سلم على بقعا بعد جابت عيال
ماعاد باقي غير ندهن لها السير
صارت مشاريهي من الجال للجال
الله لا ينفع فيك يامغثرب البير
عناد عشق موترك قدمك إرمال
اما اعمر الخانات ولا اكسر القير
مرات أقول إنك سنافي ورجال
وأحيان لا والله منته على خير
الطيب سلعة وأنت كم عندك ريال
إن كان تبغى تصير مثل المناعير
هوبل وحط لك ذود وتصير وبال
تمسي مجاهيمك وتصبح مغاتير
واليا اسألوك شلون ومنين هالحال
قل جدي السابع هاك الفايت يغير
محدٍ بعارف جدك إن قيل ما قال
حتى ولو انه خوارٍ معيثير
عن الكرم سولف مع كل منزال
ولا تعطي ألا ان شفت شاشة وتصوير
هذي مراجلنا هذا الوقت بالمال
العز والنوماس كثر الدنانير
تبى الصراحة عاد خل عنك الهبال
العز والله لا عبرنا زمهرير
في جنةٍ ماطبها غير الأبطال
مافيه لا واسطه ولا فيه تزوير
كلٍ وماجابت يمينه من أعمال
واللي خسر خسارة الآخرة غير
يالله بعفوك يوم تقرير الأحوال
حنا واهلنا اللي سبقونا على السير
وختامها صلو على خير مرسال
على محمد عد مازغرد الطير
Негізгі бет الرجولة والمال : الشاعر مبارك سعد
Пікірлер