Müasir dövrün rahat, amma riskli qazanc yolu - Kriptovalyuta nədir və necə alınır?
Artıq uzun illərdir ki, kriptovalyuta sözünü tez-tez eşidirik. Kriptovalyutadan yatırım vasitəsi kimi istifadə edənlər, vəsaitlərini bu sahəyə yönəldərək varlananlar və s. Bəlkə də, bir qismimiz kriptovalyuta almaq eşqinə düşsək də, bunu necə edəcəyimizi bilmir, korkoranə şəkildə yanlış addımlar atmaq istəmirik. Əvvəlcə kriptovalyutanın qısa və daha asan izahına nəzər salaq:
Kriptovalyuta tamamilə rəqəmsal ödəniş və ya yatırım vasitəsidir. Sözün birinci hissəsi “kripto” şifrələmə və gizli sözlərindən götürülüb. Kriptovalyuta dövlətlər və Mərkəzi Banklar tərəfindən nəzarət edilə bilmədiyi üçün rəqəmsal dünyada həmin valyutanın mövcudluğunu və sahibini təsdiqləmək üçün kriptoqrafiya və ya şifrələmədən istifadə olunur. Şifrələmə isə blokçeyn texnologiyası vasitəsilə həyata keçirilir. Blokçeyn əməliyyatları qeyd və təsdiq edir. Nəticədə, hər yeni məlumat bir əvvəlkinə halqa formasında birləşir.
Bunu daha sadə dillə izah edək. Hər hansı real əmlakın alqı-satqısı zamanı notariuslara üz tuturuq. Mərkəzi sistem alışı və satışı həyata keçirən şəxslərin kimliklərini və alqı-satqı prosesini təsdiqləyir. Sözügedən əməliyyat, satış tarixi, qiyməti və s. haqqında məlumatlar sistemə köçür. Blokçeyndə isə hər hansı bir şəxs iştirak etmir. Pul köçürməsi və alış-satış bəzən milyonlarla olan fərdi kompüter şəbəkələri tərəfindən təsdiqlənərək şifrələnir və zəncirə daxil edilir. Blokzəncirin məlumatlarının kopyası dövlət kimi bir sistemdə deyil, bir çox mayner adlanan şəxsin kompüterində saxlanıldığı üçün onu daha sonra dəyişmək və ya silmək mümkün olmur.
Nəticədə, rəqəmsal dünyada hər hansı kriptovalyutanın kimə məxsus olması haqqında məlumatlar bu texnologiya vasitəsilə saxlanılır.
Bəs kriptovalyutanı necə almaq olar?
Bunun üçün ilk olaraq təhlükəsiz və praktik bir birja tapmaq lazımdır. Bura “Binance”, “Coinbase”, “OKX” və s. kimi məşhur platformaları missal göstərmək olar.
Bu platformalarda kriptovalyuta alış-verişi ilə məşğul olmaq üçün qeydiyyatdan keçmək lazımdır. Məsələn, bunlardan ticarət həcmi ən böyük olan “Binance” platformasına daxil olduqda “Daxil ol” və ya “Qeydiyyatdan keç” hissələrinin olduğunu görürük.
“Qeydiyyatdan keç” bölməsinə daxil olaraq tələb olunan bölmələri müvafiq qaydada ardıcıllıqla doldurmaq lazımdır. Sistem şəxsiyyəti təsdiqlədikdən sonra əməliyyata hazır olur.
Qeydiyyatın ardından birjaya daxil olub istədiyiniz kriptovalyutanı kəmiyyət və ya məbləğ olaraq seçə və alışı bank hesabınız vasitəsilə həyata keçirə bilərsiniz. Məsələn, bu gün 1 bitkoinin qiyməti 40 min dollardan yüksək olsa da, biz 100 dollardan aşağı məbləğə də bitkoin hissəsi ala bilərik.
Əldə etdiyiniz vəsaiti nağd pula çevirmək üçün əvvəlcə “pul kisəsi”ndən “geri çək”ə daxil olmalı, kriptovalyutanı seçməli, ünvanı daxil etməlisiniz. Bu zaman çıxaracağınız məbləğ və komissiya qeyd olunacaq. Məlumatları təsdiqləyib, təlimatlara əməl etdikdən sonra köçürmə həyata keçiriləcək.
Digər platformalarda da əməliyyatlar oxşar şəkildə icra olunur.
Onu da qeyd edək ki, sözügedən platformalar aparılan ticarətə görə, müəyyən komissiya haqqı tutur.
Bəs kriptovalyuta alarkən nələrə diqqət edilməlidir?
Mütəxəssislər ilk olaraq korkonarə şəkildə yatırım etməyin əleyhinədirlər. Belə ki, almaq istədiyiniz rəqəmsal valyuta haqqında ətraflı bilgiyə malik olmalısınız. Bu zaman rəqəmsal valyutanın rəsmi vep səhifəsinə daxil olmalı və “Whitepaper” adlanan layihənin məqsədlərini əks etdirən məqaləni oxumalısınız. Oradakı hədəflər və məlumatlar sizi qane etdikdə alış edə bilərsiniz.
Bir sıra xarici platformalarda yer alan qruplara daxil olmaqla almaq istədiyiniz kriptovalyutaların yaradıcıları ilə əlaqəyə keçə bilərsiniz.
Həmçinin məlumat almaq üçün “Coinmarketcap” saytını izləyə bilərsiniz.
Ekosistemdə hər gün yeni platforma və kriptovalyuta yaranır. Bunların bəzilərinin dəyərinin artma potensialı olsa da, əksəriyyəti uğursuzluğa düçar olur. Buna görə də, yatırım etməzdən əvvəl yaxşıca araşdırmalı və doğru addım atdığınızdan əmin olmalısınız.
#gününəsasxəbərləri #xəbərlər #baki #kriptovalyuta #bitcoin #binance
Негізгі бет Müasir dövrün rahat, amma riskli qazanc yolu - Kriptovalyuta nədir və necə alınır?
Пікірлер