Bilmirəm hayandan tapdı ömrümü
Bir dəlisov at kimi çapdı ömrümü
Dağlara daşlara çırpdı ömrümü
Qədrimi bilmədi bu adam mənim
İlahi, al məni bunun əlindən.
Kaş mənim ömrümü bu yer üzündə
Bir özgə adama tuş eləyəydin
Lap məni adam yox-quş eləyəydin,
Lap belə bir qara daş eləyəydin.
Məni bu adama sən necə qıydın?
İlahi, al məni bunun əlindən.
Al məni,ver məni ,özgələrə ver,
Sınıq aynalara, güzgülərə ver.
Bölünüm yüz tikə, min tikə olum
Bu adam üzümə baxa bilməsin.
Məni aynaların qırıqlarından
Toplaya bilməsin, yığa bilməsin.
İlahi, al məni bunun əlindən.
Bölünsəm dərdim də bölündü bəlkə,
Hər dərdim yüz tikə, min tikə oldu.
Bir dərdim qalmadı özümdən yekə ,
Bütün dərdlərimdən mən yekə oldum.
İlahi, al məni bunun əlindən.
İlahi keyfinin xoş saatında
Yenidən yadına düşürsən məni,
Yenidən toplasan qırıqlarımı,
Sınıq əllərimi, ayaqlarımı,
Ağzımı ,burnumu,qulaqlarımı.
İlahi təzədən toplasan məni,
Təzədən yollasan dünyaya məni
Bu adam olmaram-özgəsi ollam.
İlahi, al məni bunun əlindən...
Негізгі бет İlahi al məni bunun əlindən
Пікірлер: 3