#المتحف_المصري
في اليوم عالمي للسياحة / من أحلى الأيام.
أنا أعرف عم صلاح من ٨ سنوات تقريبا .. قابلته داخل محل التنجيد اللي بيملكه وبينزل يشتغل فيه رغم عمره اللي تخطى ال ٨٠
بعدها بقيت بتواصل معه من وقت للتاني ومن سنتين تقريبا كنت بكلمه وسألته نفسك في إيه يا عم صلاح؟ رد إجابة غير تقليدية.. وبتلقائية جدا قال: نفسي أروح المتحف المصري.
أنا استغربت.. فقال لي ببساطته الشديدة: العمر جري بيا ونفسي اروح اشوف حضارة مصر .. حضارة جدودنا.. دي حاجة جميلة أوي.
كان بيتكلم بكل حماس وتلقائية وبراءة.
يومها كلمت صديقي ورفيقي في الرحلات جوه مصر محمد سعودي وحكيت له.. بدون تردد قالي نوديه طبعا وروحنا معاه.
وروحنا معاه .. يومها عم صلاح كان فرحان بشكل غير طبيعي .. كأنه رجع شباب.. بقى يجري جوه المتحف من هنا لهنا عايز يشوف كل الآثار ويعرف كل الحكايات.
اليوم ده كل حاجة اتسهلت.. حتى أمن المتحف في غاية الذوق وماخلوش عم صلاح يدفع حاجة واستقبلوه أحسن استقبال.
الناس الطيبة دول مش عايزين يعيشوا ويشتغلوا وبس هي الدنيا خطفت الأيام منهم مش أكتر.. لكن هما نفسهم يجروا ويشوفوا الحياة. ويخرجوا ويكتشفوا الدنيا.
وبتمنى من الناس اللي بيعملوا رحلات لاكتشاف وتصوير مصر وبيعملوا فعاليات على السوشيال ميديا.. يحاولوا كل مرة ياخدوا حد طيب زي عم صلاح.. هتكتشفوا مصر بعيونه وهتشوفوا الحياة بزاوية تانية. وحماسهم هيعديكم
شكرا يا عم صلاح.. شكرا يا محمد سعودي وشكرا لأمن المتحف على الاستقبال الجميل اللي لقيناه يومها.
#اليوم_العالمي_للسياحة #مصر
#go_with_ghaleb
🤍📸
Негізгі бет اليوم العالمي للسياحة .. انبهار رجل تمانيني في أول زيارة له للمتحف المصري
Пікірлер: 2