الشخصية الاعتمادية هي تطور الشخصية المتعاطفة للاسوأ ، وغالبا المتعاطفة لما بتعيش فترة طويلة في علاقة سامة (نرجسية او سيكو او سادية ...) بتتحول لشخصية اعتمادية
طيب ازاي تعرفي انك شخصية اعتمادية ؟ اذا كنتي شخصية اعتمادية :
١- بتحسي انك مسئولة عن مشاعر الاخرين واي حد عنده مشكلة بيتهيأ لك انك مسئولة عن حلها وفعلا مش بترتاحي غير لما تحليها في حين انتي أصلا ملكيش أي علاقة بالمشكلة والكلام دة في كل نواحي حياتك في بيتك في شغلك مع اهلك ، المهم انك بتقدري تحلي مشاكل العالم كله وتيجي عند مشاكلك وتعجزي عن حلها
٢- عندك اعتقاد راسخ انك عارفة ايه الاحسن للشخص اللي معاكي اللي قريب منك يعني ، بالتالي بتحاولي توجهيه بكل الطرق ولو قدرتي حترغميه وهنا دة عيب فيكي ممكن تؤذي بيه اولادك
٣- حدودك مفتوحة او معدومة سواء في الارسال او في الاستقبال ودة شبه سيء بينك وبين النرجسي وان كنتي بتكون نيتك خير للي ادامك والنرجسي نيته خير لنفسه وشر للي ادامه لكن في النهاية انتوا الاتنين معندكوش حدود وغالبا النرجسي بيقفل حدوده وقت مايحس بالخطر لكن انتي مبتعرفيش تقفليها ، وبسبب انك فاتحة حدودك بتقدمي النصيحة للناس من غير مايطلبوها منك لان كمان صعب عليكي جدا انك متنصحيش انتي محتاجة تنصحي والمشكلة هنا انك بتعرضي نفسك للرفض أحيانا (لان مش كل الناس بتقبل أي نصيحة وفي أي وقت وخصوصا الناس اللي حدودها قوية) ودة بيجرحك ويحبطك وبيؤذيكي طبعا لكن انتي مش بتكوني شايفة ان انتي اللي غلطانه لانك بتقدمي النصيحة من غير ماتنطلب منك ، دة غير ان اللي مش بيعمل بنصيحتك كمان بيجرحك وبتاخدي الموضوع بشكل شخصي وبيحصل لك احباط وحزن وشعور بالاهانة ودة كمان مؤذي لكي ( وهنا كمان تشابه بينك وبين النرجسي )
٤- دايما حاسة انك مستنزفة وغضبانة لانك بتاخدي بالك من الكل ومحدش بياخد باله منك وكمان مش عارفة تراعي نفسك ولاتركزي على نفسك
٥- انتي دايما محتاجة التقدير من الخارج ،يعني محتاجة اللي حواليكي يحسسوكي بقيمتك ويذكروا مميزاتك او يثنوا على افعالك عشان تحسي بقيمتك يعني معندكيش إحساس داخلي بالتقدير ودة بسبب ان ابويكي ماعطوكيش الاهتمام الكافي والتقدير والقبول والحب وانتي طفلة ودة خلاكي طول الوقت بتدوري عليه برة ( برضه هنا وجه شبه بينك وبين النرجسي لكن انتي اخترتي سكة الخير وهو اختار سكة الشر ) انتي اخترتي تحصلي على التقدير عن طريق إرضاء الناس ومساعدتهم وهو اختار يحصل ع التقدير عن طريق التقليل من الناس وتحقيرهم واذاهم زي مابيعمل في ضحيته
٦- انتي كمان عندك حساسية عالية جدا للنقد بالرغم من انك زي ماقلنا بتفرضي نصيحتك على الاخر من غير مايطلبها الا انك بتزعلي جدا جدا لما يرفض النصيحة او المساعدة وبتحسي بجرح ورفض ، واذا حد انتقدك في أي حاجة بتزعلي جدا وتنجرحي ودة ناتج برضه عن معاملة الابوين لكي وانتي طفلة واحساسك انهم علطول رافضينك ومش راضيين عنك ابدا مهما عملتي ودايما كانوا ينتقدوكي وينتقدوا شخصك بدل ماينتقدوا تصرفاتك ،المهم ان حساسيتك للنقد مش بتخليكي تثوري وتغضبي زي النرجسي لا انتيب تحسي بالحزن والجرح وممكن تدافعي عن نفسك لكن مش بغضب زي النرجسي
٧- الشخصية الاعتمادية بتكون عارفة انها في علاقة سامة ومتأكدة من كدة وتقدر تخرج من العلاقة (ممكن مخطوبة ، ممكن لسة معندهاش أطفال ، وممكن عندها كل الإمكانيات اللي تخليها تخرج ) ومع ذلك مش بتخرج من العلاقة وبتستمر فيها سنوات طويلة ودة لانك مدمنة اصلاح وبدل ماتخرجي من العلاقة بتحاولي تصلحيها وبتحاولي تغيري في شريكك في العلاقة وعندك امل انه يتحسن او ان عقلك يستخدم حيلة الانكار وتنكري انه شريكك شخص سيء او نرجسي او أي شخصية مسيئة ، او انك تلتمسي له الاعذار لاي عيب فيه يعني لو كداب تقولي دة كدب مرة واحدة عشان خايف على زعلي ، ولو خانك تقولي دي اول واخر مرة ، ولو ضربك نفس الكلام ، ومهما كان فيه عيب بتدافعي عنه لنفسك وللناس
٨ - معندكيش القدرة علي المواجهة ،بتخافي تواجهي لانك شفتي ان اللي بيواجه بيتئذي طبعا في طفولتك وفي معاملاتك مع ابويكي ومعاملة ابوكي لأمك واخواتك ، وبالتالي أصبحت المواجهة شيء صعب جدا وانتي جهازك النفسي يعمل لك حيلة دفاعية انك مش عايزة تحرجي اللي ادامك او مش عايزة تجرحيه ، هو واقع الحال انك مش عايزة تحرجيه عشان خايفة يشوفك انسان وحش وميقدركيش وحد يعرف انك احرجتيه وبالتالي حتفقدي تقدير الناس لكي
٩- بتفقدي روتين العناية بنفسك لانك معندكيش وقت لنفسك ولو فيه وقت بتكوني منهكة ومستهلكة (كان فيه حالات بتقول بتقعد بالايام مش بتلحق لا تسرح شعرها ولا تغسل اسنانها )وطبعا دة لانها بتراعي أولادهك وجوزهك وامك وممكن حماتك وتيجي عند نفسك وخلاص مش قادرة ودة سببه انعدام الحدود لانك مش شايفة نفسك أصلا عشان تحطي لها حدود
١٠- مش راضية عن نفسك ابدا ودايما تقللي من انجازاتك ومش بتشوفي مميزاتك ولا تعترفي بيها
١١- زي النرجسي بالظبط بتخافي من القرب الشديد لان عندك إحساس بالخجل والنقص واكيد مش عايزة حد يكشف الكلام دة
اكونت الفيس بوك
www.facebook.c...
جروب ادرس عدوك النرجسي
/ kawthersanad11
Негізгі бет الشخصية الاعتمادية .... كوثر سند
Пікірлер: 319