محمد حسين يعقوب راح المحكمة من كام يوم علشان يشهد في قضية اسمها داعش امبابة ،، تحس انه خط ميكروباص اصلا مش اسم قضية ،، المهم ان الشيخ لما وصل المحكمة لقيناهم محضرينله ميكروفونات و كاميرات و حطينها قدامه .. ايه ده يا جماعة ،، انتوا هتصوروا اغنية لعمرو دياب و لا هتعملوا فيديوكليب للشهادة و لا ايه ،، من امتي الشهادات بتتسجل صوت و صورة،، ده انتوا لما بتسمعوا شهادة في قضية سرقة مشابك بتمنعوا النشر فيها و بتقولوا انها بتمس الامن القومي لحبل الغسيل ،، من امتي بقي الشفافية دي و اشمعني الشهادة دي بالذات الي بتذيعوها علي الهوا زي ما تكون ماتش في الدوري و كان ناقص تعملولها استوديو تحليلي قبلها و تجيبوا فيه مدحت شلبي ،، و بعدين انتوا جايبينه يشهد ليه اصلا ،، ؟ قالك علشان المتهمين استشهدوا بافكار من كتبه .. طيب ما تجيبوا الكتب دي و شوفوا ايه الي مكتوب فيها ،، جايبينه هو نفسه ليه ،، يعني المتهمين لو كانوا استشهدوا بكتب لنجيب محفوظ و لا شكسبير كنتوا هتبعتوا تطلعوهم من التربة مثلا .. خلاص العدالة مقطعة بعضها اوي ،، الواضح كده ان المحكمة و الاجهزة الي بتحركها كانوا عاوزين يعملوا حفلة علي الشيخ يعقوب و الي زيه و يشوهوه و يصدروا الشهادة دي للراي العام و السوشيال ميديا علشان ينزلوا تقطيع فيه هو و كل الاسلاميين عموما ،، و ده الي حصل فعلا ،، يدوبك الشهادة خلصت من هنا و لقينا الحفلة ابتدت و السف و الهجوم و الشتيمة علي الشيخ و الاسلاميين اشتغلوا و مبطلوش ،، اتهامات بانه خايف و انه بيغير كلامه و انه خذل المتهمين و ضيعهم ،، و الكل بقي بيشارك في الحفلة و بيردد نفس الكلام الي بيتقال من غير ما حد يتعب نفسه و يتفرج علي الشهادة و يشوف الشيخ عمل كده فعلا و لا لا ،، طيب يا جماعة طالما انتوا بتحبوا السف اوي كده ،، محدش فيكم خد باله من الي القاضي عمله .. ده تقريبا كان بيقدم في الجلسة اسكتشات في مسرح مصر مش اسئلة لشاهد،، مرة انت بتصلي علي النبي كتير ليه ،، ومرة قولي كل الكتب الي قريتها في حياتك ،، كل ده فيه ناس ما خدوش بالهم منه ببساطة لانهم ما شافوش الشهادة اصلا ،، هم قالوا ايه ده حفلة علي الاسلاميين.. يا حلاوة .. ده احنا نخش نشارك فيها بقي علي طول هو احنا لسه هنتفرج .. السؤال بقي هو الشيخ يعقوب عمل ايه اصلا للتقطيع ده كله .. كان خايف و اجاباته ما كانتش واضحة ،، و مين الي المفروض ما يخافش في دولة قمعية بتدبح و تسجن و تلفق قضايا لكل الناس عيني عينك ،، و بعدين ايه موضوع انه خذل المتهمين و ضيعهم ده ،، علي اساس ان القاضي كان مستني شهادته يعني علشان يحكم علي اساسها ،، و لو كانت شهادة الشيخ في صالح المتهمين القاضي كان هيروح يفتحلهم باب القفص و يسيبهم يروحوا ،، ما الكل عارف ان الاحكام جاهزة من قبل المحاكمة اساسا و الاعدام و المؤبد بيتوزعوا علي كل الناس زي البونبوني عادي ،، بالمناسبة صحيح ،، طالما فيه ناس كده اتضح انهم غاويين متابعة المحاكمات و هوايتهم الوحيدة الفرجة علي الجلسات كده ،، الناس دول ما خدوش بالهم ان فيه قضية اسمها فض رابعة النقض ايد فيها من يومين بس احكام الاعدام علي ١٢ شخص ،، محدش فتح بؤه ليه ساعتها ،، و لا انتوا بتعلقوا علي الشهادات بس لكن الاحكام ما بتجيبوش سيرتها ،،. و لا انتوا خوفتوا تعلقوا .. الله!.. ما انتوا طلعتوا بتخافوا اهو انتوا كمان اومال نازلين تقطيع في الشيخ ليه علشان خاف و فاتحين صدوركم عليه
للدعم على Patreon :
/ ahmedbehiry
اشترك في القناة الرسمية على تليجرام:
t.me/ABehiry
الصفحة الرسمية لاحمد بحيري علي الفيسبوك
/ ahmed.behiry.the.page
الصفحة الرسمية علي تويتر
/ ahmedbehiry
اشترك في القناة لمتابعة الحلقات الجديدة
goo.gl/2KheJZ
Негізгі бет {الأسبوع ف كيس}(271) لا كهربائي و لا بافهم في الكهربا!
No video
Пікірлер: 1 М.