مناظرة شعرية بين طفل وقايد :
المناظرة جرت سنة 1930 بين الحاج عمر بن الجيلالي حمر العين من زمالة الأمير عبد القادر ( طاڨين ) وكان عمره آنذاك 16 سنة والحاج عيسى بن علال زيتوني من واد سمير ( قصر الشلالة) وكان قايد المنطقة وشاعرا عظيما وذو مال وجاه .
_ يروي لنا الشاعر محمد الكعبوري من مدريسة ولاية تيارت أنه إلتقى مع الشاعر الحاج عمر رحمه الله وحكى له القصة كاملة .
يقول الحاج عمر كنت معروض في عرس وفي تلك الليلة إلتقيت مع الخثير بن سالم من عرش المويعدات ( الجلفة)
وكان صديق الحاج عيسى بن علال وقالو لو كان نلقى شاعر اللي يحمر لي وجهي نجيبولك وينافسك ولو كان نخسر عليه غنم كاملة ، فعجبه شعري وقالي ياولدي انت راك صغير في سنك وكلامك راه سابق سنك وراك تقول في كلام كبير عليك وباين هذا إلهام من عند الله ، واش رايك لو كان تناڨرلي عيسى بن علال وتغلبو نعطيك 100 دورو وهذي القيمة كانت مال كثير وأنا ميسور الحال وإنسان فقير وقتلو نشاور الوالد ، والوالد قالي ياولدي أنت وين والقايد عيسى بن علال وين ماهو من مقامك . ومن بعد وافق الوالد والوالدة هيأتني مليح لبستني عباية وعمامة وكحلتلي عينيا واتصل الخثير بن سالم بالقايد عيسى بن علال فحضر لهم القايد عيسى غداء بالمشوي واستدعى جميع أصحابه ومنهم من كان في رتبة قايد أمثال القايد بن زيبة والقايد امحمد والقايد مبارك وكان اللقاء في خيمة كبيرة ولما وصلنا ومعانا مجموعة من الفرسان رحبو بينا وكرمونا الوصفان ( الخدم ) ومن بعد تكلم القايد بن زيبة ياسي الخثير ورينا الشاعر اللي يتقابل مع القايد عيسى اتكلم الخثير وقالو هذا هو الشاعر ، قالو واش راك تقول هذا من مقام القايد عيسى واستدعى هذا الناس وجات من بعيد وسمعت لعراش بالخثير بن سالم راه جايب شاعر للقايد عيسى بن علال رحت جبتلو ذري ( طفل) هذا ماهو راي ماهو حديث اتكلم القايد عيسى وقال ما تذكرو هذا الكلام ما تعاودوه ، هذي وليمة درتها لحبابي وخلاص وهذا لفارق السن بيناتهم ، اتكلم الخثير بن سالم وقال هذا راني جايبو للنڨار مانيش جايبو للطعام وراني مراهن عليه ب: 100 دورو وحط 100 دورو فوق الفراش ، اتكلم القايد عيسى بن علال وقال هذا راه ولد صغير ومازال في شاو الدنيا كي نعطيلو معنى في الحديث مايفهموش ، ومن بعد اتكلم معايا الخثير بن سالم وقالي راني جايبك باه تسكت اتقدم واتكلم ، قال اتقدمت امام القايد عيسى وقتلو ياسي الحاج انت راك حڨرتني في السن بالصح خرجني من جوايا تعرفني ماضي ولا حافي إذا راني ماضي تفرح وتزها بيا واذا راني حافي سني ووجهني ووريلي ، اتكلم القايد عيسى وقالي اذا راك جايب قصيدة وكاتبها قولها ولا تقدر تجاوبني كلمة بكلمة قدام الجماعة قتلو السلاح اللي جاي تحارب بيه راني واجد وقتلو تبدا ولا نبدا، اتكلم القايد مبارك وقال يبدا الحاج عيسى هو راجل كبير، قالي ياولدي رد عليا بنفس الحرف ( القافية ) .
قال عيسى:
ياشاعر نحو الكلام اسمع نوريك... وافهم لفظ القول مني يافاهم
قال عمر:
لا تتكبر خالقك يستخبر فيك...ومن سلم للخالق بالنية سالم
قال عيسى :
لو تدري في الغيب ماغادي ياتيك...اللي فاتك راح والباقي داهم
قال عمر :
وأنا في جهدي مازال كاين ونوريك... نحكيلك واحكي كلامي للفاهم
قال عيسى :
واشنهي معناك ياذري يكفيك...لا تطعنشي واد جاهل يتلاطم
قال عمر :
كان انت واد جاهل يامليك... أنا بحر المحيط عن وادك عايم
قال عيسى :
تطوال وتعراض بفلوكة نطويك... ماكش حاجة ڨاع لوكان توالم
قال عمر :
صرف شقفك لا البابور يدهميك...تضحى يامليك في الخطرة نادم
قال عيسى :
وريني باب الندم نصنت ليك...مولا طابع كيما انا ولا حاكم
قال عمر :
ماني حاكم كي انت ونعاتب فيك...جوابك في الشاو بيه انت ظالم
قال عيسى :
جاوبني بما تڨول نصنت ليك...رد الاجوبة على الواحد لازم
قال عمر :
كانك مولا صلح باري ونباريك... واش ازانا ڨاع لهذا الخصايم
قال عيسى:
ياذري باب الڨحار صعيب عليك...تستاهلو ناس تعرف تتصادم
قال عمر :
ياراجل ذاك النهار أنساه اخطيك...راه طراد اليوم كنتر بدراهم
قال عيسى :
كاين هذا الكلام الله يبارك فيك...وصرف بغير كتاف كي الصيد الهايم
قال عمر :
أطلب ربك هو الكاين في عونيك...لا تطلب غيرو السامع العالم
قال عيسى :
المانع والعاطي اللي ماليه شريك... يفعل ما يريد سبحانو دايم
قال عمر :
لا تضرب من جاي قاصد يقتل فيك...واعرف باه تحاربو يا بونادم
قال عيسى :
واقيلا نداوسو بلا تشكيك...وسبة دوستنا الخيثر بن سالم
قال عمر:
كي نداوسو تضحك الناس وتلوم عليك...ومنك يامليك ماريت جرايم
قال عيسى :
لاتظنش على الخيثر يبغيك...راهو رويجل شين ومدعوي عادم
قال عمر :
ظرك بردو ماينة ونسلم ليك...وسامحني بالعافية يا محترم
قال عيسى :
رفعت بقدري يجعل البركة فيك... وسامحني يا شيخ في بعض مواهم
قال عمر:
وانت كي طلبت السماح الله يجازيك...مابان فينا من طاح مابان القايم
قال عيسى:
واختمناها بالنبي هو جديك...محمد شفيعنا زين الخاتم .
#عبد_القادر_محدان
Негізгі бет الشّاعر الكبير بغدادي معراج يروي المناضرة الشهيرة بين عيسى بن علال والحاج عمر بن الجيلالي حمر العين
No video
Пікірлер: 3