الحلقة الاولي من سلسلة الأساطير #المستدير #سالينكو
طبعاً كلنا عارفين ان فى لاعبية كتير عملوا تاريخ كبير فى كاس العالم زى بيليه اللى بيمتلك ارقام قياسية زى انه اصغر لاعب يفوز بكاس العالم وكمان يسجل فى نهائى البطولة ، وكمان اللاعب الوحيد اللى فاز ب 3 نسخ كاس عالم ، و طبعاً كلنا عارفين قصة فوز مارادونا بمونديال 86 والاداء التاريخى اللى عمله ، ولاعبية كتير جداً قدروا انهم يخلدوا اسمائهم فى تاريخ المونديال امثال كلوزة الهداف التاريخى وميسي اللاعب الاكثر مشاركة و غيرهم كتير .
ـ لكن النهاردة هنتكلم عن لاعيب تقريباً كدا محدش يعرفه او على الاقل أغلب الناس متعرفوش ، والغريب فى الموضوع ان اللعب دا مش بس حفر اسمه فى تاريخ بطولات كاس العالم عن طريق انه يشارك فى نسخة واحدة مثلاً ، لا دا عن طريق مباراة واحدة بس .
ـ هنتكلم النهاردة عن المهاجم الروسي اوليغ سالينكو ، وهو من مواليد مدينة سانت بطرسبرغ فى اكتوبر 1969 ، بدأ اللاعب مسيرته الاحترافية فى عمر ال 17 مع نادى زينيت علشان يلعب معاهم موسمين كاملين قدر خلالهم انه يسجل 10 اهداف ، علشان ينتقل بعدها اللاعب لنادى دينمو كييف الاوكرانى سنة 1989 علشان تبدأ مرحلة جديدة فى مسيرته .
ـ ويقضي سالينكو مع النادى الاوكراني 3 مواسم علشان يلعب فيهم مع النادى 91 مبارة قدر فيهم انه يحرز 28 هدف ، لكن فى الفترة دى بنشوف انحلال الاتحاد السوفيتى سنة 1991 ، واللى بسببه هيحصل حاجه غريبة جداً لسالينكو واللى هيلعب اول مباراة دولية ليه سنة 1992 مع المنتخب الاوكرانى فى اول مبارة رسمية فى تاريخهم واللى كانت ضد منتخب المجر لكنه مش بيسجل اى هدف فى المباراة .
ـ وبعدها بيقرر اللاعب انه يطلع على الدورى الاسبانى علشان ينتقل لنادى لوغرونيس ويقضي معاهم موسم قدر فيه انه يسجل 23 هدف ، وبنوصل مع نهاية الموسم 1994 واللى بيكون مع نهايته بطولة كأس العالم ، علشان يقرر اللاعب وقتها انه يمثل المنتخب الروسي .
ـ فى الوقت دا الجمهور الروسي كان عنده امل كبير فى سالينكو بسبب انه فى مونديال الشباب سنة 1989 كان هداف البطولة ب 5 اهداف ، ولما بيجى المونديال بتقع روسيا فى مجموعة فيها البرازيل و الكاميرون والسويد ، علشان يبدأوا مشوارهم فى اول بقاء ليهم ضد البرازيل ، لكن فى المباراة دى سالينكو مش بيبدأ اساسي وبيدخل من على الدكة اخر 20 دقيقة ومش بيساهم بأى هدف فى المبارة علشان تنتهى المبارة 2-0 للبرازيل .
ـ وفى الماتش التانى ضد السويد بيبدأ اساسي المرة دى وبيقدر انه يسجل هدف من ضربة جزاء لكنهم بيخسروا المرة دى 3-1 ، وبنيجى للمباراة الأخيرة واللى كانت ضد الكاميرون ، وقتها كان بيشارك فى المونديال 24 فريق وكان بيتأهل من المجموعات الاول والتانى وافضل 4 توالت علشان يكملو 16 فريق فى دور ال 16 ، وكان لازم على روسيا انها تفوز بالماتش الاخير علشان يقدروا يصعدوا من ضمن احسن توالت .
ـ علشان تبدأ ساعتها المباراة اللى هتخلد اسم سالينكو فى التاريخ ، واللى بعد اول 29 دقيقة بيكون مسجل هاتريك فى مرمى الكاميرون ، علشان فى الشوط التانى يسجل هدفين ويصنع هدف فى المباراة التاريخية علشان يبقى الاعب الوحيد فى تاريخ كاس العالم يسجل 5 اهداف فى مبارة واحدة .
ـ 6 مساهمات لسالينكو فى مباراة واحدة انت متخيل الرقم ؟ علشان وقتها تفوز روسيا بالمباراة بنتيجة 6-1 علي حساب الكاميرون ، بس من سوء الحظ ان روسيا متأهلتش كتالت للمجموعة وبتودع المونديال .
ـ لكن سالينكو هو اكتر روسي استفاد من المونديال دا بسبب الرقم القياسي الكبير اللى حققه ، واللى محدش عارف يكسره لغاية النهاردة ، الغريب فى الموضوع ان سالينكو مسجلش ولا هدف مع روسيا غير ال 6 اهداف اللى سجلهم فى مونديال 94 .
ـ بعد ماتش الكاميرون مباشرةً طلبوا من سالينكو يعملوا ليه فحص منشطات ، لان وقتها طبعاً كلنا عارفين قصة مارادونا الشهيرة ووقفه بسبب المنشطات .
ـ وقتها طبعاً كان سالينكو مش بياخد منشطات ولا حاجه ، بس الغريب فى بقا إن ماتش الكاميرون دا كان اخر ماتش فى مسيرة سالينكو الدولية ، ولما اتسأل عن السبب قال ان المدرب الجديد كان مش حابب فكرة ان سالينكو مشهور عالمياً بسبب اللى عمله فى المونديال واستبعده من المنتخب علشان كدا ، ودا طبعاً كان فيه ظلم كبير جداً للاعب .
ـ وفى الموسم اللى بعده بينتقل لفالنسيا يلعب معاهم لمده موسم لكن مش بيقدم مستوى كويس معاهم ، وبعدها بيقعد يتنقل بين الدوريات التركى و الاسكتلدنى لكن مش بيقدم اى شئ معاهم .
ـ ومع بداية موسم 2000/ 2001 بيوقع سالينكو مع نادى بوغون شتشين البولندى ، لكنه مش بيقدر يشارك معاهم غير فى مباراة واحدة بس بسبب زيادة وزنه ، ووقتها بيقرر اعتزال كورة القدم .
ـ وهنا بنشوف اهمية بطولة كاس العالم اللى من خلالها لاعيبة كتير بتقدر انها تكتب اسمها فى التاريخ برغم انهم على مستوى مسيرتهم الاحترافية مش بيسيبوا اى بصمه مع فريقهم ، لكن من خلال مباراة واحدة بس فى المونديال تقدر انك تكتب اسمك فى التاريخ .
Негізгі бет اللاعب الذي حفر اسمه في ابطال كاس العالم من مباراة واحد فقط - الحلقة الاولي | سلسلة الأساطير
Пікірлер