما بين افلام اكشن ومعارك رديئة التنفيذ ضعيفة الإنتاج لسبب لا يعلمه إلا الله..أو أبانا الذي في المخابرات الحربية..أو أعمال جاسوسية ومخابراتية مليانة بالمط والحشو..مع نسبة لا بأس بيها من الهجايص لدرجة تقرب من تصنيفها كوميدي.. وفي وسط كل دول كان فيها واحدة اسمها إنعام محمد علي..مخرجة تليفزيونية متعودة في الغالب مع ميزانية ماسبيرو اللي شبه معدومة ..أنها تغزل برجل حمار ..وتعمل شغلها وفق الإمكانيات المتاحة.. فوقعت تحت ايديها مجلدات الكاتب الصحفي والمؤرخ العسكري جمال الغيطاني..اللي بجانب شغله كروائي.. اشتغل في فترة الحرب كمحرر عسكري لمؤسسة الاخبار في السويس ومدن القناة..وفي وسط حكاياته اللي اختلط فيها التوثيق والصحافة مع الحس الروائي..كانت واحدة من أهم وأشهر مذكراته وهي حكايات الغريب.. واللي بتقرب من أحداث منسية بفعل فاعل ومسكوت عنها بشكل غريب ..وهي الفترة اللي تبعت كارثة ثغرة الدفرسوار اللي يطول شرح تفاصيلها ..اللي كان من نتايجها الحصار الكامل من الصهاينة لمدينة السويس ..بغرض السيطرة على المدينة بعد ما يحاولوا يفرضوا الاستسلام على أهلها ..كوسيلة للجيش الإسرائيلي لكسب أرض..وفرض أمر واقع على الجيش التالت الميداني..الحصار اللي استمر من 24 اكتوبر لحد ما انتهى في يناير 74_الفترة المنسية المهملة من تاريخنا دي ..اللي فشل فيها الصهاينة يفرضوا سيطرتهم ويحتلوا السويس..رغم حجم الدمار..ومحاولات التجويع والعطش وضرب كل المرافق.. ورغم عدد الشهدا والجرحى من المدنيين والعساكر..كانت الأحداث دي الملهمة للغيطاني ومن بعده انعام محمد علي مع تعديلاتها الخاصة ..في أنهم يقربوا من اللي مقربش منه حد قبلهم ..من اللي استسهل وقضاها معارك واكشن واختزل الحرب في يوم ٦ اكتوبر وانتصرنا وسلامو عليكو ..قربوا من الإنسان .. المواطن عسكري كان أو مدني..ست أو راجل..الإنسان اللي داق مرارة النكسة ..وحس بالعجز والاستسلام وانتهاء الحلم والطموح واحيانا اللامبالاة .. واللي نفض كل الغبار ده لما حس إن بلده محتاجاله ..وحارب وواجه وحس إن الأرض والعرض شئ يستحق أنه يقاوم ويضحي عشانه..لكنه برضه فضل مجهول ومنسي لما نط على بطولاته غيره ونسبوا كل تضحياته ليهم..لكن الحقيقة مهما حاول أصحاب الرتب والنياشين أنهم يخفوها لازم تبان..ويتعرف ان البطل الحقيقي لو كان عايش أو مات شهيد ..اسمه كمال أو عوض أو زخاري مش مهم الاسم اصلا..هو موجود في قلوب الناس وسيرته حاضرة في حكاياتهم.... حكايات الغريب...
للدعم على Patreon :
/ ahmedbehiry
اشترك في القناة الرسمية على تليجرام:
t.me/ABehiry
الصفحة الرسمية لاحمد بحيري علي الفيسبوك
/ ghasilmokh
الصفحة الرسمية علي تويتر
/ ahmedbehiry
اشترك في القناة لمتابعة الحلقات الجديدة
goo.gl/2KheJZ
Негізгі бет {الحراق}(109) البحث عن الغريب
Пікірлер: 223